US Mino Kan Dirhmun Ka Hmuhning

U.S ram hi March 13, 2008 ah Malaysia in ka rak phan. Atu ahcun kum sarih hrawng ka um ve cang. Hi chungah hin US ram khuasak a harnak tampi ka tem. Ahlei in, holh thiam hlan sianginn kai kha a rak si men lai. Hi kum sarih chungah hin harnak le nuamhnak tampi ka tong ve. Lungretheihnak zong a phunphun ka tong. Cun, keimah nun i chia in, US ram khuasami mino pawl kan nun zong khi ka zohziar ve tawn. Keimah le keimah kong hmanh aa ruat khomi ka si lo nain US ram mino pawl kan khuasakning hi ka ruat tawn ve. Apoi tuk ka timi an um i, a tha tuk ka timi zong an um ve. Tutan cu "apoi tuk" ka timi tial dingin ka lungah a chuak. Blog kan i tuahnak cu diary pakhat bantuk in kan hman pinah, kan lungchuak paoh tialnak zong a si ve thiamthiam ko caah ka tial ko. 

Kawl ram le Malaysia lio tein US ram, US ram kan rak ti lengmangmi cu khuaruahar a si ko. An "system" a thatning le a felmi caah "opportunity" a tam ning hi a ropui kho tuk. US ram i a biapi bik tiah ka ruahmi cu pakhatnak ah Pathian theih le pahnihnak i dinfel hi a si. Pathian theih lole dinfel lo ahcun ta-rawng-sa (homeless) dirhmun ah phak khawhnak ram a si i, Pathian ttihzah tein le felfai tein khuasak ahcun billionaire tiang phak khawhnak ram a si ve. Cu chungah Laimi tampi khua kan sa hna. 

US ram i dam tein rian kan tuan khawh peng ko ahcun hawi hngar dingin kan um hraw loh. Dam tuhi a biapi. Equal opportunity ram a si bang, upa ngakchia ti loin kan nihhlawh hi an i zat ko. Nu zong cu thiamthiam. Tikah, ahopaoh nih hawi ngeihmi ngeih khawh dih ve a si. Cucaah cun, inn chungkhar ah siseh, nule va kar ah siseh, pale fa kar ah siseh, pakhat le pakhat i upatnak le i dawtnak hi a zor tuk hringhran. Cu tikah, thil tha lo tampi le buaibainak a chuahpi. 

US ram mino cu, high school kai chung hi riantuan lomi kan tam. Zeicatiah, mawtaw loin khoika hmanh kal awk a tha lo. Nule pa caah riantuan lawi hnu in don le thlah zong a fawi ve lo. Sianginn kai le nifatin a si caah cazoh deuh a si. Cu tikah, kan herhnak paoh ah nule pa nih siseh, ule nau nih siseh, hawile kom nih siseh, chungkhat salawh nih bawmhchanh lengmang a si. A kan bawmhchanh tik ahcun, kan upat cang hna. Kan hmaizah hna, an chimhmi kan ngai, i kan i tangtor kho tuk. Sihmanhsehlaw, kha vialte kha kan lungthin a rami an rak si lo. An kan bawmhchanh ruangah kan i tangtor le kan hmaizah bia hna sawhsawh lawng a rak si. 

High school kan van dih cio bak khin, US ram mino kan lungput cu "phut" tiah, aa thleng viar. High school kan kai lio ahcun nule pa kan dawt ngai hna. Kan siaherh tuk hna. Kan upat tuk hna nain, high school kan dih hnu cun nu nih va ngeih aa tim colhmi hna kan um. Pa nih nule pa chuaktaak i khuadang ah hawi he va nuamhseih a duhmi zong kan um fawn. Nule pa nih high school lio kum li chung an ka zohkhenh caah ka zohkhenh ve hna lai timi lungput a ngeimi kan tlawmte. Kanmah duhnak kha biapi ah kan chiah deuh colh i, hmur le kaa lawng in nule pa a dawmi ah kan i cang colh. 

Cun, high school kan dih bak in rian kan tuan. Nule pa le ule nau nih an hmuh zat kan hmuh ve. A rauh hlan ah mawtaw kan i cawk colh. Kan duhmi thil paoh kan i cawk. Tangka kan ngeih cang tikah khoika hmun paoh kan kal kho cang. Kan duhmi paoh kan ei, kan ding. Dam ko ahcun hawi hngar ding phun in kan um ti lo. Sinain, cheukhat cu nule pa bawmhchanh ve than aa timmi hrimrhim kan um loh. A ruah zong a ruat kho bak lomi kan um. Kan kum khua zong i zoh pah awk kan si nain nule pa nih nazi pakhat $8.00 an hmuhmi tein rak ka cawm hna seh ti khi kan duh peng rih. Cucaah, tla dedua in khua kan sa peng.

Cheukhat cu rian kan ttuan i kan awngmin ngai. Cu tikah, kan chungah porhlawtnak ruahnak tha lo a rak lut colh. Mi zeihmanh a herh ti lo ding khin kan um. A hlan lio i nule pa le, ule nau hawikom rual nih an kan dawtnak vialte kha kan philh dih colh. Cucaah, ahohmanh upatnak kan ngei kho ti hna lo. Inn chungkhar cu um rih seh, Khrihfabu chung i hruaitu zong zei ah kan rel thiamthiam hna lo. Nule pa nih kaa khat an kan sikah a hlirh in kan i hlirh colh. Ngakchia bik zong nih zei hlei lo. An kan sik zat in bia kan leh ve hna. Mi chimhmi kan i nautat pinah kanmah lung lawng kan i rinh theu. High school hrawng kan rak kai lio i an kan dawtnak vialte kha kan philh dih. Kan caah an lungretheihnak vialte le an thaditnak vialte kan philhpiak khawh colh hna. Cucu, khua ka ruah ve tawn i apoi tuk ka ti tawnmi a si. 

Hi ruangah hin, Laimi tampi kan inn chungkhar ah siseh, Khrihfabu i hruainak ah siseh buainak tampi a chuah tawnnak khi a si lai, tiah ka ruah. Pathian nih aa tluk tein a kan dawt dih. Ahohmanh Pathian nih a kan thleidang lo. Cucaah, Amah a zummi nih Amah bantuk lungput ngeiin kan um awk a si. Community le organization bantuk i thanchonak lam ah a biapi ngaimi pakhat cu "mutual respect" timi khi a si. Equal opportunity ram i kan um zongah, kan community le kan chungkhar cu kan i hrawhter awk a si loh. Zeitindah, miphun dang kan tei khawh ve lai hna lai i, kan community, kan chungkhar le kan miphun hi kan sersiam lai titu kan ruah awk a si deuh!