Our First Gospel Of 2015 To Battle Creek, MI (BCBC)

Tutan zarh cu U.S ram Laimi Khrihfabu i mihlun bik, tiah ruahmi Battle Creek Baptist Church (BCBC) ah kan kal. A kal khomi dihlak 30 kan si. Khrihfa upa pathum le church pastor nih an kan zulh khawh caah kan i lawm ngai. Tukum chungah kan voikhatnak gospel (thawngtha chim) kan kal si caah kan i ngaih khun cio hna. Kan i timhtuahning zong a tha ve. 

BCBC mino le ZCBC mino

Zankhat riak in kan kal. Zahan zing 11:00 am hrawng in kan i thawh i zaanlei 4:30 pm ah Pathian lam hruainak in kan phan. A neih le hlat cu a zatawk bak a si. Zan khat riak in kan kal seh ti ahcun hi tluk hrawng hi a tha. A neih tuk zong hi a nuam lemlo i a hla tuk zong hi a rak tha lem loh. Sinain, zeidah a biapi bik tiah cun zei Khrihfabu nih dah Pathian thawngtha chimh an herh bik tihi a si. Thazang pek a herhmi paohah gospel cu kal ding a si. Mino an tamnak, a khuapitnak, nungak an tamnak, kan hawi le an tam nak tihi an rak biapi lo. Zeicatiah, gospel kan kal kan ti cu Pathian thawngtha chim le aupi pei a si ko cu. 

Battle Creek Baptist Church Biakinn

Battle Creek, MI khua cu khuate ngai a si. Nain, Laimi an tam ial. A thawng leng in a um. Falam, Tidim, Hakha, Thantlang, le Zophei an um. Hakha le Thantlang deuh hi BCBC cu an si. An pastor cu Rev. Dr. Cung Lian Hup a si. Member 400-500 karlak an si. Mino an thazaang a der ngai, tiah an kan chimh. Thazaang pek ngai an hau. Ahopaoh nih va tlawng khawh zuam hna usih. Falam le Tidim lei hi an tam ngai ve i an i tthek ngai, an ti. Falam hna cu bu nga bu ruk hrawng um dawh a si. An tam ial. Cusilo, bu maw an rak i tthen ngai ve zeidek. 

Parking Area

BCBC cu anmah biakinn te an i ngeih cang. An biakinn hi a hme deuh an ti nain a rem ngai. Biakinn tang Hall le bang cu special a si. Parking hmun zong a rem ngai in ka hmuh. A biakin chung hi cung he tang he thutnak a um. A hmun zong hi khua kil deuh te khin a si caah Laimi kan caah a rem khun. Laimi cu Miraang lak sin thutdir le cawlcangh hi kan thiam tuk rih lole a kil ne deuh ah khuasak hi kan herh. 

Kannih kan Khrihfabu hi Zion Chin Baptist Church ti a si. Cincinnati, OH le Northern Kentucky ummi Laimi he cawh in dirhmi a si. Atutan hi kan voikhat gospel a si. Kan i ngaih ngai nain khat lei cun kan voikhat nak a si caah thin zong a phang pah deng bantuk khin a um. Sihmanhsehlaw, hi Bible ca caang nih hin thazaang a pek than lengmang caah Pathian a min ka thangthat! 

Joshua 1:9

"Keimah nih nawl kan pek a si lo mei? Tthawng ngai le raltha ngaiin um ko; na thinphang hlah, na lung zong dong hlah; zeicatiah Bawipa na Pathian cu khuazeika na kalnak hmanh ah na sinah a um ko," tiah a ti. 

Kan voikhatnak a si ko nain kan program a kalning ka hmuh tikah Pathian nih a kan umpi hrim ko, tihi ka hmuh. Kan nau le zong caan hmang bal lo deuh mi tete an si ko nain an ral tha. I palhnak le mualphohnak a um sual hraw lo. Bawipa thawngin a si ko. Hi bantuk khua leng chuah i caan hmannak ahcun "Ralthat" hi a rak biapi taktak. Tuchan ahcun mino tete ko hi kan ralthat i Amah Pathian bia biatak tein kan aupi a herh khun. 

A chung

Keizong biatawi chimnak caan ka ting ve. Ka chimmi cu "Hodah a Kal Lai?" timi a si. Matthai 28:19,20, Johan 4:35 le Exodus 17:8, le Rom 12:2 chungin a si. Ka chimmi a tawinak tein van nolh ka duh. Careltu nih thazaang van la ve uh. 

Jesuh nih vawleicung khuazakip ah kal in a thawngtha aupi dingah a kan fial. A fial in fialmi kan si. Vawleicung miphun vialte hi a zultu ah ser in Pa le Fapa le Thiangthlarau min in tipilnak pek ding zong a kan fial. Laimi kan boruak in hi khuazakip kal in a thawngtha bia aupi ding a fawi rih lo. 

A hmailei in

Vawleicung ahhin ram 195 a um. Holh in holh phun 6,500 kan ngeih (Tuluk holh hi a laar bikmi a si). A minung lurel in cun billion 7 kan um. US ram chung lawng ahhin million 318 kan um. Cucaah, hi khuazakip kal in Jesuh fial bang a thawngtha aupi ding cu a fawi rih lo. Nain, million 318 hrawng umnak US ram ah aupi ding hi a biapi taktak ve. 

Carson le Laura tuanbia zohta hna usih. Carson le Laura cu March 15, 1899 kum ah Hakha khualipi an rak phan. Hi lio hin Carson hi kum 26 a si i Laura hi kum 25 a si. An no taktak. Carson le Laura hi US ram Laimi bantukin nuam tein khuasak khawh an si tuk ve ko. Inn le lo thatha ngei kho an si ve. Mawtaw thatha zong i cawk in tefe tampi a ngei kho an si ve. Sinain, an umnak rampi cu kaltaak riangmang in Lai miphun zeihmanh a hngal lomi nang le kei sinah an rak ra ko. 

Hi lio ah Laimi kan konglam tam chimh hau lo. Thing le lung kan rak biak. Ei ding le ei lo ding hmanh kan rak thei lo. Zuu kan rak ser i khuang in a rak laammi kan rak si. Sihmanhsehlaw, hi hna nupa thawngin tuni ah Laimi nih ceunak kan hmuh. Anmah thawngin Jesuh dawtnak kan theih. Pathian thluachuah a kan tincotertu zong anmah nupa hin aa thawk. Laimi kan caah philh khawh lo dingmi an si. 

Nang le kei zong tuni ah minote si hmanh usih law, Carson le Laura bantukin Pathian thawngtha bia kan aupi ve khawh ve. Aupi hrimhrim kha a tu ahhin a herh tuk cang. Jesuh fialmi zong a si fawn. Cucaah, Lai mino hna tho cang tuah! Na fimnak le na thazaang Bawipa ram kauhnak caah hmang hna ve cang. Carson le Laura an miphun an tlau tuk cang hih. Jesuh nih nang le kei a kan herh! American miphun an rawkral tuk cang! 

Biakinn tang hall a si. A kau taktak. 

US ahhin Protestant timi biaknak buu nganpi a um. Hi nih hin biakinn 2500,000 an ngeih. Cun, biakinn 200,000 tluk hi a thangcho lei penh bak lomi an si. Pinah, a ttumchuk lei lawngte a penhmi an si. Cucu 100% chungah 80% an si. Kan hnu kum (2014) lawng ah biakinn hi 4,000 in 7,000 karlak an khar ti a si. Tukum chung hin biakinn 8,000 in 10,000 karlak hi an khar khawh men, tiah zumh a si. An khar ti duhmi cu, ai pummi minung an um ti lo caah biakinn zuar le ttheh baoh ton khi a si. 

Biakinn ah mino aa pummi an um ti lo. Tar lawngte an si. An tar pawl zong hi a hlan lio Pathian duhmi lawngte an si. An thih dih caah hitin biakinn khar le zuar an tonnak zong hi a tam deuh cu an si. Ka riantuannak ka hawile hi ka hal tawn hna i biakinn a kalmi an um rih lo. Pakhat hmanh an um sual loh. Zeitluk ngeichia le lungrawk dah a si. Biakinn an penh ti lo caah na ruahning lawngte in an kal cang. An i nuamhnak lawngte an ruat. "Freedom le what makes me happy" timi ahhin an pil tuk cang. Vawleicung ah ram tha bik, tiah cho zoh in zohmi US cu atu ah vawleicung ram i fihnungmi ram pakhat ah aa cang ve cang. Same-sex mirriage an pom cang. Sodom le Gomorrah khua ah an ser cang. Pathian zummi zong an pial viar cang ee. Lai mino hna tho cang usih! Kan zoh sawh ko hna la maw?! Carson le Laura nih a rak kan zoh ve ttung lo?! An nunnak tiang pei an pek kha!? 

US ram cu vawleicung ram tha bik, tiah kan ruah lengmangmi hi kan palh. A hlan lio cun an rak si ko nain atu cun an si ti lo. Vawleicung chawva lei rumnak in kan zoh tikah ram dang nih an tei tuk cang hna. Vawlei fimnak le bang cun chim awk an um ti lo. Asian mi nih kan tei tuk cang hna. Military lei zong in anmah tluk ram thawngthawng an chuak chin lengmang cang. Biaknak lei le bang cun chim awk zeihmanh an um lo. An muih in an muih. Hlan ahcun vawleicung ram kip ah missionary a thawng in a thlahmi ram an si nain atu ahcun missionary thlah a herh bikmi ram ah a hun i cang cang. Tuni ah Laimi zong hi Pathian nih hi miphun caah missionary an kan thlahmi kan si. Jesuh nih a chimmi bia ka duh tuk. 

Johan 4:35 

"Nannih nih, 'Hi hnu thla li ah rawl tuan a cu lai,' nan ti a si lo mei? Sihmanhsehlaw, lo khi tha tein hei zoh hna hmanh u; rawl cu an hmin dih cang i tuan an cu diam cang"

Zion Chin Baptist Church Mino

Mino nih Miraang le miphun dang sinah thawngtha bia kan aupi la kan ti tikah nule pa zong rian nan ngei ve. Cucu, kan ca'h i thlacampiak hi a si. Exodus 17:8 chungah Moses le Joshua kan hmuh hna. Israel mi hna cu Amalek mi nih an rak tuk hna. Moses nih Joshua cu a thawh i "Khah, na mi kha hrilh hna law hi mi hna hi va doh hna uh. Kei balte cu tlangcung ah ka rak kai la le ka Pathian pekmi tthiangthunh hi van ah ka rak thlir lai." a ti. Moses nih a thiangthunh a thlir chung paoh kha Joshua nih teinak an hmuh. 

An biakinn hmai i cinmi panpar an si.

Moses nih Joshua rian a fial tikah a rak um sawh hrim lo. Joshua nih teinak a hmuhnak ding caah thla a rak cam. A tthiangthunh a rak thlir len ve. Cucaah, kan nule pa zong nanmah thlacampiaknak kan herh hringhran. Nan thlacampiak hi kan hriamnam tha bik a si.