Minung kan chungah a nungmi thil pahnih an um

Mi tampi nih kan rak i palh theu tawn. Kan rak i palh ruang ahhin zapi cu Pathian he a kan hlat ter i cucu, hi vawlei ah apoi cemmi si. Pathian he i hlat tluk in hi vawlei ah apoi mi thil a um lo. Baibal ca chungah minung kan pum hi Thiang Thlarau in khahter a kan fial. Minung si nakin kan khah ter kho lo ruangah sualnak kan tuah langmang t’heu tawn. Baibal nih kan pum hi Thiang Thlarau in khahter a kan fial ko nain, Baibal chungah kan hmuhmi cu minung pakhat khat chungah hin khuachia aa hrolh (alut) ati mi kan hmuh fawn. Matthai, Marka le Luka chungah kan rel ahcun Bawi Jesuh nih khual a tlawnnak ah Khuachia a thawl piak mi hna kan hmuh. Adang tampi lak I van char ka van duhmi cu:

 Marka 5: 12 “Thlarau nih cun Jesuh cu, “Vok sinah khin kan kalter law an chungah khin kan luhter tuah,” tiah an nawl. Cucaah a kalter hna. THlarau t’halo cu mipa chung khan an chuak i vok chungah khan an lut. Vok cu an dihlak in lungpang cung khan rili chungah an zuang ciammam I an thi dih, thong hnih tluk an si.”

Luke 22:3 “Khi tikah zultu pahleihnih hna lak I aa tel vemi Judas Iskariot an timi chungah khan Satan cu a lut.”  

Mah lawng si loin, hngakchia pa pakhat zong khuachia nih a tuah mi Bawi Jesuh nih a thawl piak hoi. Satan cu khuachia ti zong ti khawh si I, khuahchia cu Satan ti zongah ti khawh thiamthiam si lai tiah ka ruah. Minung kan chungah Satan a luh ahcun zeitindah kan ruahnak cu a t’hat khawh hnga i a hman khawh hnga. Bawi Jesuh nih Judas Iskariot cu, “mi vanchia tak asi; Hi vawlei ah hin rak chuak lo lawlaw in um seh law a tha deuh hnga” a ti.

Hi bantukin kan chungah khuachia (satan) lutin tukforhnak phunphun kan tong. Kan tlu kan ril i sualnak par kan tlaan. Cucaah, Jesuh a thih i vancung a kai lai ah nan sinah ka um zungzal lai a ti nak cu si. Amah pum cu vancung ah a kai ko nain nan sinah a zungzal in ka um la a kan ti ta fawn mi cu ruah awk um ngai. Asullam cu, Thiang Thlarau a kan chiah ta tinak si. Thiang Thlarau kha kan chungah rak lut in kan pum hi khuachia (Satan) nih tei lo nak ding caah si. Mah Thiang Thlarau Jesuh kha Satan dohnak ding hriamnam thabik ah ser ding kha a kan fial. Zapi tam deuh kan pa le thawngtha chimnak zong ahhin Thiang Thlarau hi kan chungah um ding hi a kan fial ti hi an chim ka theih lengmang. Thiang Thlarau in kan khah a si ahcun, khuaruah har thil ti khawhnak kan ngei lai. Jesuh vancung a kai hnu pin leiah a zultu Peter hna cu Thiang Thlarau in an khat ciammam I khuaruah har thil khawh thawnnak in an khat. Lamkaltu cauk chung rel ah cun tampi in hmuh khawh an si. An chungah Thiang Thlarau um caah khan mah ti khan thawnnak (power) an ngei tinak si.

Hi Vawlei pumsa duhnak le nuamhnak ah kan um ahcun, kan chungah Satan um tinak si. Hi vawlei ka ti duhnak cu taksa lei in nuamhnak a si mi Night Club, Party, Sex, Drug le Zuu te hna hi si ko. Cun, a hmun lo ding thil tlaihchan te hna. Matthai 6:24 le Rom 6:22 rel ah cun fiang deuh in ka chim duhnak hi fian khawh deuh si lai. Thiang Thlarau lei in kan I nuamhnak cu, Amah Pathian sinah thlacam, a bia simi Baibal cathiang rel, pumhkhawmh le Amah thangt’hat sunparnak pek hi asi ko. Kan chungah Satan tu a rak um hi kan rak theih lo ruangah mi cheukhat cu Pathian he kan hlat i kanmah duh poh in khua kan sa. Kan siarem ning pohin hi vawlei kan taksa nuamhnak ah kan t’hu dir. Mah hi ti khua kan sah ahcun hi vawlei ah mi vanchia bik kan si. Zeitluk in dah kan chung Thiang Thlarau a rak der thawm ti van I hngalh a herh bik caan lio si. Hi vawlei ahhin porhlawt pi awk pakhat taktak te kan ngeih mi cu zungzal Thlarau nunnak co lawng bak hi asi.

Si cun zeitindah kan chung i Satan pa cu kan tei khawh ne la? Cun zungzal Thlarau nunnak cu kan co khawh lai? Mah hi Baible ca caang nih hin zeitluk in dah Pathian bia a thawnzia le a sin i thlacam hi kan hriamnam taktak asi cu fiang tukin a langter.

Hebru 4:12-13

Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. Pathian sinin thuh khawhmi thil zeihmanh a um lo. Sermi thil vialte hi an dihlak in a hmaika ah an lang dih hirhiar i amah sinah cun kan kong cu kan i chim cio lai.

Marka 9:28-29

Cun Jesuh cu inn chungah a luh hnuah a zultu hna nih khan a thli tein, “Zeicahdah kannih nih kan t’hawl khawh lo?” tiah an hal. Jesuh nih, “Hi bantuk phun hi cu thlacamnak dah ti lo nih cun zeihmanh nih a t’hawl kho lo,” tiah a leh hna.

Ni fatin te, Pathian sinah thla fak piin lungtak tein kan cam le a bia kan rel peng ahcun khuachia (Satan) nih a kan ttih lai. Satan cu Pathian sal si. Satan nih hin Pathian he kan i hlat deuh poh ah caan t’ha a rak lak ve. Voikhat i pumh lo ah, voihnih i pum thiam lo ding khua a khang zungzal. Voikhat zuu dinah, voihnih din dingin milung chungah rian a t’uan tu si. Hi bantukin tukforhnak kan in lonak dingah thlacam zungzal a kan fial fawn.

Luka 22: 40

A hmun kha a phak tikah annih cu a thawh hna i, “ Tukforhnak chungah nan tlak sual nakhnga lo thlacam tuah u,” a ti hna

Keicu ka sual tuk le Pathian caah zeihmanh ka si lo ti hlah. Pathian nih a zungzal in nan sinah ka um la ati. Matthai 28: 20 ah fiang tein vancung a kai laiah a kan chimh ta.

“Kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna. “

Cucaah, zeiltukin kan sual zongah Pathian nih kan caah innka a awn zungzal. A innka kingh lawnglawng hi kan rian asi. Atu ahhin king ve cang. Na chungah um mi Satan pa kha t’hawl le tei i zuam hmasa. Kan chungah Satan pa um ahcun, Amah Pathian sin thlacam len zongah a phan kho lai lo. Mah cu kan ral pa Satan pa tei khawhnak ding ahcun tuan deuh ka bia kha si ko. Ni fatin te a si khawh chungin Pathian sinah thlacam. Lungchung te zongin cam langmang ko. Cun, Amah Pathian bia simi kha tampi ding law ei. Mah lawnglawng khan kan chung Thiang Thlarau cu a t’hawng lai i zungzal Thlarau nunnak cu kan co lai. Cun, Satan pa cu a der lai i kan tei lai.