Vawleicung Mi Sang Bik Sultan Kosen

Zahan ah umharphen rel nuam sawhsawh ah vawleicung a kuttin sau bikmi pawl tawi tein ka tial i careltu nan khuaruahhar ngai. Ai zumh lomi nan um len. Tutan zongah vawleicung ah a sang bik timi pa kong tawi tein ka tial than. A konglam tawite le a hmanthlak hi zoh ahcun zumh awk a tha ve hoi lo. Nain, a hman taktakmi a si. Guinness World Record nih vawleicung theih i an thanhmi cu zumh awktlak (reliable) mi an si.

Vawleicung ah a sang bikmi Sultan Kosen (8 ft 3 in)

Vawleicung ah a sang bik timi pa cu Sultan Kosen a si. Turkey miphun a si. December 10, 1982 ah Turkey ram ah a chuak. A sang tuk ning hi khuaruahhar a si. Pe riat le lehmah pathum (8 ft 3 in) a sang, tiah Ankara, Turkey ah 08 February, 2011 ahkhan Guinness World Record nih a fehter. 

Sultan hi 2009 ah vawleicung ah a sang bik, tiah an rak thanh cang. Cun, 2009 le 2011 kar ahhin lehmah pahnih a tthangchap hoi. 2009 ahcun, pe riat le lehmah pakhat ( 8 ft 1 in) lawng a si i, vawleicung ah a sang bik a rak si cang. Sultan nih Taluk pa Xi Shun pe sarih le lehmah pariat fai (7 ft 8.95 in) a sangmi pa cu a tei. 

Vawleicung a sang bikmi pa Sultan Kosen hi a tungtai san lawng si loin a kut caang zong an rak lian kho tuk. A kut hi, vawleicung kut ah a lian bik zong a si chih. A kut cu lehmah 11.22 (28.5 cm) tluk a sau. Cucu, a kut hliahcaang (wrist) in a laibawi (middle finger) tiang a si. 

A ke zong hi vawleicung ke ah a ngan bik a si hoi. A kehlei ke cu, pe khat le lehmah 2 (1 ft 2 in) a sau. A ngan. Cucu, a kehliahcaang in a kutdong par tiang a si. Amah zong hitin vawleicungpi theih in tungtai san le kutcaang lianh lei ah a laar tukmi hi a khuaruahhar ve. Amah le mah hmanh aa zumh kho tuk ve lo. 

Sultan hi amah duh in hitin a tthangmi a si lo. Sii a ding ruang zongah a tthangmi a si lo. Zawtnak "pitutary gagantism" timi a ngeih caah a si. Hi bantuk zawtnak a ngeimi cu vawleicungah a tam lem lo. Hi nih a chuahpi mi cu minung kan sining tawkin tthan sual le lianh te pawl khi an si. 

Pituitary gland cu kan thluak hram i a ummi titsa bo te khi a si. Cucu a kuai tik le aa rawk sual ahcun minung hi khuaruahhar in a hme kho, cusilo, khuaruahhar in a ngan tuk kho. Cucu, hi Sultan Kosen nih a ngeihmi a si. A cheu hi bantuk zawtnak ngeimi hi an kut lawng zong a ngan tuk kho. An ke pi lawng zong a ngan tuk kho. 

Sultan hi kum hra a si hnu in hitin tthan sual aa thokmi a si. Nain, US ram University of Virginia ah August 2010 ah surgery (pum khuaihlainak) an tuah i a tuhi a tthan cu a pit cang, ti asi. (Pit hlah seh law, zeitluk tiang dah a va san hnga!) 

Sultan unau hi panga an si. Pa pali le ni pakhat an si. Adang a chungkhar hi cu kanmah bantuk minung an si ve. Hringtu a nule apa zong normal sawhsawh te an si. Amah tu hi zawtnak a ngeih ruangah hitin a tthang sualmi a si. Sultan hi a a sang tuk nain nupi zong a ngei thiamthiam ko.

Sultan hi a sang tuk ruangah harnak tete a ngeihmi a um. Sianginn zong a dih kho lo. Nain, a chung le hi lo (farmer) tuahmi an si caah a si khawh chung cun a bawmh ve lengmang hna. Cun, a nih hi hawi leiin a san tuk caah thilhruk aih kongah a buai kho tuk. Keden denh kong zongah a buai ngai fawn. A san a tthatnak pakhat cu thlalangawng le innka puanzar tuktak ah a thahnem ve. Van i miti thlai zongah a thahnem fawn. Sultan cu, kanmah cio bang hla ngeih le computer chungin game i kah le movie zoh hi a huam bikmi an si. 


Chirchanh: http://www.guinnessworldrecords.com/world-records/tallest-man-living