Martin Luther King Jr.

Martin Luther King Jr. nih Wasthington, D.C ah "I Have a Dream" timi speech atuah lio 

U.S.A ram chung company tampi nih cun Martin Luther King’s Day hi rian kan tuan lo. Kan tuan lo man zong t’ha tein an kan pek thiamthiam fawn. Laimi tampi kan tuannak company dang zong khar cio ve khawh kan si. Sihmanhsehlaw, Laimi cheukhat nih cun zeidah Martin Luther King’s Day hi asi ti hi a thei lo mi hi kan um lai ka zumh. Zeiruang ahdah, U.S.A cozah nih Martin Luther King’s Day hi National Holiday ah an rak ser ti le Zeitin dah arak i thok ti hi a dihlak le fiang cikcek in kan theih khawh lo hmanh ah, zeiruang ahdah rian kan tuan lo timi hi cu tlawmpal tal kan theih a herh.

Martin Luther King’s Day taktak ka van tial hlan ah amah Martin kong hi tlawmpal tein van zoh usih law, kan fian deuh chinchin lai ka zumh. Martin kong cu sianginn kan kainak zongah saya te nih an kan chimh cawnpiak lengmang. U.S.A ram le ahlei in Minak pawl (African American) pawl caah cun zeitluk in dah sullam a ngeih hi kan theih dih ko. Tawinak taktak tein ka van tial ve lai.

Martin cu January 15, 1929 Atlanta, GA khua ah a chuak. Kum note a si ah meithal kahnak (assassinated) in April 4, 1968 Memphis, TN ah a thi. Anih cu Civil Right Leader si. Civil Right ti cu “rammi nuhrinvo” tinak si. A fawinak in, minung sinak in kan co awk simi le hmuh awk simi a ding le phung ning in tuahmi si. Zaapi nih kan theih cemnak cu “I Have a Dream” timi Washington, D.C i a rak chim mi khan si. Martin cu Booker T. Washington high school ah a rak kaii. Caa a thiam tuk caah, kum 2 a lak i high school a dih colh. Morehouse College ah kum 15 a si in college a peh. Cawnnak lei ah a sang taktak mi si. Martin nih Morehouse College in Sociology a dih. Crozer Seminary in Divinity degree a ngah t’han i, Boston University ah Theology lei in doctor’s degree  ngah mi si. Martin a pa cu pastor a si caah, Martin zong pastor si ve ding a pa nih a rak forhfial lengmang. Martin nih unau 3 a ngeih hna. Pa 2le nu u 1 an si. Kum 1953 ah, Coretta Scott he an i t’hium. Fa 4 a ngeih ta hna.

Martin uar um tuk nak cu biachim thiam tuk. Pastor pakhat zong cu si. A biachim mi nih mipi thazaang a kan pek (inspired) tuk. Cu lawng siloh, Martin cu duh lonak (protest) langhter tikah (non-violent) hriamnam le I khawn i dennak um lo tein a hruai hna. Mahti a hruai hna nak cu, mifim Ghandi kha a rak uar tuk ve caah si. Martin nih Civil Rights action i aithok hmasa cemnak cu Montgomery Bus Boycott ti mi khan si. Montgomery Bus Boycott cu Montgomery, Alabama ah Rosa Park ti mi minak nu nih miraang pa bus cung i t’hutnak a kianh duh lo ruang khan si. Mah lio caan cu, thleidannak rak um lio cu si. Rosa Park cu, an tlaih i zaan khat thok an thlak. Mah hnu cun Martin cu biatak tein Civil Rights ah cawlcangh hram a rak i thok.

Kum 1963 ah Martin nih mi tampi a rak khawmh hna i Washington, D.C ah duh lo nak (protest) an rak tuah. Mah lio cun, mipi 250,000 nak tam nih zeitluk in dah civil rights legislation a biapit kha an rak langhter. Mah lio Martin biachimmi cu “I Have a Dream” timi cu si. U.S an tuanbia chungah alar cemmi biachimnak le a sunglawi tukmi aung-minnak (success) protest a rak si. A kumvui July 2, 1964 ah President Lyndon Johnson (John F. Kennedy Dallas, TX ah meithal kah a ton hnu i president thar van tuan colhmi) minthutnak le House of Representative lung hnatlakpinak in thleidannak (segregation) cu a rak dong. April 4, 1968 kum ah John F. Kennedy bantukin Memphis, TN hotel innleng donhlei (balcony) a dir lio ah James Earl Ray nih meithal in a kah le thi.

Martin Luther King’s Day ai thoknak cu hiti hin si.

Martin Luther King, Jr Day national holiday si dingin mi cozah le mi tampi nih an rak duh lo. Kum 15 chung an rak rau. Martin meithal kah a tonnak in 4 hnu ah, Democrat Michigan lei in cozah rian t’uantu minak pa pakhat John Conyers nih a rak thok mi si. Martin upat hmaizahnak (honor) pek dingah John Conyers nih Congress sinah ah bill rak tial. Sinain, a rak sung lengmang. Zeiti sihmanhah tiin, kum 1970 ah, John Conyers nih New York state uktu (governor) le khuapi uktu (mayor) pawl kha Martin chuahni tal hi amah philh lonak tuah dingin a rak sawm hna. Khua dang zeimaw zat nih an rak lawmhpi cio hna i, acheu nih cun an lawmhpi theng ve hna lo. Kum 1981 ah, Stevie Wonder hlasak thiam minthang pakhat nih “Happy Birthday” timi hla Martin caah a phuah le a van sak. Cu hnu cun, mipi tam tuk lungthin ah rian a van t’uan. Millions 6 nih Congress ah National Holiday si dingin an duhnak kha an rak langhter. Request an rak tuah. Kum 1982 le 1983 ah, John Conyers nih cun mi zeimaw zat rak i sawm in upat, t’ihzahnak tehe national holiday si ding cun Washting, D.C ah protest nak an rak tuah t’han ve. November 2, 1983 kum ah, President Ronald Reagan nih White House Rose Garden ah mithutnak a rak ngei. Mahnu cun, January zarh thumnak paoh cu National Holiday Martin Luther King Jr. Day cu a rak i thok.