US President Hlun Jimmy Carter le Cancer

Voi 39nak US president hlun Jimmy Carter nih naite ah cancer a ngeihnak kong mipi sinah a thanh. A cancer ngeihnak hi a thin ah a si. Tlamtling tein Atlanta, GA i Emory University siizungpi ah khuaihlainak (surgery) aa tuah. Amah zong a hnangam i ka dam ko lai, tiah aa ruah. Sinain, atu a cancer ngeihmi hi a pum chung i hmunhma dang zongah um a than. Thin cancer hi kan pum chung i hmunhma dangah a karh a fawi ngai nak hmun pakhat a si. 

Voi 39nak US president hlun Jimmy Carter (kum 91)

Tuni ah Guardian le adang news pawl nih Jimmy Carter cancer kong ruah lo piin an van tial than. Carter nih melanoma timi cancer a thluak chung ah hmunhma pali in an hmuh, an ti. Melanoma cancer cu kan vuncuar (skin) lei he aa pehlaimi a si. Minung vuncuar cung i a ummi a nakmi te zawngte khi a si i cancer a chuahpi tawn. Kum upat hnu hin aa sem duh hoi. Hi bantuk vuncuar cancer hi a tam ngai. A case hi kum fatin 200,000 in million 3 lengmang siizung a phan. Vuncuar lei he aa pehtlaimi cancer ahcun ttihnung bikmi a si, tiah skincancer.org nih an chim. 

Carter nih cun "a si khawh chung in hi cancer hi kan doh ve lai. Kaa thlawpbulnak kan pehzulh peng rih ko lai i hi cancer hi kan tei lai ko lai," tiah Atlanta, GA i Carter Center ah a chim. Carter cu kan hnu zarh ah a thin (liver) i a ummi cancer tthang lo dingin an lakpiak ko. Nain vanchiat ah adang vuncuar cancer zong an hmuh than ve. A caah ngeih cu a chia ngai lai. Zeicatiah, tlamtling tein a thin i a ummi cancer van lakpiak dih hnu i a thluak chungah melanoma cancer hmun li an hmuh than mi cu, minung sinak in tuar a har ngai lai. Amah zong nih a rak i ruah lo ngaimi a si ve mah hi. 

A vuncuar i a ummi Melanoma Cancer

Zeisihmanh ah, atu tiang ahcun ka dam tuk rih ko. Zeihmanh ka taksa zong an uai/der loh. Ka pum zong nih tuah khawh lonak zeihmanh ka ngei rih lo, tiah a chim. Ka nunnak Pathian sinah ka chanh. Hmailei zeibantuk thil a ra ding paoh ton dingah timhcia ka si, tiah a chim rih fawn. 

Carter te chung hi cancer zawtnak in an rak thi ngai. A far le pahnih le a upa zong pancreatic cancer in an rak thi. Pancreatic cancer hi bawpi lei he aa pehtlaimi a si, tiah ka ruah. 

Hi US president hlun Jimmy Carter hi mi a bawmchan ngaingaimi a si. Atu zong hi tluk in a dam lo ko nain aralaimi November thla ah Nepal ram kal dingin aa tim peng rih ko. Nepal ram le ramdang hna ah sifakmi hna nih dornak an ngeih lo tikah inn le lo pawl khi a sakpiak tawn hna. Mi cungah zaangfahnak le dawtnak (humanitarian) a ngei ngaimi a si. 

Jimmy Carter a chuahkehnak hi Plains,GA ah a si. Democrat party in US president kum 4 chung a tuan. 1977 in 1981 tiang. Amah hnu hin Ronald Reagan nih a van chawn ve. US president in aa dinh hnu ah a nupi Rosalynn he Carter Center timi Atlanta, GA a rak dirh. Miaknak um bak loin mipi caah riantuantu buu (organization) pakhat a si. 2002 ah hi an riantuannak he pehtlai in mintthatnak Noble Peace Prize an rak hmuh bal. 

Hitluk in micungah dawtnak a ngeimi president bantuk hi tampi kan herh. Hi bantuk mitha le mi cungah i zaangfah dawtnak a ngeimi hna nih hitin damlonak an ton cu hohmanh kan lung a nuamh cio lai ka zum loh. Thla tu campiak cio 
hna usih. 

Chirchanh: http://www.theguardian.com/us-news/2015/aug/20/jimmy-carter-cancer-spreads-brain
http://www.theguardian.com/us-news/2015/aug/12/jimmy-carter-reveals-cancer