Halloween Tuanbia

US ram minung tampi nih an uar ngaimi holiday pakhat cu, Halloween hi a si. US ram chung i an uar bikmi holiday vialte lakah a Christmas changtu a si. Cheukhat nih cun Christmas nakin an uar deuh. October thla thok hrawng cun dawr kip ah khuachia thil lawngte in a khat. TV zongah khuachia zatkaa lawngte an chuah. Hallween cu khuachia muisam kengin zeipaoh ttamhmuih a si. Khrihfa kan biaknak he cun aa kalh ngaiin kei ka hmuh. Nain, Miraang nih an uar ngai. Puai (festival) an tuah i khuachia bantukin i hruk aih a si. Rawl hrawmnak hna an tuah i din le ei asi. Puai pakhat sawhsawh bantuk men khin an tuah men ko. Sihmanhsehlaw, Halloween ahhin zeiruang ahdah khuachia mui thengtheng in i hruk-aih le i thuam a si hnga tihi ruah lo awk a tha lo. Cucaah, a tawinak tein Halloween tuanbia hi zoh hnik usih. 

Halloween cu 'All Hallows' Eve' ti zongin auh a si. Hi puai cu, "Samhain" in aa thok. A luancia kum 2,000 hlan piin Ireland ram i Celts timi minung pawl nih an rak thok cang. Samhain ti a sullam cu, thal dih (summer ends) tinak a si i, khuasik aa thok cang lai tiah, puai an rak tuahmi khi a si ko. Cun, rawl riantuan caan a dih cang, saram le lo chungin a chuakmi (resources) paoh fimtawl caan a si cang tiah lawmhnak puai an rak tuah. Hi nii hi, a hlan lio Celtic mi pawl caah cun an kum donghnak nii zong a si fawn. Cucaah, mei an rak kau i, an rak i nuam hna. 

Khuachia thil in Halloween paoh ah i thuam a si nak cu hitihin a si. Hlan lio Celtic mi (Celts) pawl nih hin, hi an rawltuan caan donghnak zaan le an kum donghnak zaan puai ahhin, kum khat chung i a thimi pawl an thla kha upatnak an rak pek chih hna. Cun, hi zaan ahhin, anmah Celtic mi a thimi pawl an thla kha, an khua chung ah an vaak (an i chok), tiah an rak zumh. Cu an thla pawl cu, upatnak an rak pek hna bantukin an ei ding ah rawl, sa le meh thawthaw an rak chiahpiak hna. Upatnak nganpi he a si khawh chungin an rak conglawmh hna. Hitin kan upat hna lo le, zaan i an rak vah tik i an caah rawl thawthaw a um lo ahcun kum vui rawltuan tikah lo chung chuak a tlawm tuk sual la tihi an rak zumhmi cu a si. An thin rak phan tuk caah hi mithi thla pawl hi an rak sunhlawih ngaingai hna. (Hi an zumhnak hi, hlan lio ahcun fakpi in Khrihfami pawl he biadohnak zong a rak chuak, ti a si).

US ram ah ralpi pahnihnak hnu ah a rak phan ve. Kum fatin a million/billion dih in US ram chung minung nih an lawmh ve. Hi Halloween i an tangka dihmi cu, mutthai (candy), khuachia thil (costume) le adangdang herh ahkhin a si theu. Tukum (2015) i an Holloween a lawmmi nih tangka an dihmi dihlak fonh hin, billion $6.9 a si lai, tiah an zumh (CNN). 



Chirchanh: http://www.history.com/topics/halloween/history-of-halloween

http://www.livescience.com/40596-history-of-halloween.html

http://www.cnn.com/2012/10/30/living/halloween-by-the-numbers/