Crusade Dih Hnu Ah Pehzulh Awk Kan Rian?

Hi capar hi tial ka duhnak sau ngai cang. Tial ka timh lengmang ko nain zeitindek ka tial thiam bal loh. Ka lung a ka tuaitam lengmang fawn. Van tial lo ngaiin um dingah le ka siaherh fawn. Keimah ngakchia te nih van tial ding ah aa tlak hnga maw ti zong ka ruat ngai. Sinain, ka lung a um tukmi si ve caah ka tial ko. 

2 Korin 5:17

Laimi hi Pathian a duhmi miphun pakhat cu kan rak si. Hihi miphun dang nih an kan tluk lo biknak pakhat a si. Ka lunghmuih tuk. Pathian a duhmi miphun hi vawleicung miphun vialte ah thlachuak bikmi an si. Laimi cu kan phaknak hmun paoh ah pumhkhawmhnak kan ngei peng. Mi tlawm le a tam ah kan buai lo. Ttingtang um lo zongah kutbengh in a dongh tiang kan i pum ko. Thawngtha kan chimh khawh lo zongah Bible lawng kan rel ko. Khua pakhat ah mi kan van karh deuh si le Khrihfabu kan dirh colh. Pastor tha tein kan lak. By-law kip kan suai i, cuticun Khrihfa bu tein kan i hruai. Hi bantuk miphun hi Pathian nih phil awk kan tha loh. Pathian a neihmi cu Pathian nih a neih ve hna. 

Khrihfabu cu dirh a si tikah Thlarau ti le rawl i hrawmttinak (crusade) hi tuah cio a si. Kum khat ah Khrihfabu pakhat nih voi 2 tal cu a tlawm bik an tuah. Kan Khrihfabu nih kan tuah lo lio caan te ah kan pawngkam Krihfabu nih an tuah i kan vai i pum thiam. Pathian bia kan ngai. Kan pale Pathian mi hman pawl cu a kenkip in kan cah hna. Lairam, Europe, Australia, le Malaysia in kan cah hna. Thlarau tile rawl cu an kan tuh i a nuam taktak.

Crusade chung cu Thlarau ti le rawl khim tein an kan pek tikah Thlarau in kan khat cio i a nuam ngai. Pumh khawmh kan tui. Hlasak a nuam. Thanghnak kan hmuh. Kan i hliphlau. Kan nun a zaang. Thlarau bia le hla lawngte he chun zaan in kan i ciah tikah pumhkhawmh a dih manh hmanh kan thei lo. Cutluk cun, kan nun ah tthanghnak (revival) a um i kan piangthar. Sinain, evangelist pawl an kal dih hnu cun kan tlu dih. Kanmah ning viar kan si than. Tehte khawngmi zong kanmah ning thiamthiam kan si. Cucaah, tangka tampi dih in crusade kan tuahmi hi pakpalawng an si than lengmang tawn. Zarh khat hnih ca'h te lawng a nguh. Sicun, zeitindah crusade kan tuahmi nih mipakhat caah miaknak taktak a chuahpi khawh lai?

Zeidang tampi chim a hau loh. Crusade i kan tuahmi "PEHZULH" kha a si ko. Crusade ah zeidah kan tuah tawn? Thinlung takin Pathian kan tthangthat. Kan laam. Pathian bia kan rel. Pathian bia kan ngai. Thla kan cam. Cute lawng cu a si ko. Crusade chung cu evangelist phungchimtu pawl he an si tikah kan thatho i Pathian bia le hla le thangthat hi kan tlaichan ngai. Kan Krihfabu an kan kaltaak dih le cangka cun ka dul dih than. Hi ruang hin, Laimi nih Pathian kan duh tuk ko nain a bia rel, amah thangthat le thlacam hi kan "PEHZULH" lo ruangah kan nun hin thanghnak taktak  a um kho tawn loh. 

Cucaah, crusade tuahnak a dih hnu hin atu ka chim mi pawl pehzulh ding hi an biapi tuk! Kan pehzulh lo cun zeihmanh kan si thai bal lai loh. Crusade voi thawng khat hmanh kai usih law kanmah ning peng kan si ko lai. Atu ka van chimmi kan pehzulh ding a si lo ahcun crusade zong hi kai lo ding a si. Crusade tuahnak ah tangka zong a paam. Mahnak cun Lairam misifak le ngakttah buangro hmanh kuat ding a si. Cusilo, mission hna thlahnak ding a si. Cikhat ca'h menmen i pianthar cu a miaknak a um ttung lo. Tukforhnak ah kan tlu than lengmang ko lai. A hlan kan nunning in kan nung than ko la. Zeicatiah, Thlarau ti le rawl din ei cu pei kan pehzulh khawh lo cu. Crusade lawng hme kan i rinh cu.

Nifatin in Bible hi kan rel lengmang la. Chun zongah rel ding. Zan zongah rel ding. Kan um sawhsawh zongah rel lengmang ding. Rev. Za Kian nih,"Bible cu Pathian cakuat a si. Kan rel deuhdeuh paoh ah thazaang kan ngah i, Thlarau in kan khat deuhdeuh ee" a ti. Cucu keimah zong nih tehte ka khan khawh vemi a si. A bia hi rel lengmang ko. 

Pathian thangthat daithlan bak lo ding. Pumhnak caan lawngah Pathian thangthat a si loh. Kanmah lawng kan um caan zongah Pathian thangthatnak hlasak i laam ding a si ko. Kan riantuannak zongah a thangthatnak hla sak i thangthat sunparnak pek lengmang ding a si. Hla kan sak tikah Sunparnak vialte hi Jesuh nih a co. Hlasak hi a rak biapi tuk. 

Thlacam hi a biapi taktak fawn. Jesuh nih a zultu pawl kha hitin a ti hna. "tukforhnak chungah nan luh nakhnga lo hngilh lo tein um u law thlacam tuah uh. Thlarau nih cun a huam ko, sihmanhsehlaw titsa cu a der" tiah a ti (Matt 26:41). Thlacam nun ngeih cu vawleicung ah a tha bikmi a si. Thlacam cu Pathian he i chawnh i lungduh siaherh biaphai khi a si. Khrihfami hna nih kan Satan pa raldohnak ah kan hriamnam tha bik cu "thlacam" hi a si. Thlacam zungzal ding. A biapi tuk. 

Hi thil pathum te hi crusade a dih hnu ah pehzulh khawh i zuam lengmang hna usih. Kan pehzulh lo ruangah dawh kanmah ning lengmang kan si than cu. Hi thil pathum te hi crusade dih hnu ah nifatin in kan pehzulh lengmang ahcun thlarau he kan khat lai i, teinak taktak kan hmuh ko lai. Kan crusade tuahmi zong hi sullam tampi a ngei lai. Miaknak a um lai. Hi thil pathum hi nifatin kan nun ah ngeih peng hi kan ram le kan miphun nih fimnak nakin kan herh deuh. Degrees thatha tampi nak zongin kan herh deuh fawn. Sui ngun chawva le rumnak nakin a let tampi in kan herh deuh. 

Matthai 6:33

"Cucaah zei dang vialte nakin Pathian Pennak le zeidah tuah hna seh ti a kan duhmi kha biapi deuh in ruat ulaw thil dang vialte hna zong hi an pek thiamthiam ko hna lai."