Thlennak (Change)

Jesuh nih hi vawlei cung misual vialte hi i thleng hna seh ti a kan duh zungzal. Minu a sual lio i an tlaih mi zong, a sualnak a ngaihthiam. Va kal law va sual ti hlah a ti.

Johan 8: 10-11

“Ding tein a hung t’hu i, “Minu khuazei ahdah an si dih? Nangmah sualphaw tu dingah pakhat hmanh an tang kun lo maw?” tiah a ti. Minu nih cun, “Bawipa, ahohmanh an tang lo,” tiah a leh. Cu tikah Jesuh nih, “Keizong nih sual kan phaw ve lo, Va kal law a sual bel va sual ti hlah,” tiah a ti.”

 

Ref. google.com

Bawipa loin cun sualnak hrial khawh a si lo. Bawipa loin cun kan sualnak tuah t’han tawng lengmang si ko. Bawipa bawmhnak loin kanmah tein zeihmanh kan tuah khawh mi um lo.

Jeremiah 13: 23

“Ethiopia mi nih a cuar kha aa thlen khawh maw? Cakei nih teh a tial kha aa thlen khawh maw? I thleng kho hna seh law cu, nannih that lonak dah ti lo zeidang tuah a thiam lomi zong nih hin thatnak kha nan tuah ve hnga.”

Jesuh nih kan sualnak siseh, a thiang lomi kan thilthuam vialte hi phoih dih hna seh ti a kan duh. Kan sualnak vialte hi phoih dih i amah thilthuam a t’ha bik in, a lianngannak le dawtnak he thuamh a kan duh zungzal. Kan thilthuam a thur mi le sualnak in khatmi kha a mah thilthuam t’ha bik le a dawtnak he thlen piak a kan duh.

Zekhariah 3: 3-4

“Joshua cu vancungmi hmai i a dir ahkhan a thurhnawmmi thilpuan aa hruk; cun, vancungmi cu aa mer i a tuammuaitu hna kha, “A thilpuan a thurhnawmmi kha phoih u,” tiah a ti hna. Cun, aa mer i amah cu a thawh I, “Zeitindah na sualnak kan lakpiak cang kha zohhmanh, nangmah cu thilpuan t’ha in kan thuamh, tiah a ti.”

Bawipa nih zeitluk kan sual zongah, kan sualnak hi lak piak i thlen piak a kan duh zungzal.

Ezekiel 36: 26

“Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i, titsa bantukin a nemmi lung kha kan pek hna lai.”

Jesuh Khrih nih a kan thlen piak cang hnu ahcun, kan zeizong, zeizong te dihlak hin a thlen. Jesuh Khrih thlen piakmi cu a hlan nuning le thilthuam kha kan duh ti lo. Pathian duhmi zeidah si ti hi, theihhngalh kawh peng zungzal si.

Rom 12:2

“Hi vawlei kalninghin kal ve lengmang ti hlah u, sihmanhsehlaw chunglei in Pathian nih nan lungthin kha a dihhumhnak in in thleng hna seh. Cu tikah a t’hami thil le Pathian nih a lawmhmi thil le a tlingmi thil kha nan hngalh khawh lai.”

Pathian nih a thlen cangmi hna cu, a dihlak (completely) in a thlen hna. Zeizong vialte hi a thar in ai thok.

2 Korin 5;17

“Mi zeihmanh hi, Khrih he ani pehtlaih tikah cun, mi thar a si; a nunning hlun kha a lo cang, nunning thar kha aa thawk cang.”

Zeitluk misual kan si zongah Pathian nih a ka thlen khawh. Thlen zong a kan duh zungzal tu Pathian si. Bawipa min thangt’hat si ko seh!

1 Korin 6: 9-11

“Mitha lomi nih cun Pathian pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak; pa nih pa he sualnak a tuahmi le, mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo. A cheu cu cu bantuk cu nan rak si. Asinain, sualnak in in thianh nan si cang; Pathian sinah pekchanh nan si cang; Bawipa Jesuh Khrih min le kan Pathian Thlarau thawngin Pathian he remter nan si cang.”

Kan chung ummi Khrih ah kan i thleng cang cun, kan lenglei zongah ai thleng chih dih.

1 Johan 2: 6

“Pathian chungah kan um, a timi paoh nih cun Jesuh Khrih bantukin kan um awk a si.”

Bawipa sinah kan zeizong te kan chiah peng a si ahcn, Amah Bawi Jesuh Khrih bantuk kan lo chin lengmang lai. Jesuh Khrih bantukin i thlennak si.

2 Korin 3: 18

“Kannih caah hmai khuhnak puan kha a um ti lo caah kan dihlak in Bawipa sunparnak cu thlalang chung i kan mui a langh bang khin kan langhter; cuticun sunpar chin lengmang in Amah lo chin lengmang ah thlen kan si i cucu Thlarau a simi Bawipa riantuannak cu a si.”

Jesuh Khrih muko tum thawng he a rat t’han tikah cun kan dihlak tein cikhat ah kan i thleng dih lai.

1 Korin 15: 51-52

“Muko hmanung bik tum caan ahcun mit thep ah kan i thleng dih lai. Zeicahtiah cu muko cu a hung than tikah a thimi hna cu an thi kho ti lomi ah thawhter an si lai i kan dihlak in kan i thleng dih lai.”

Sihmanhsehlaw, kan Pathian cu zeitik hmanhah a bia zong a rawk lo i, ai thleng mi Pathian si lo.

Malakhi 3: 6

“Keimah cu i thleng loin Bawipa ka si caah nan nih Jacob tefa zong nan rawk dih lo.”

Kanmah lawng si lo. Nii nikhat cun kan vawlei pi zong hi duh zong duhlo zongah ai thleng ve te lai. Ai rawk dih ve te lai. Sihmanhsehlaw, kan Bawipa Pathian cu zeitik hmanhah ai thleng bal lo.

Salm 102: 25:26

“Hlanpi ah vawlei cu n arak ser cang. Nangmah nih na kut hrimhrim in na ser hna. Van le vawlei cu an lo dih lai, sihmanhsehlaw nang cu na hmun lai; annih cu puan bangin na thlen hna lai i an lo lai.”