Lungsaunak, Zumhnak, le Intuar Khawhnak

Vawlei cungah an zuar cem mi le a laar bik mi cauk cu “Bible” hi si. Bible cauk tluk in an zuar mi cauk hi vawlei cungah um lo. Bible cauk a thawtnam a thei taktak mi caah cun khuaruahhar a si. Pathian bia ai theihnak ah mi thinlung chungah biatak tein rian a t’uan i. Pathian thawhchuah hnawh mi le Thiangthlarau tial mi ai theihnak ah. Hi Bible cauk chung ahhin hlan lio minung tampi hna an nun ning zohchunh awk tlak an tam tuk. Cu a tampi hna lak i top 10 an thim mi chungah top 3 hi van zoh hna usih ti ka duh. 

1.       Moses, Mi Lungsau

Moses tuanbia cu zaapi nih kan theih dih tuk cang mi si. Kan pa le nih t’hawngt’ha an kan chimh ah kan theih lengmang. Moses cu mi lungsau taktak a si. Israel mi hna Egypt ram sal sinak in a hruai hna. Ram ro le ram car ah kum 40 chung lunsau thinfual in a hruai hna. Israel mi hna le Moses cu biatak tein khuaci an mui tawn. Israel mi hna nih Pathian cu an zumh ko nain an rak pemh kho lo. Atu ah Pathian sin thla an cam i tlawmpal ah Pathian a mawchiat colh mi an si. Sihmanhsehlaw, Moses nih cun a cawkpiak pah hna, a sik pah hna. Cuticun, kum 40 chung Israel mi cu a hruai hna. Kamhmi Kaanan ram cu Pathian nih a hmuh ter lo nain, Moses tuanbia zoh tikah nang le kei si usih law nikhat hmanh kan hruai khawh hna lai lo hi ka ruat tawn. (Number 20: 8-12) Nangmah tein rak relt’han vete.

 

Moses le Israel mi ref. google.com

2.      Abraham, Zumhnak T’hawng

Abraham le Sarah cu fa an ngei kho lo i a tar zong an tar cang. Pathian nih Abraham sin ai langh lio ah Abraham cu kum 100 a si i, Sarah cu kum 90 a si. (Genesis 17: 1-17) Minung sinak in tuak ahcun khuaruah har si ko. Kum 100 si hnu i fapa ngaih ding cu tiah Abraham zong a nih chuak. Abraham cu a minung sinak in a lung zong dong. Sihmanhsehlaw, Pathian bia a si ti a theih caah a zumh. Pathian nih Abraham cu fapa Isaac a pek hnu ahcun lawmhnak in a khat. Sihmanhsehlaw, nikhat cu Pathian nih zeitluk in dah a zumhnak hi a si tiah a hneksak. Pathian nih keimah maw ka dawt deuh a fapa timi a hneksaknak pakhat zong si chih. (Genesis 22: 1-14) Hi bantuk tahchunhnak hin nang le kei van usih law zeitin dah kan um hnga? Kan nih nih cun, “Ziah hme Bawipa! Hi tluk ka tar hnu i ka ngeihmi fapa pakhat te theng cu na ka hal?” tiah kan ti lai a fiang. Abraham cu a lunthin chungah kekuai in a t’ap. Sihmanhsehlaw, Pathian a zumhnak a t’hawng tuk caah zeipoh Pathian caah ahcun a sian. Khrihfa zumtu kan nun le zumhnak cu hi Abraham nun nih hin tampi a ka chimh t’heu cio lai tiah ka ruat.

 

Abramham Pathian sin rawithawinak tuah lio ref. google.com

3.      Noah, Intuar Khawhnak Ngei Taktak Mi

Genesis a ngan 6 kan rel ahcun, Pathian nih Noah rian a fialnak kha na hmuh lai. Rili tilet ka thawh ter lai i vawlei hi ti in ka t’awl dih lai a ti. Cucaah, na chungkhar ca le, a dang sat’hil a nu le pa cio in na khumh hna la tiah Pathian nih a chimh. Cu lio ahcun, Noah cu kum 500 a si. Lawng a sak nak ah cun a fapa le nih an bawmh i kum 55 chung hrawng an rau ti a si. Kum sau taktak a si. Hi tluk kum caan sau ahhin an herh ding mi vialte hi tuak khawh a si ko. Lawng sernak thil le ri le adang dang mu. Cun, an ei dinnak vial te zong si rih. Mi kip nih a hrut a molh tiah an ti ding mi cu a fiang. Sihmansehlaw, Noah nih cun intuar khawhnak te he Pathian rian cu a lim. Lung ngan tuk mi Van Siangpahrang rian fial mi intuar khawhnak he adongh tiang lim cu khuaruahhar si ko ti u. 

Noah te chung sangphaw lawng (ark) an sak lio. ref. google.com