Pathian Min Tial Kan Thiam Lo

Laimi Khrihfa kan sinak kum 100 a reng ti lo. Nain, atu tiang kan biakmi Pathian a min tial thiam lomi kan um. Apoi ngai. Zan fatin kan duhmi bia paoh kan ruahmi Pathian, cun zarh fatin kan thangthatmi Pathian a min tial kan thiam lomi cu a poi taktak ko. Cun, aho kan si ah, ahman deuh lo tiah kan ruahmi cu aupi cio ding kan rian a si.Text message ah siseh, Email ah siseh, cun a bikin Facebook ah siseh, pakhat le pakhat kan Laica tein kan i chawn hna i a tha tuk. Joel Ling biahalnak an tuahmi ah hitin a rak chim bal, "ramdang ummi hi, Mandalay hrawng ummi pawl nakin Lai catial zong nan thiam deuh. Nan holh zong a hman deuh" tiah a chim bal. Kai lunghmuih dom. Nain, kan i remh a herh taktakmi pakhat te a um. 

Laimi cheukhat nih kan biakmi Pathian min hmanh tial kan thiam loh ka timi cu hihi a si:

• Bawipa ti a simi kha, "bawipa" tiah kan tial.
• Jesuh ti a simi hna, "jesuh" tiah kan tial hoi. 
• Pathian a simi zong, "pathian" tiah kan tial. Acheu nih "pt" ti hna in kan tial. Kan duhmi vial zan fatin hal ttung i amin tial hmanh thiam lo. Cusilo, kan zeihmanh dah apoi lo dek a si. 
• Amen hna, " a men" tiin kan tial.

Chinchiah: Hi hnu cun, a cunglei min na tial tikah cafang pakhatnak (the first letter) kha, cafang LIAN (capital letter) in na tial peng lai. Cuti na tial lawnglawng ah, kan biakmi a nung Pathian kha a sawh khawh lai. An i dannak, "P"athian vs. "p"athian. 

Kan duhning paoh in hei tial ding asi ko nain, tial awk a that lo caah ka zainak a si. Kan biakmi Pathian min "pathian" tiah kan tialmi nih sullam tam tuk a thlen. Pathian, tiah tial loin "pathian" tiah na tial ahcun, atu kan biakmi Pathian a si ti loh. Zum lotu hna nih an biakmi pathian le adangdang pathian khi a si. Miraang catial na rel fate, "God" ai timi paohpaoh khi anung Pathian kan biakmi a si. Cun, "god" ai timi paoh khi a nung lomi pathian sawhsawh thih a thiammi khi a sawh duh ve. 

Tahchunhnak ah, "pathian sinah thla ka cam" tiah Facebook ah na tial. Ruah ngaingai ahcun, a nungmi kan Pathian sinah cam loin a nung lomi pathian, thih a thiammi pathian sawsawh sin ah na cam, tiah lakpiak khawh na si. 

Cucaah, kan biakmi Pathian min hi sunhloih deuh ko hna usih. Ahman zia le a tialning zong cawng ko hna usih. Mi chimhmi zong i fahsak hlah usih. Ahmanmi kha upa nih kan dirpi ahcun kan nau le pawl chimh cawnpiak an herh ti lai lo. Biakam Hlun chan hna ahcun, Pathian min chim hmanh hi an rak ttih tuk caah "Jacob Pathian, Isak Pathian" tiin an rak chim, tiah ca pakhat ka rel bal. Pathian min ningcang tein kan hman khawh nakhnga Amah Pathian lila nih kan bawm hram seh! 

US Ram In Lairam Lei Cakuat (Part 1)

Tuzarh Ningani (December 25, 2015) cu, kan Bawipa Jesuh Khrih chuahni a si pinah, US ram Sushi riantuanmi hna caah kumpi kum khat i an nikhat dinhni zong a si chih. Ka bia ka nolh rih lai, kum khat chung ni 365 chungah an voikhat dinhni a si. Hi ruang ahhin mitampi nih Sushi riantuan an huam loh. Asinain, chungkhar khuasaknak ahcun company riantuan nakin tlawmte ai ningcang deuh caah an ttuan ko. Ka ule hi 2003 hrawngin a tuni tiang Sushi an tuah peng. Cucaah, Sushi riantuanning hi theih tawk cu ka theih pah ve. 

Sushi (from google image)

Sushi riantuan cu i dinh a um lo. Christmas lawng hi an i din. Nikhatni in Zarhpini tiang an tuan. Zarhpini cu, Pathian thangthat ni a si caah pumh tanh ruah ah zinglei pali (4 am) hna in an tho. An thawh tuanh tuk caah pumhnak chung cun an ngu peng. Tha tein Pathian an thangthat kho lo. Inn lawi i ih lawng hi an i nam tawn. An mit hi a sen. A cheu cu, an retheih tuk ruangah a tho kho lomi tampi an um. Cucaah, ai pum thiam lomi an tampi. An i pumh thiam lo tikah Thlarau tile rawl an chambau. Hi nih hin, anmah pumpak zong Pathian he i hlatnak a chuahter. 

A chel caan ah conference tete zong a um. CBCUSA le CYONA hi an si deuh ko, US ahcun. Hi bantuk zong ah Sushi riantuanmi cu an i tal thiam lo. Tal an duh hmanh ah midang tangka phalh in fial an hau. Hawi kal-umnak zong ah an chuak thiam lo. An re a thei taktak. A cancan ah sahlawh cingla wedding ceremony zong kal a hauh can a um. Hi bantuk can hna i Sushi riantuan ruang ah talpi lo cu a har ko. Mah khua chung cu chim lo, state dang sahlawh cingla zong an tlawng thiam lo. An umnak khua pin an chuak thiam tuk lo. Hihi US ram Sushi riantuanmi hna an dirhmun a tawinak in van charmi siseh. 

Careltu hna, kum khat chung i nikhat lawng "day-off" a ummi rian hi kan tuan duh ve hnga maw? Kei cu ka tuan duh bak lo. Cucaah, ka ule Sushi an tuahnak kum 10 hrawng asi cang nain atu tiang ka thiam ve lo. Thiam hrim kai tim loh rengreng. Hi an hlawhmi tangka tete hi Laitlang chungkhat kan kuat hna i a tha tuk hringhran. Laitlang lei ummi chungkhar thutdirnak caah hlawknak tampi a chuahpi. Sihmanhsehlaw, Laitlang lei rami pawl nih, "Laitlang lei nih US ram tangka kuatmi fawizaang tuk in an hman" an ti. 

Cu an bia nih khua zaza a ka ruahter. Pum thiam lo, mitkuh zong cim lo, din caan zong ngeih lole harsa taktak in an hlawhmi tangka cu maw hmai-hngal tuk in an rak hman tawn ko hnga, ka ti. Lairam lei pastor pakhat nih, "US ram in tangka nan kuatmi hna in sui tthi lianlian an i cawk le, ruakhumhnak ah an sui kong le nan kuatmi tangka kawng lawngte an ceih" a ti. Cun, Laitlang lei in kan theihmi biadang tete zong an um rih. A cheu nih, "dollars nan kuatmi hna in TV lianlian an i cawk. Korean drama an zohnak ah pumh zong an thei ti lo. Nithumni zan pumh zong an chuak ti lo. Thlacam zan zong an chuak ti lo. Nan dollars kuatmi hna cu biakinn inka khartu ah an i cang" an ti. 

Khua ka ruat i ka ngaih a chia tuk. Tangka kan in kuatmi hna hi, lungfim tein rak hmang uh. Hihi na lungchung ah caam peng seh, "Hi dollars hi, harsa tuk in an hmuhmi tangka a si" tihi. US ram kan riantuan retheihning hi thei ve ulaw tihi kan duh taktak hna. Ai daw tukmi chungkhar hmanh lungduh siarem tein caan hmang thiamlo in rian an tuan. US ram cu, a thangchomi ram asi caah zankhuadei hna riantuan ding a um. Nupi le cheukhat cu zaan ah an tuan. An pasal le chun ah an tuan ve. Zeicatiah, nausem tete zohkhenh a herh caah hitihin adang veve in an tuan. Hitin an tuan tikah nule va zong hi ihmuhton le lungduh siaherh ichimh khawh zong a si lo. Zeisihmanh ah, hi cu company rian he ai pehtlaimi asi caah adang tein kan tial te lai. US ram college siangngakchia nih, riantuan retheih buin an sianginn kainak zong kan pehthan te lai. Cun, a bikin US ram ummi hna an lungretheih ruangah "depression" a ngei i ai thatmi kong kan tial than te lai. Mah vial in.. 

****************** Part (2) Pehthan te ding **********************

Virginia State Sianginn Buainak Nih Zeidah a Kan Cawnpiak?

Tuni ah, Staunton, Virginia state i Riverheads High School ah kan tonmi buainak nih Laimi nule pa ralrinnak a kan pek ve. Tuni Riverheads sianginn buainak cu hitihin a si. World geography class ah, Middle East hrawng an culture an cawng hna. Hi ahhin anmah Muslim (Arabic) pawl an ca zong a tial an cawn chih. Cu an cawnmi chungin buainak ngan bik a chuahpimi cu, Muslim pawl an zumhnak "statement of faith" hi a si. "There is no God but Allah and Mohammad is a messenger of Allah" tiin an tialter hna. A sullam thei loin siangngakchia nih an hei tial ko. 

Arabic catial (Christian Today)

Sianghngakchia nule pa nih an theih tikah an thin a lin rua, an celh rumro ve lo. Sayamahnu nih lungthiang tein a tialtermi hna zong a si men ko lai. Nain, sianghngakchia an zumhnak pialpi kho ding thil a si caah an lungtlin lonak (complaint) an tuah (tu hrawng hi Muslim pawl an dirhmun a chiat ngai caah a si kho men). Sianginn zung riantuanmi pawl an email ah nule pa nih an thinhunnak ca heh-chat tiah an kuat hna. Cun, phone zong in complain tampi an tuah rih hna. Cucaah, Augusta County Public sianginn paohpaoh khar an tong dih. 

US ram ah Syria refugees (Muslim) tam tuk an rak luh cang caah hi bantuk buainak hi a tam chin lengmang lai. Naite lawngah an rak lut ko, nain atu buainak a um pah len manh cang. Kan hnu ah Los Angeles, CA ah sianginn nih terrorist ttih ruangah sianginn khar a si. Tuni zong cu thiamthiam. Naite lawng hme an rak luh rua, tiah tuhi sianginn tha tein kai khawh dawh in kan umti ttung lo? 

Hi Muslim pawl luh hi, tulio US president thunak ai cuhmi Donald Trump hna nih cun a doh bak. "Muslim ka huat hna le, mithleiden ka ngeih caah a si lo, kan rampi himnak caah a si", tiah a chim. White House le Speaker Paul Ryan hna nih cun an van thah deng. Donald Trump hi, bia fawizaang tukin a chim nain, ruah riangmang ahcun a si ngai tak ko. Nuhrin covo (human rights) in a palh men lai, nain rampi humhimnak (nation security) cun a palh bak loin ka hmuh ve. Hihi, vawleicung Evangelist minthang Billy Graham fapa Franklin Graham zong nih Trump biachimmi hi a dirpi ngai. "Kan ram politic pawl nih an mit tha tein an au a herh tuk. Hitin kan si ahcun US Constitution in kal loin Muslim phungningin kan kalte lai", tiah a chim. 

Nule pa hna, i ralring ngaingai kan herh ko hih. Nan fale hi, nan mithmuh lo sianginn ah hitin an zumhnak pialter an i zuam hi. Cun, cheukhat sianginn hna ahcun Khrihfa ttanh ruang i an phungbia zulhlo ruangah sianginn phuah tongmi hna an um pah len cang. Laimi kan nau le cheukhat "Pathian a um lo" timi zong ka theihmi an um. Ngeihchia a si ko. Nule pa hna, fale caah tangka kawl sawhsawh lawng hi a zaa ti loh hih. Fimnak le degree baan cancan tinhpiak lawng a za ti loh hih. Pathian bia le hla in biatak in kan hren ve hna lo ahcun an zumhnak kan pialter ko men hna lai hih. 

Si ahcun, Khrihfa asimi Laimi nule pa nih zeidah tuanvo kan ngeih? Zeitindah kan fale hi, hi bantuk cawnpiaknak hmanlo hin kan kham hna lai? Atanglei hna hi, kan ruantuan retheih tuk bu tein fale dawtnak he kan i hnek ahcun kan kham khawh ko hna lai, Pathian nih a kan bawmh lai i. 

1. Bible Study tuahpi ding

2. Devotion tuahpi ding

3. Pathian nih vawlei a sernak kong chimh lengmang hna ding. Sianginn ah minung hi, zawng in kan chuak ko timi cawnpiaknak hmanlo a um. 

4. Pathian a tthatnak le a lianngannak chimh lengmang hna ding

5. Ih lai ah Bible relpi peng ding. Tlang hnih-khat zong apoi lo. 

6. Pumhnak a umnak paohpaoh ratpi peng ding. 

Matthai 18:6

"Hi ngakchia tete pakhatkhat hii keimah an ka zumhnak in a pialtertu hna cu, an hngawng ah facang rialnak lungtum nganpi i thlaih hna seh law, rili chungah paih si hna seh law an caah a tha deuh hnga."

Casino Kal Na Hmang Maw?

Casino tuanbia kan zoh tikah China ram BC 2300 in a rak ithok. Hlan lio Greece chan ah Casino bantuk phun hi a tam cu an rak tampi ve. Nain, Taluk ram i a ummi “gambling” hi casino he ai lo bik, an ti. Zeisihmanh ah, Casino kal hi a tha lo taktak. Kal lo ding a si. Mi a lem tuk fawn. Voikhat kan timi te nih thih hlan lo ngol khawh ti lonak “addictive” a chuahter. Kuak zumi kuak loin an um khawh lomi he ai khat. Casino kal ruangah harnak phunphun ton khawh a si. Kan umnak hrawng homeless pawl hi, Casino kal ruangah khi dirhmun a phanmi an tam tuk. Casino cu, a cheu state ah kum 18 hnu in kal khawh a si. A cheu state ahcun kum 21 si a hau. Casino kal cu, tangka zeimawzat kan ngeihmi tein a miak tampi hmuh duh ah kal tawn a si. Nain, a awngmin mi an um theng lo. 

Kum fatin vawleicung mirum bikbik timi Forbes Magazine nih a thim hna tikah, Casino kalnak in mirum ai chuahmi ahohmanh an um lo. US ram ah rum kan duh ahcun a lam pahnih lawng a um. Skills (zungthiamnak) pakhatkhat kan ngeih le Financial Investment kan thiam lawng ah mirum ichuah khawh a si. Casino kalnak nih a lemmi hna tampi an um. Cu hna cu, an inn le lo ngeihchiah zong zuar dih cikcek tiangin Casino kal nih a lemmi an tam tuk hringhran. A donghnak ahcun Casino kalnak tangka an ngeih ti lo caah mithattu le mifir ah an ichuah theu. Cu bantuk thil voi tampi an ton tikah cozah nih an social security le ID tiang an chuh theu hna. A donghnak ahcun, homeless dirhmun ah ichuahnak a si. Homeless sinah kai volunteer tawn. An tuanbia ka hal tik hna ah thil pakhatkhat ah “addictive” a ngeimi lawngte an si. Mi tam deuh cu zuu, sii, le casino hi an si. Casino cu kal lo ding a si. Kan biaknak he zong ai kalh. Casino kal cu, tangka a miak hmuh duh ah kal a si. Cathiang nih tangka hi duh tuk lonak kong tampi a kan cawnpiak. Atu kan umnak Cincinnati ah Casino lianpi cu a um ve. Tuhi, kan fanau le hna an kal sual lai, tiah kan thin lawng kan i dawmh ko hih. (Hebrew 13:5, Phunthlukbia 23:5)

1 Timothy 6:10
“Tangka duhnak hi that lonak phun kip chuahnak hram a si. Mi a cheu cu tangka ngeih an duh tuk caah zumhnak kha an kaltak i harnak a phunphun an tong.”

Phunthlukbia 13:11
“Khulrang in hmuhmi rumnak cu a ziam zau, sihmanhsehlaw tlawmpal, tlawmpal tein khonmi cu a karhcho.”

El Clasico

Vawleicung bawlung team i a rum bik vevemi Real Madrid le Barcelona La Liga i an i ton paoh hi El Clasico ti cu a si. Vawleicung bawlung puai ah a laar bik. Champion League le World Cup final nakin an i ngeih deuh ti a si. El Clasico i goal sut tam bik cu Messi a si. Goal 21 a sut cang. Ronaldo nih goal 15 lawng a sut rih. El Clasico ah voi tam bik a chuihmi cu Xavi a si ve.

El Clasico cu, vawleicung khuazakip in million 500 nak tam nih TV in rak zoh cio a si. El Clasico cu voi 170 an chuih cang. Real Madrid nih voi 71 a tei. Barcelona nih voi 67 a tei ve. Voi 32 hi an i tluk.

Thaizing (11/21/15) Kick-off: 12: 15 Pm ET @ Santiago Bernabeu

Happy Veteran's Day !!

Thinphan dai loin kan ram ithimnak kong kan cuanh lio ah US ram mipi nih an sunhlawih ngaimi Veteran’s Day ai thawhkehnak tuanbia zoh hna usih.

Happy Early Veteran’s Day!!

Thaizing cu, Veteran’s Day a si. Sianginn cheukhat an khar. Company zong an khar khawh men. Mi tampi nih Veteran’s Day le Memorial Day hi zeidah an idannak a si ti kan fiang tawn lo. Cucaah cun, a tawinak tein an i dannak zoh tuah hna usih.

Halloween Tuanbia

US ram minung tampi nih an uar ngaimi holiday pakhat cu, Halloween hi a si. US ram chung i an uar bikmi holiday vialte lakah a Christmas changtu a si. Cheukhat nih cun Christmas nakin an uar deuh. October thla thok hrawng cun dawr kip ah khuachia thil lawngte in a khat. TV zongah khuachia zatkaa lawngte an chuah. Hallween cu khuachia muisam kengin zeipaoh ttamhmuih a si. Khrihfa kan biaknak he cun aa kalh ngaiin kei ka hmuh. Nain, Miraang nih an uar ngai. Puai (festival) an tuah i khuachia bantukin i hruk aih a si. Rawl hrawmnak hna an tuah i din le ei asi. Puai pakhat sawhsawh bantuk men khin an tuah men ko. Sihmanhsehlaw, Halloween ahhin zeiruang ahdah khuachia mui thengtheng in i hruk-aih le i thuam a si hnga tihi ruah lo awk a tha lo. Cucaah, a tawinak tein Halloween tuanbia hi zoh hnik usih. 

Primerica

NOTE: "This is a research paper that I wrote for my finance class. I got 45 out of 50 on this. If you are interest in pyramid scheme business or multi-level market, you should read it."

In 1965, Williams’ father suddenly died of a heart attack. He had a whole life insurance policy that left their family underinsured. Williams realized that people have no idea of such as product, believing that families were paying too much for whole life policies that left them poor in the wallet and deeply underinsured. Therefore, he joined his cousin at ITT Financial Services in 1970. Thus, his life was transformed.

US Mino Kan Dirhmun Ka Hmuhning

U.S ram hi March 13, 2008 ah Malaysia in ka rak phan. Atu ahcun kum sarih hrawng ka um ve cang. Hi chungah hin US ram khuasak a harnak tampi ka tem. Ahlei in, holh thiam hlan sianginn kai kha a rak si men lai. Hi kum sarih chungah hin harnak le nuamhnak tampi ka tong ve. Lungretheihnak zong a phunphun ka tong. Cun, keimah nun i chia in, US ram khuasami mino pawl kan nun zong khi ka zohziar ve tawn. Keimah le keimah kong hmanh aa ruat khomi ka si lo nain US ram mino pawl kan khuasakning hi ka ruat tawn ve. Apoi tuk ka timi an um i, a tha tuk ka timi zong an um ve. Tutan cu "apoi tuk" ka timi tial dingin ka lungah a chuak. Blog kan i tuahnak cu diary pakhat bantuk in kan hman pinah, kan lungchuak paoh tialnak zong a si ve thiamthiam ko caah ka tial ko. 

Coffee Din a Thatnak??

Tuni cu National Coffee Day a si. Coffee ding lengmangmi pawl caah cun lunglawmhnak nii a si ve. Zeicatiah, cheukhat coffee dawr tete ah alak (free) in va din khawh a si. Coffee cu zing fatin ding lengmangmi a si. A rim zong a thaw. Mitkuu hrionak zongah a tha i siangngakchia tampi hna nih cun coffee hi an din ngaingai. Coffee din loin a um kho lomi hna an um. Simanhsehlaw, coffee hi keicu ka ding bal loh. Ka duh lo ruangah si loin ka din khawh lo ruangtu ah a si. Ka din paohpaoh ah ka thintur i zan it kho loin ka um tawn. Sinain, tuni cu "National Coffee Day" a si caah coffee din a thatnak tete Huffington Post nih an tialmi ka van thai. 

Fale Cung i Nule Pa Hmurka

Zahan cu, kan Khrihfabu i inn cawmi hna nih inn luh thlacamnak an tuah i ka kal ve. Chung ka ttuan pah. Kan buai ngai. Tihaang hna ka suak, hnawm kan hlonh, rawl ka phaw hna, social worker phun khin a phunphun cu ka tuah i mipi an lunglawmhter kha ka i zuam. Keimah tawk cun ka va buai ngai ve. Zei pipa khi ka va tuah lem lo nain. Cuti kan buai lulh lio ahcun, pa pakhat nih a dawtmi a fanu te cung i a chimmi bia nih ka lungthin a ka tuaitaam taktak. Khua zaza hi a ka ruahter. Cu ka chungtuan chung cu ka ruat. Thlacam pumhnak kan tuah lio zongah ka ruat. Inn ka phak zong ah ka ruat. Ka ih lai ahcun ka ruat than chinchin. Zingka ka tho i ka ruat than fawn. A ruah in ka ruah cawk ve ti lo caah hika hin ka tial.

Eye Contacts Hmangmi Caah Ralrin Ding??

Voi khat cu kan Krihfabu in Picnic kan chuak. Mibu he kan si tikah lam hla ahcun kan chuak lem lo. Nau he zei he zong kan si fawn caah kan umnak pawng te i Lebanon Beach timi ah kan kal. Cuka hmun cu voi tampi ka kal bal cang nak a si. Midang caah cun an voikhatnak zong a si kho men. Cu nii cu nikhua a tha taktak. Cu tikah hawi le cio bang, ti an i lio nak ahcun ka vai i paih top ve. 

Social Medias (Facebook) Ahhin Kan Him Maw?

Laimi nih Social Network kan hmannak ahhin a biapi ngaimi i ralring awk thil tampi an um. Zumtu kan dirhmun in siseh, kan riantuannak company he pehtlai in siseh, kanmah pumpak kan himnak caah siseh i ralring awk thil tampi a um. Cucu, a tawinak tete in van tial chin lengmang ka duh hna. Kan hnu ah zumtu kan dirhmun in Social Networks i zoh dawh loin kan umnak tete ka tial. A reltu nan tam ngai i kaa lunghmuih tuk. A tutan cu riantuanmi nangmah le keimah nih kan tuannak company ah social network he pehtlai in i ralrin awk a herhmi thil tete ka van tial than. 

Laimi Nih Facebook Kan Hmannak Ah Ka Hmuhning

2010 le 2013 karlak hrawng ah ‘swag’ timi biatak tein a rak laar. Swag cu a tu chan mino nih a thei lomi kan um lai lo. Sinain, kan pale nih kan thei lo kho men. Swag cu huat tlai ngaiin thil hruk-aih khi a si. Fiangfai deuh in chim ahcun pa nih tumbul hna i tonh khi a si. Cun tthi lianlian hna i oih. Tatto tial viar i suai. Sam archuang phun in i meh. Bawngbi sau kan ttawk i fual nawn in i hruk le keden raangpi i hruk aih khi a si. Hihi a tam u (majority) in ‘swag’ timi le thil i hruk-aih ning cu a si ko. Laimi zong kan hmang ngai ve i a poi ngai. A hleice in Pathian thangthatnak hna kan kal i hitin kan i hruk-aih hi a poi khun.

US President Hlun Jimmy Carter le Cancer

Voi 39nak US president hlun Jimmy Carter nih naite ah cancer a ngeihnak kong mipi sinah a thanh. A cancer ngeihnak hi a thin ah a si. Tlamtling tein Atlanta, GA i Emory University siizungpi ah khuaihlainak (surgery) aa tuah. Amah zong a hnangam i ka dam ko lai, tiah aa ruah. Sinain, atu a cancer ngeihmi hi a pum chung i hmunhma dang zongah um a than. Thin cancer hi kan pum chung i hmunhma dangah a karh a fawi ngai nak hmun pakhat a si. 

Voi 39nak US president hlun Jimmy Carter (kum 91)

Crusade Dih Hnu Ah Pehzulh Awk Kan Rian?

Hi capar hi tial ka duhnak sau ngai cang. Tial ka timh lengmang ko nain zeitindek ka tial thiam bal loh. Ka lung a ka tuaitam lengmang fawn. Van tial lo ngaiin um dingah le ka siaherh fawn. Keimah ngakchia te nih van tial ding ah aa tlak hnga maw ti zong ka ruat ngai. Sinain, ka lung a um tukmi si ve caah ka tial ko. 

2 Korin 5:17

Obadiah Outreach Ministry (Mission in Bangladesh)

Rom 15:20 
"Ka saduhthah cu Khrih an theih bal lonak hmun i Thawngtha chim kha a si zungzal, zeicatiah midang i a hram an rak thawk cianak hmun i va sak cu ka duh lo."

Obadiah Outreach Ministry tuanbia tawi:

Saya Lal Thangzel cu 2009 ah India ah Bible sianginn kainak a dih. A rak tlung i Missionary riantuan hi a thinlung chungah a um. 2010-2011 chung Bangladesh ram i Rangamaty Hill Districs ah kan unau Chakma zum lomi phun sinah Thlarau tlaumi tleih ding le Pathian riantuan dingin a um. A karlak ah harsatnak tete a tong. Cucaah a bu in dirh hi a tha deuh lai i, ka riantuannak a ka bawmtu si lai pinah zum lomi tam deuh ka tleih khawh lai, tiin Obadiah Outreach Ministry/Mission cu a dirhmi a si. Hi bu hi, Pathian sinah thlacamnak fak piin ka ngeih hnu ah Pathian nih a ka pekmi a si, tiah a chim. 

Hi bu cu July 20, 2012 ah dirhmi a si. Hi bu hi, politics ah i telnak (involvement) zeihmanh a ngei lo. Chittagong Hill Tracts ah a ummi zumlotu pawl an Thlarau tlau liomi tlaih le a zumtharmi caah taksa le Thlarau thancho khawhnak dingin zohkhenhnak tuahmi zong a si.

Mawttaw Mongh Pah In Phone Dekmi Caah Ralrinnak

Cell phone tongh pah in mawtaw mongh hi ttih a rak nung tuk. Miraang le ram dang miphun zong kum fatin tampi an thi. A khawn zong an i khawng deng. Mino deuh ko hi upa nakin an tam khun. US ram mino 94% nih mawtaw mongh pah in phone deh ttih a nun an theih ko nain 35% nih cun an deh pah thiamthiam ko. Laimi zong hi kan hmang ngai in ka hmuh. I, cucu a tha lo taktak. A that lonak a ruang tampi lakah a buaktlak tein ka van char hna. 

Vawleicung Mi Sang Bik Sultan Kosen

Zahan ah umharphen rel nuam sawhsawh ah vawleicung a kuttin sau bikmi pawl tawi tein ka tial i careltu nan khuaruahhar ngai. Ai zumh lomi nan um len. Tutan zongah vawleicung ah a sang bik timi pa kong tawi tein ka tial than. A konglam tawite le a hmanthlak hi zoh ahcun zumh awk a tha ve hoi lo. Nain, a hman taktakmi a si. Guinness World Record nih vawleicung theih i an thanhmi cu zumh awktlak (reliable) mi an si.

Vawleicung ah a sang bikmi Sultan Kosen (8 ft 3 in)

Vawleicung Kuttin Sau Bik Chris Walton

Umharphen ah vawleicung i a kuttin (fingernail) sau bikmi Chris Walton hi van bih/rel ve. A kuttin hi 1993 in aa riam ti lo. kum 47 a si i, a sau taktak. 20-Feet tluk a sau. Cucaah, 2014 London i Guinness Book of Record an tuahmi ah vawleicung record in a kuttin sau bik ah a hung cang. 

Vawleicung i a kuttin sau bikmi Chris Walton 

Our First Gospel Of 2015 To Battle Creek, MI (BCBC)

Tutan zarh cu U.S ram Laimi Khrihfabu i mihlun bik, tiah ruahmi Battle Creek Baptist Church (BCBC) ah kan kal. A kal khomi dihlak 30 kan si. Khrihfa upa pathum le church pastor nih an kan zulh khawh caah kan i lawm ngai. Tukum chungah kan voikhatnak gospel (thawngtha chim) kan kal si caah kan i ngaih khun cio hna. Kan i timhtuahning zong a tha ve. 

BCBC mino le ZCBC mino

Palik Nih Tlaih Tikah a Herhmi Ralrinnak

Tukum hi zeitindek a si palik kut in mipi kan thi taktak. Tukum chung lawng hmanh hin minung 500 hrawng an thi cang. Kum dongh ahcun 1000 cu kan thi te la, tiah an zumh. Kum 2013 kum vial cun minung 461 lawng an thi. 2015 kum cheu i a thimi zat hmanh an tling lo. US palik pawl an riantuanning ttih a nung chin lengmang tinak a si. Hi a thimi hna hi a tam deuh cu palik nih tlaih tik ah biaalnak ruang le zaam ruang hin an si khun. Laimi US ram ummi zong hi an kan tlaih lengmang theu. Speed limit luan, stop sign ah tha tein dir lo ruang le zurit buin ningcang lo kan mongh ruang hin a si khun. Cucaah, palik nih an kan tlaih tik hin zeitindah kan um ziarziar lai i, palik (officer) pawl upat hmaizah bu tein kan chonh hna tihi ka tial duhmi a si. 

Ka Sianginn Kainak Palikpa Nih Minakpa a Kah Hramhram Ve

U.S ram palik pawl hi ttih an nung chin lengmang. Tu kum hi an zual khun. US ram state tampi ah palik nih mi an thah hna. An palh pek, palhlo pek ah an kah mei ko hna. A hlei in minak ko hi kah an tong khun. Micheu nih cun, "an si awk a si ko, minak cu hawi pei an lawh lo tuk cu" tiah an ti theu. Nain, Minak pawl hi an rak palh thlu ve loh. Palik pawl an riantuanning hi an rak hrokhrol tuk ve ko. Cucaah, US ram state dangdang ah buainak tampi a chuak. Missouri, New York, Baltimore le South Carolina ah minak pawl fak piin an rak buai len cang. Minak pawl nih, "Mithleidennak an kan ngeih" an ti. Mawtaw zong mei in an khangh dih. Dawr zong an den, an khuai. Khuachung bus zong lung tiangin an cheh i mipi biatak tein hnahnawhnak an pek hna. Meithal tiangtiangin a puahmi an um rih. Hi tlukinMiraang pawl nih Minak zei ruaram loin an kah hna ruangah buainak a chuakmi cu ka umnak le ka sianginn kainak pawngah a hung cang phut ve.

Palikpa le a kah hrammi Samuel DuBose 

Marcos Rojo: Manchester United in Dantatnak a Ing

A tuhi Europe ram club lianlian hna cu a ken kip ah khual an tlawn lio a si. A cheu Asia ram lei ah an kal. A cheu Australia lei ah. A tam deuh hi cu North America hin an ra. Hi lak ahhin, England ram i Premiere Title tam bik a lami Manchester United zong an ra ve. Tutiang an chuihnak ah a thiam bik zong an si fawn. North America an rat i bawlung an chuih tik hin chuih sawh in an chuih lo. Cuhmi an ngeih. Cucu International Champions Cup an ti. Kan hnu kum 2014 ah Man. Utd nih an rak lak. Tutan zong lak than dawh an si.

Marcos Rojo

A Biapi Taktakmi Jesuh Nawlbia 7

Nawlbia cu Miraang nih "command" an ti ko i, Lai holh in  "fial" le "nawlpek" ti a si. Jesuh nih nawlbia a kan pek tik hin hnek sawhsawh men dingah a kan pe lo. Nitin kan nun ah an biapit tuk caah "tuah uh" tiah nawlpekmi kan si. Fialmi kan si. Jesuh nih John 14:15 chungah, "nan ka dawt ahcun ka nawlbia hi nan zulh hna lai" tiah a kan chimh. 

Jesuh nawlbia hi a tor. 40-50 hrawng cu an si, tiah Institute in Basic Life Principle nih an chim. An dihlak tial ahcun a sau tuk lai caah a "biapi bik" ti ka ruahmi 7 in ka van char. Thlacamnak he rel law, thazaang rak la ve. 

Republican Party Donald Trump Nih Mexico-US Border a Va Zoh Cang!

A chim theu bang, tuni ah Donald Trump nih Mexico le US ram karlak (border) a va zoh. Donald Trump cu mirum taktak a si cu zapi nih kan theih dih cia a si. Forbes Magazines nih US ram chung i billionaire lawnte a rum bik tiah an ruahmi minung 400 an thim hna i Forbes 400 tiah min an bunh. Cu chungah anih hi 122 nak a si. A network hi Billion $4 fai a si ve. Amah nakin mirum tampi cu an um rih hme teh. Bill Gates hi atu lio i vawleicung ah a rum bik a si i a network hi Billion $81 a si. Microsoft company ngeitu a si. 

Republic Party: Donald Trump

Real Madrid Karim Benzema le Rihanna An i Duh

Vawleicung bawlung club team i a rum bikmi Real Madrid hmaikal Karim Benzema le vawleicung hlasak thiam Rihanna (Riri) an i duh. 

Karim le Rihanna hi, Kan hnu kum te khan aa thei cangmi an si. Tu chan cu Social Networks chan a si caah annih pahnih zong via Twitter in an i thei ve. Messege zong an i kua peng. An i pehtlai peng. Kanmah cio bang, hawikom an si hnu ah aa duhmi an si. Rihanna hi, tlangval tampi he aa duhmi a si. A puai ngai. Mitpar zong a ngei. Cheukhat minak pawl le bang nih, "million tangka na ngeih cun, Rihanna hi na co khawh la, tiah an ka ti tawn (capo in). Sinain, Rihanna nih Karim hi ka hawikom tha bik (best friend) tiah a rak chim. Cu hnu cun, tihin huam tein aa duhmi an si. 

Rihanna le Karim an vah lio

Sehtan Pa Kong

Zahan (July 16) ah kan Khrihfabu ah avoi (1)nak mino training kan tuah. Kan pastor Van Thuam Cin nih a kan cawnpiak. Ani khatnak lawng a si rih nain mino tampi nih kan i lunghmuih. Kan pastor pa zong minote a si pinah cawnpiak a thiam. A kan cawnpiak dingmi kong pawl hi nifatin kan nunnak le hi vawlei khua kan saknak ah kan i fian a herh taktakmi lawngte an si. I, zahan cu, sehtan pa kong cawnnak in kan thok. 

Ka Philh Khawhlo Dingmi CBCUSA P&W Concert le Youth Consultation

US um Lai mino hna hi kum khat hnu kum khat kan thangcho chin lengmang. Sport lei zongin kan thangcho. Naitan CYO final i Seattle le Amarillo an chuih hna cu Pro team bak an si ko. A zoh an dawh tuk. Fim cawnnak lei zongin kan thangcho. Tu kum chung lawng i CYONA nih thawng an thanhmi ah Lai mino chungin degree thatha a hmumi le scholarship tampi a hmumi an um. Min thatnak hmumi zong an tor rih. A sung lawi taktak. US Lai mino hna nih kan thanchonak a lam tampi lakah pakhat cu music lei hi a si ve. 

Thinlung dihlak in Pathian thangthat lio

Bible in Chiatha-khat Thitumhnak (same-sex marriage) Zoh Ve Usih.

June 26 ah chiatha-khat thitumhnak (same-sex marriage) cu US pumpi ah zalong tein tuah siseh, tiah rak onh cang a si. Ruah ah tuk a suk. Laimi tampi zong kan buai. Cu chinchap ah Laimi cheukhat nih "a tha ko" tiah hna a tlakpi mi zong kan um fawn. Hi kong he pehtlai in Facebook zongah mi tampi bia ai almi an um. An mawh lo. I al phute a rak si. A nungmi Pathian le Bible a zummi Laimi kan ca'h ko hin rak buaipi awkah a phu khun. 

USA Ram Hmai Hngaltertu US Nu Bawlung Team

US ram mipi hi bawlung chuih an thiam chin lengmang. Kum khat hnu kum khat zong an thangcho ve. Bawlung chuih a huam bal lomi zong an van huam chinchin. A zoh huam bal lomi zong nih an van zoh deuh cang. USA sport chungah a laar bikmi sport cu American football le baseball hi an si nain a tu ahcun bawlung chuih (soccer) hi American Football changtu a si cang, tiah ESPN nih an rak thanh bal. Naitan US nu bawlung team nih champion an van tlaih hnu in mipi tam tuk bawlung lei ah an tha an thawhter chinchap hna.

USA: 2015 FIFA Women's World Cup Winner

2015 CBCUSA Youth Department Nih An Tuahmi P&W Concert le Youth Consultation ah Sawm Nan Si!!

Tutan zarh nirukni July 11, 2015 cu kan umnak Cincinnati, OH ah CBCUSA Youth Department nih avoi (1)nak bik "P&W Concert and Youth Consultation" an tuah lai. Hi program ah USA um Lai mino vialte sawm dih nan si. A bik in, Cincinnati, OH i an tuahmi cu Ohio, Indiana, Kentucky, le Michigan hrawng i a ummi Lai mino hna caah timhlamhmi a si. Hi program chung i music a tum dingmi hna cu, CBCUSA Civuipi lio i a tummi hna le Cincinnati, OH music group pawl an si lai. Hi program cu tuan piin thawngthanh cangmi a si bantukin location tampi kal dingin timhlamhnak ngeih a si. I, cu khua (location) hna cu a tanglei hmanthlak ahhin zoh khawh a si. Hi kan program chungah hi ca a relmi nan dihlak le hi thawngpang a theimi paohpaoh cu nan rak kan talpi ve hrimhrim naklai Bawi Khrih minin kan in sawm hna.

Hringtu Pale Dawtnak le Hringtu Pale Hna Nii Aa Thawhkehnak Tuanbia

A hmasa bik ah "father" a simi hringtu kan pale nan dihlak upatnak kan pek hna. Pathian tu nih taksa Thlarau damnak le nun khuasaunak in pe ko hna seh. Nan kan dawtnak hi a thuk in a sang. Mi tampi nih nule dawtnak deuh hi a thuk khun le a sang khun in an ruah tawn. Nain, ruah riangmang tikah nan kan dawtnak hi an i tia veve ko. Cu silo, keimah tu nule dawtnak ka teh bal lo ruang ah dek asi hnga. Zeisihmanh ah, hla phuahtu nih a ti bang, "dawtnak lakah sang bik, Bawi Jesuh Khrih dawtnak, changtu kapa dawtnak" a ti bang khan a si taktak. Nan fale caah nan rethei ning hi hmur le kaa in chim khawh ding asi lo. 

Theihtlei: Rian Interview Kal Tikah a Herh Taktakmi Timhtuahnak

Rian caah interview kal cu zeitlukin naa timhlamh zongah thin a phang tawn. Nain, biatak tein timhlamhnak na ngeih ve ko ahcun na duhmi rian fawi tein hmuh khawh asi. Timhlamhnak ngeih hi an rak biapi taktak. Rian kan sok tikah rian ngeitu nih midang tampi an application le resume an rak chekhlat dih. Cu lak ahcun a tha, a rem bik la tiah an ruahmi minung paoh kha interview tuah dingah auh asi tawn. Interview tuah thawngin rian hmuh tinak a si lo. Interview an kan tuah tik i timhlamhnak zeihmanh kan ngeih lo ahcun adang interview an tuahmi hna nih an kan tei lai i, rian hmuhlo khawh a fawi te. Cucaah, zeitindah rian kan sok hnu i interview an kan auh tikah timhlamhnak kan ngeih khawh la timi tawi tein ka van thai. 

Cristiano Ronaldo Cu a Mualpho Taktak Cang Ko Hih!

Vawlei cung i bawlung a uar bik ram hi England asi. Clubs 42,490 an ngeih. Vawleicung ram ah England tluk in bawlung team (club) a ngeimi an um lo. Laimi zong hi sport cu kan uar bak. Ahlei in bawlung hi kan uar khun ve. A buaktlakin zapi nih kan thiam cemmi zong asi fawn. Sport thawngpang kan tial tik ah kan rel ngai tawn. Cucaah hi thawngpang tehi tial zong ka tim lemlo nain ka van tial than. 

Vawleicung model minthang Irina Shayk

US Ram Nihlawh Kong Tlawmpal

Kan theih lengmang bantukin, US ram khua cheukhat ah nihlawh tlawm tuk ruang i duhlonak a langhtermi hna an um. US ram hi, ram tha kan ti nain an nihlawh pekmi a tlawm tuk rumro. Ahlei in, Fast Food, le store riantuanmi hi a tlawm khun. Nazi pakhat ah dollars $7.25 ti te khi an hmuh. A tlawm taktak. Cu he pehtlaiin kan hnu kum khan duhlonak an rak langhter. A tlawm bik nazi pakhat ah $15.00 hmu dingin sandah an rak piah. Cheukhat khua nih a si kho lo an ti nain a cheukkhat nih cun an cohlan ko. 

IF YOU DIE TONIGHT? HEAVEN OR HELL?

Kan hnu zarh cu Owensboro, KY ah bawlung chuih ah ka kal. Karen pawl nih bawlungpuai an tuah i an ka sawm ve. Khua hmete si nain Kawlram mi an tam. Laimi zong tlawmpal an rak um ve. Miphun thleidang loin ahopaoh nuam tein lentecelh khawh si dingin an tuah. A nuam ngai nain a linh balte a lin deuh. 

Theihtlei: Lentecelhnak Tik i Ei le Din Kongah a Herhmi Ralrinnak

Sport lak i ka huam bik mi cu bawlung chuih hi asi. Ka ngakchiat tein kum 19 ka si tiang hrawng hi cu biatak tein ka chuih ve. Ka si khawh chungin ka zuam ve i high school, club, le scholarship zeimawzat hmu in college tiang ka chuih bal ve. Hi chungah ka  hmuhtonmi (experience) tampi a um. Cu a tampi mi lak i pakhat cu lente kan i celh lai i eidin kong hi asi. 

Exercise Tuah Cu Ngandamnak Lawng Si Lo; Nun Khuasaunak Zong Asi Chih!

Nun khuasau a duh lomi kan um la lo. Ngandam zong a duh lomi kan um la lo. Sihmanhsehlaw, nun khuasaunak ding le ngandamnak dingah a herhmi tuah cu kan huam hoi tawn lo. Miraang holh zong thiam cu kan duh ngang nain a cawn ka huam bak lo. Pastor nu pakhat nih a chim phun in, "a chunh in chunh kan hau tawn." 

2014 i Vawleicung Bawilung Chuih Thiammi Chungin Million Tangka a Hmu Bikmi Panga (5)

Vawlei cung sport ah a laar bik mi cu bawlung (soccer) hi a si. Vawleicung sport ai celhmi vialte zong nih tangka an hmuh biknak cu bawlung chuihnak hin asi. Cu he pehtlaiin nai ah Forbes Magazine nih kan hnu kum bawlung chuihmi chungin tangka hmu bikmi minung 5 an thim hna. Cu hna cu a tanglei bantuk in ka van langhter. 

5. Neymar Jr. (Barcelona) 

Hringtu Nu le Hna Nii Ai Thawhkehnak Tuanbia Tawi

Ai thawhkehnak (origin) taktak cu hlanlio Greek le Romans miphun hna sinin asi. Hi lio caan hin hringtu nu le lei he pehtlai in kum fatin puai an rak tuah i a caan cu atu tluk Spring hrawng hin asi. Kan nih cu a kan hringsortu kan nu le bak upat peknak le laksawng phunphun peknak kan tuah. Sinain hi hlanlio Greeks le Romans hna chan ahcun a hringsortu hna nu (mother) le hna kha si loin, an pathian nu (goddess) Rhea timi tu upatnak peknak caah an rak tuahmi a si. 

Manny Pacquiao Sungh Chinchap i Minchiat Cu Apoi Ko!

Pacquiao le Mayweather cu an i thongh hlan in vawleicung a tur. Zaapi nih kan ingaih i, a hngah kan hngak kho lo. Social network zongah anmah kong lawng te tial le rel cio asi. Hodah aitei te lai tiin tongte bawh in bawh cio asi. Pakhat le pakhat zong tangka tampi in ai betting (lawng) mi kan um lai ka zumh. Cheukhat riantuan mi zong vacation (day-off) tiang an la i an zoh ve. Vawleicung a turcawl ning le mipi kan i ngaih ning he tuak ahcun a phu tuk palia. Keizong ka rak i ngaih taktak ve. Amahbalte, Pacquiao sunghmi lam kha cu ka hacang kai rial, ka hmur kai bo i mithmai chia he inn ah ka lawi. Zeisihmanh ah, Paquiao cu ruah lo piin a sunghnak he petlaiin minchiatnak le mi nih ceihphai a tong. Social network ahcun Mayweather thawngpang a dai i, a sungmi Paquiao thawngpang tuhi a kenkip ah a leng. Cucu zei ko dah an si hnga van zoh hna usih. 

A Tuanbia Theih Awktlak Vawleicung Boxing Thonghthiam Floyd Mayweather

Boxing hi ka uar ngaimi cu a si lo. Ultimate Fighting Championships (UFC) tu hi ka rak deuhmi a si. Pakio ai thawng tiin mipi ankhuan ah zei ah ka rel theng lo. A sungh le a awn zong an chim rel tawn ko nain biapi ah ka rak chia lo. Mayweather zong hi hmuh pah tawnmi cu a si nain a min zong ka rak thei ve lo. Boxing ka uar lem ve lo caah khan a rak si. Pakio hi cu US kan phak ka tein ka rak thei cang nain Mayweather a min hi cu naite ceo in ka theih. Sihmanhsehlaw, tutan Pakio le Mayweather an turcawl ning ai dang tuk ka ti. Boxing a uar lem lo mi hmanh hitluk in kan lungthin an lak ahhin boxing uarmi chinchap hi zeitluk dah a va si hnga ka ti. News i an thawngpang ai tial zongah rel ta loin ka um kho bal lo. I ngaih zong cu a phu ve rengreng. Hi tluk in a tur i an thawngpang vawleicung vialte a hninh dihmi hi hodah i ngaih loin um kho hnga? Laimi nih kan thiam bak lo nain kan uar ngaimi si ve caah upa ngakchia tiangin kan i ngaih cu mu. Laimi thawngzamh hmanh nih khan tam tuk an van tial. Rel deuh paohah i ngaih deuh si hoi. Zeisihmanh ah, thil pakhat kan zoh tikah an konglam kan theih hna ahkhin thinlung a suk deuh khun tawn. A zoh zong a nuam deuh. Cucaah, Mayweather le Pakio an i thawng taktak cang lai ti theih si khan Pakio kong cu ka rak tial bal cang. Tutan cu Mayweather kong hi tial ka duh. 

Bawlung Chuih Thiam Gregory Mertens a Thi Cang

Belgian mi Gregory Mertens cu nikhatni (april 27) ahkhan bawlung an chuih lio ah ruah lo piin a tlu. Sau zong a chuih rih lo. Kawl thlen hlan minutes 30 hrawng a chuih ah si. Rianrang in siizungah an tlikpi ko nain an khamh kho lo. Cucaah tu zaanlei khan siaherh ngaiin a kan thi taak. A damlonak hi "Cardiac Arrest" timi lung zawtnak he aa pehtlaimi a si. Doctor te zong nih a dam khawhnak dingah an thiamnak dihlak an chuah ve ko nain an damh kho hlei loh. Mertens hi mino te kum 24 lawng a si rih. Hiti a damlonak hi ahohmanh nih an rak theih lo. Naite a chuihnak club thar Lokeren F.C zongah ngandamnak test an tuahmi vialte a awng dih ko ti a si fawn. Ruahlo piin hitin a tluk caah hitin thihnak tiang a tonnak hi a si. 

Gregory Mertens ref. google.com

Amah Biaknak Hmun a Tthial Lengmangtu Kan Pathian

Voikhat cu kan Khrihfabu ah khua dang mileng kan ngei i thawngtha a kan chimh. Cu thawngtha a kan chimhmi cu zeisi loin Pathian nih a umnak hmun a thial lengmangnak kong a si. Midang caah an voikhat theihnak si lai i an khuaruahhar ko men lai. Nain, kei cu ka khuaruahhar lem ti lo. Aruangcu, atu lio Pathian thawngtha chimtu i ka uar taktak mi le thazaang a ka petu bik tu  Rev. Hoi Cung Tum nih Australia ah a rak chim i YouTube in ka rak ngei cang. Avoi hnihnak ka ngeih si caah ka khuaruah har lem ti lo. Theih awktlak taktak a si, tiah ka ruah. Kan biakmi Pathian hi a tuanbia theih khawh chung thei dingin kan i zuam awk bak a si. Cucaah, cu hna pahnih Bible sianginn kai veve nih an kan chimhmi chung cun a tawi fiannak tein ka van langhter. Adongh tiang rak rel hrimhrim, thazaang na lak hrim ko la, tiah zumhnak ka ngei. 

Moses nawlbia 10 laknak le Pathian he an i chawnhtawnak Sinai Tlang

A Min Chim Hmanh Kan Ttihmi Cangvat Cu Japan Pa Nih a Zuat i athi Ai Dawpter

Cangvat cu na hmuh bal ko la. A hmu ballo mi kan um lai ka zum ruam lo. Atu ka van tial hmanh hin ka thlingzaa. Nu nih an hmuh paoh cun a veu bak in an veu tawnmi cangvat cu ka hmuh lengmang ve. Nain, hi bantukin a lian mi "Saicangvat" hi cu a voikhatnak ka hmuh bak a si. Ka khuaruah a har tuk caah tawi tein ka van thai. 

Bawipa Ram Kauhter Dingah Kan Kal

Kan hnu zarh cu ECBC, Columbus, OH ah thlarau lei ka u le nau hna he kan kal. Kan kal ka ti tikah kal sawh si loin Thlarau lei ka upa Saya Sailo Thang kan zul. A nuam taktak. Columbus Khrihfabu zong mi dawt an rak thiam. An rak kan don ning le an kan chawnhbiak ning kan hmuh tikah lawmhnak he kan khat. Anmah zong kan va phak lai an rak i ngaih tuk ve. Aruangcu, atu lio ah Pathian nih a hman taktak mi le Laimi nih hlasak thiam minthang pakhat kan i ngeihmi Emily Ngun Hlei Sung zong ai tal ve caah a si. Cu lawng hlah! Indianapolis CEBC nih an i bochan tuk mi le Amah Pathian bia zong a cawng/kai lio mi vaal Mang Ceu zong ai tal ve. Kan umnak Cincinnati, OH in Sailo he Indianapolis ah kan hei lakpah hna i ECBC Columbus, OH ah kan len. Cuticun, zaan hnih riakin Amah Pathian bia i ruahpah he nuam ngaiin kan kal hna. 

Joshua 1:9

"Keimah nih nawl kan pek a si lo mei? Tthawng ngai le ralttha ngaiin um ko; na thin phang hlah, na lung zong dong hlah; zeicatiah Bawipa na Pathian cu khuazeika na kalnak hmanh ah na sinah a um ko", tiah a ti."

Keimah, Emily, Sailo, le Mang Ceu

Theihtlei: Vawleicung Fahringmi Nu Lakah Ngakchia Bikmi (10) Hna

Vawleicung fahring mi hna lak ah kum no bik mi minung 10 Richest nih an taarmi hna ka van taar chin. Theihtlei le rel nuam ah ka ti. An kong hi rel tik hna ah khuaruahhar taktak an si. Ruah suaimai ahcun zumh awk ah an har ngai. A tanglei i a tawifiannak in ka van taar mi tete hi rel ve hmanh law na khuaruahhar ve theu lai dah. Ka siaremlonak pakhat balte cu an hmanthlak ka van taar thiam chih hna loh hih. 

Lina Medina

Europe Pumpululh Thawngpang le Theihtlei

Ronaldo thazing game a chuih kho than cang la. Spain le Germany ram ahhin "yellow card" voi 5 an ngah sual paoh ah game 1 bar lengmang tawn a si. Italy ram ahcun voi 4 "yellow card" ngah ah a si. Ronaldo cu nai April 08 an chuihnak ah avoi 5nak "yellow card" a ngah sual. Messi he goal sut tam biatak tein an i zuam lio i game khat van bar lai a ruah ah a lungrawk ngai. Amah chinchap a thintawi he ing-ai in ai ciah lai ti ka zumh. Zeisihmanh ah, Ronaldo cu an coah pa Carlos Ancelotti le Real Madrid president pa nih an va nawlpiak le a chuih kho than la. Hitin an nawlpiak mi hna hi "yellow card" an ngahnak aruang cu ti ngaiin an palh tuk lo ahcun an rak cohlan tawn ko. A luancia caan ah adang bawlung chuih minthang zong an rak nawlpiak tawn. Ronaldo ready ngaiin a ra dingmi thaizing April 11 ah a chuih ko la khah. US ram Eastern Time in cun zinglei 10:00 am Beinsport ah zoh khawh a si lai. 

Derby

Aluancia Caan i Palik Kut in Mi an Thihnak le Mr. Scott

Hi thawngpang hi kan hnu zarh Saturday April 04 ta a si. Tu lio thawngpang ahcun a laar pawl a si kan ti khawh. Aruang cu, palik pawl nih mi an thahmi hna hi a tlawm ti loh. Palik pawl nih mi an thah hna ruangah a luancia caan zongah buainak tampi a rak chuah kha kan thei dih theu lai. A luancia caan i palik nih mi an thahnak kong cu tlawmpal tete cio in atang lei hin ka van langhter. 

Mr. Scott le a Kaptu Mr. Slager