Zumhnak Cu Nunnak Ah Langseh

Tuzaan cu kan khua Calvary Chin Baptist Church (CCBC) mino Cincinnati-Northern Kentucky area ummi hna nih 2015 chungah avoi (2) nak pumhnak kan tuah. Kan mino secretary pa nih siaherh ngai in chairman na kan t’uan piak la tiah telephone a van ka chawnh. Kum thok kaa hrawng caan hman lai cu tiah, ka lungthli in ka rak i nuam ngai. Kan pumh zaan ahcun 2015 mino kan tlangtar “Zumhnak Cu Nunnak Ah Langseh” timi kha pumpak in aa pe kho mi paoh nih bia tawi chimnak um la ti si. Leklak ka min cu ka pek hna i thlacamnak tehe ka sikhawh chungin Bible sermon ding cu kai kawl sek. Note zong ka si khawh chungin Microsoft ah kai t’ial hna. Ready ngai cun ka um ka ti i pumh kan kal pah ah ka note t’ial mi vial te cu print ka van philh kha ka van theih. Aran nakin kan kir le ka van print la kati ah kan printer ink a rak dih ngelcel! Pumhnak ahcun CBC hla buu sak pahin anrak ka hngak. Lungfim lo ngai le i phuhrung ngai in pumhnak cu ka hruai hna. Bia tawi chim dingin kai timhtuah mi le bang cu achim ka chim kho loh!

Ka mawh bak loh ka ti. Aruang cu, mihmai bia chim hi a fawi a rak fawi loh. Atu ka bia tawi chim cu, ka chuah kaa in a voi (1) nak mihmai ka dir i ka bia chimnak pei si ve. Cu chinchap i chairman hna si i hngahmi rak si rih. Cun, U.S.A mipi vial te nih an t’ih cemmi cu mihmai dir i biachim hi pei si. Mah cucu ahman bak misi. Fear of public speaking ranks #1 for Americans timi kha ka lungah a van chuak colh. Sihmanhsehlaw, kan chim lo lengmang cang ahcun zeitin dah kan ral cu t’hat khawh hnga. Kan thir bu le kan ngamh lo bu zong cun Pathian bia cu kan chim lengmang la i pei hmailei ah Pathian nih mihmai bia chim ralt’that nak cu a kan pek te lai cu. Cucaah, kan khua mino pumh ah bia tawi chimnak (short speech) um chung paoh cun ka min kai pe peng la tiah lung khiahnak zong mah zaan ahcun ka ngei beh.

Ka bia tawi chim dingin kai timhtuahnak vialte ka ruah ning si lo caah kai lungsi lo tuk hrinhran i caa tu in t’ial ka timh hi si. Duh ningin Pathian bia mihmai ah kan chim rel khawh hlan cu a t’ial tal in teh kan tial hauh ko ne la. Cucaah ka bia zong sau, ka bia tawi chim duhmi he pehtlai cun ka van chim colh ko lai. Atawi fiannak taktak tein ka van t’ial khawh ka van i zuam lai.

Ahlan lio biakam hlun chan ahcun zumhnak hi phun dang ngai a rak si ka ti. Abraham kha “kan hmuhsak lai mi ram ah tho law kal tuah tiah,” tiah Pathian nih ati. Cun, Abraham fapa Isak zong kha a zumhnak thawng in Pathian sinah raithawinak pek a timh. Noah zong, lawng ser law hi vawlei hi ti in ka t’awl lai ti i a zumhna bak in lawng cu a ser. Cun, Moses zong nih Israel mi pawl kha a zumhnak bak in Egypt ram khan a hruai hna. Sihmanhsehlaw, biakam thar i Bawi Jesuh le Lamkal tu Paul le James te hna nih cun phundang ngai khin an langhter tiah ka hmuh.

Sicun, zeihlan cem ah zeidah “zumhnak” cu a si? Zeidah “zumhnak” asi timi hi kan fian hnu lawngah, mahcu kan i fian mi “zumhnak” cun zeitin dah an nun le kan nun awk asi timi cu kan hngalh lai. Cucaah, “zumhnak” timi hi t’ha tein kan i fian a biapi taktak. Atang lei Baibal nih hin zeidah “zumhnak” asi ti cu a kan hngalhter.

Hebrew 11:1

“Zumhnak ngeih kan ti hi, kan i ruahchanmi kan hmuh theu lai ti kan zumh le a taktak le a ngaingai 
a simi thil kan mit in kan hmuh khawh lomi hi an um ko ti kan zumh hi a si.”

“Kan hmuh khawh lomi” timi zawn te kha van char ka duh mi si. Kan hmuh khawh lomi cu zeidah si hnga? Thiang Thlarau Jesuh Khrih si ko hnga lo maw?

Atang lei Hebrews 11:2 kha van relchap law….

Hebrews 11:2

“Zumhnak an rak ngeih caah hlanlio mi hna nih khan Pathian cu a lung an rak ton.”

Thiang Thlarau Jesuh Khrih an rak ngeih caah, Pathian alung an rak ton. Jesuh he i pehtlaih ti dah lo ahcun thei tlai khawh si lo. Pathian lungton khawh zong asi lo. Hi Baibal nih ahlan lio mi hna nih cun a ti nain, atu zongah Amah Jesuh Khrih “zumhnak” taktak le pehtlaihnak a ngeih mi nih cun thei t’ha tampi an tlai i Pathian alung an ton ko. Johan 14: 6 chungah Jesuh nih, “Keimah hi lam le biatak le nunnak ka si: Keimah sinin dah lo cun ahohmanh Pa sin an phan kho lo.” ati.

Afiang tuk ko. “Zumhnak” ngeih kan timi cu kan hmuh khawh lomi Thiang Thlarau Jesuh Khrih kan zumh kha si. Kan zumhah cun kan chungah um. Mah kan “zumhnak” thawng in cun Jesuh Khrih nih khamhnak akan pek. Mah cu khamhnak a kan pek mi cu a Pa Pathian sin phak (luh) khawh nak ding cu si. Hebrews 11: 6 kan van rel t’han ahcun;

Hebrews 11: 6

“Ahohmanh nih zumhnak loin Pathian lung ton khawh a si lo; zeicahtiah Pathian a fuhmi paohpaoh nih cun, Pathian cu a um i amah a kawlmi cu laksawng a pek hna, ti kha an zumh awk a herh. “

Si cun “zumhnak” cu khuazei in dah a rat le kan hmuh ngeih khawh lai?

 “Zumhnak” khuazei in dah a rat timi ka van fian ter hlan ah, “zumhnak” cu kan i chuahpi mi zong a si lo i, kan mah pumpak in kan hmuh khawh mi zong si lo timi kha van hngal hmasa ta hna usih ti ka duh. Atang lei Baibal nih hin “zumnak” khuazei in dah arat ti kha an kan hngalhter.

Ephesian 2: 8-9

“Nannih cu vel an ngeih hna caah an khamh hna i khamhnak nan hmuh cu amah nan “zumhnak” thawngin a si. Khamhnak nan hmuhmi cu nanmah tuahmi a si lo, Pathian laksawng a si. Hi kongah hin nan I porhlawt khawhmi zeihmanh a um lo, zeicahtiah nanmah tuannak thawngin nan hmuhmi a si lo.”

Mah Pathian laksawng cu amah Jesuh Khrih kan “zumhnak” thawng khan kan hmuhmi si. 

Cucaah, Zumhnak cu Amah Jesuh Khrih bak kha zumh i, khamhnak co kha si ko.

Luke 7:50

“Sihmanhsehlaw Jesuh nih minu cu a thawh i, “Na “zumhnak” nih khan an khamh cang, dai tein va kal ko,” tiah a ti.”

Jesuh Khrih kan zumhnak thawng khan khamh kan si. Khamhnak co cu hrint’han, Pennak chung luh, atu chan holh cun, pianthar ti zongah ti khawh si. Zeiruang ahdah “zumhnak” cu kan ngeih aherh? Zumhnak lo cun Pathian pennak chung luh khawh asi lo. Afawi nakin, Vanram kai khawh asi lo. Amah Jesuh Khrih “zumhnak” taktak kan ngeih lo ahcun khamh kan si lo I, khamh kan si lo cun, Pathian a ngeih kan chiatter peng. Pathian lungton ahar.

1 Peter 1: 8-9

“Jesuh cu nan hmu naloin nan dawt, cun nan hmu thiamthiam lo nain amah cu nan zumh, Cucaah nan “zumhnak” nih aa tinhmi nan thlarau khamhnak cu nan hmuh caah, holh in  chim khawh lomi lawmhnak  kha kan ngei.”

Cucaah, “Zumhnak” thawngin “khamhnak” kan hmu. Cucaah, kan nunnak ahhin a rak langh awk a rak si kha a fiang. Zumhnak lo cun Pathian he a zungzal in i petlaih khawh si lo. Kan "zumhnak" cu a caanah a tlak caan le a sungh caan um ko la. Sihmansehlaw, mah vialte kha Pathian nih kan zumhnak hi a rak kan test mi a si. A rak kan hnek caah a cheu cu an sung, a cheu nih cun an tei. A kan hneksak cu Amah kan zumh kan timi “zumhnak” hi a biapi tuk caah khan arak si. Pathian nih a kan hneksak cu a kan dawt ruang zong ahkhan a rak si. 

James 1: 2-4

“Ka u le ka nau hna, nan cungah hneksaknak a phunphun a tlun tikah vant’ha ah i rel u, zeicahtiah cu bantuk hneksaknak cu nan “zumhnak” in nan tei tikah in khawhnak nan ngei.

“Zumhnak” in kan tei khawhnak aruang cu “Khamh” kan si caah a si. Khamh kan si ruangah khan teitu kan si. Pathian ta bak kan si colh i a fa ah a kan cohlan. Pa fa kan si ah cun ro cotu zong kan si colh.

1 Johan 5: 4
"Zeicahtiah Pathian fa a simi paoh nih cun vawlei kha a tei khawh. Vawlei kan tei khawhnak cu kan zumhnak hin a si. Vawlei cu ahodah a tei kho? Jesuh cu Pathian Fapa a si tiah a zummi lawng nih an tei khawh." Amen! 

Hi ka Baibal i vawlei a ti duhmi cu Satan pa kha si. Sicun, Jesuh Khrih na “zumhnak” thawngin khamhnak cu na co cang maw? Jesuh nih minu cu, “Na “zumhnak” nih an khamh  cang” ati khah. Zumhnak kan ngeih kan timi cu kan nunnak bakin a langh awk asi i, a feh bak hau. Zumhnak lo cun khamhnak co khawh si lo. Khamhnak co kan ti cu hrint’han, pianthar, kha si. Hrint’han hnu lawnglawng ah Vancung Pennak chungah luh khawh si. Kan “zumhnak” a der i kan nunnak in a langh khawh rih lo ahcun, Vancung Pennak chung luhnak innkaa hram ah i hel sawhsawh he ai lo. Jesuh le Judah mi hruaitu pa Nikodemu bia an i ruah lio i Bawi Jesuh nih a chim mi bia nih fiang tukin a langhter…

Johan 3: 3

“Jesuh nih cun, “Biatak tein kan chimh: Ahohmanh hrin t’han a si lo ahcun Pathian Pennak kha a hmu kho lai lo,” tiah a leh.”

Pathian nih caan t’ha kan serpiak seh law, zeidah “hrint’han” asi timi cu kan peh t’han te lai. Pathian nih a reltu nan zaate thluachuah tampi in an pe ko hna seh.