Lai Ca Tial He Pehtlaiin Ka Saduhthah

Muko Magazine editor Pu Joel Ling nih cun miphun dang ca kan tial tik vial i kan palh sual lai tiah ralring tein kan tial. Asinain, kanmah miphun ca kan tial tik vial ahcun kan palh la ti hi kan phang loh. Kan i ralring lo tuk a ti i a hman ngai ka ti. Lai ca tial hi ka si khawh chungin remh cu kai tim lengmang ve nain tam tuk te remh kai duhmi an um rih thiamthiam. Lai ca tial thiam le thiam lo ka ti tikah zeidang si lo; ca kan tial tik i 'peh ding le peh lo ding' khi si.

Facebook le a dangdang te i ca kan tial tikah keimah pumpak in pehnak ding le pehlonaknak ding zawn hi ka hmuh pah tawn ve. Hngakchia mino deuh hi cu um rih seh, upa pipi hna nih kan van tial khin cun a zoh chia tuk. A tu ka blog i ka catial mi pawl zong hi zeidang remh awk cu um rih seh, Lai ca ‘peh ding le peh lo ding’ hi tampi rem awk an um.

Chin Flag

Lai ca tial cu kan thiam ko nain ‘a peh le hlat’ hi a rak biapi tuk ve. Miraang holh in "family" cu "chungkhar" tinak si. Miraang holh in word khat lawng si bantukin laica zongah word khat te lawng a si ve awk a si. Miraang ca kan tial tikah "fa mi ly" tiin kan tial lo bantukin, lai ca kan tial tik zong ah "chung khar" tiin kan tial ve la loh.

Hiti ka hei ti tikah a thiam ngaimi hna ka van lo. Cun, thiam lo bu le zei theih lo buin phunzau cak tuk mi zong ka van lo fawn. Nain, A si lemloh. Kei zong a cawng lio mi dawh ka si ve ko. Tam tuk cun chim ngam ding hna ka si ve lehlam lo. Sinain, Laimi kan t'hancho nak ding si paoh cun a ho kan si paoh ah kan i chimh, kan i theihter ding hi kan rian a si ko. Bible ca Phungthlungbia chung ah “Chimhhrinnak huat cu hruh si a ti.” Chimhhrinnak hua lo tein ngaih le mi chimmi i lak cu thanchonak a si ve hoi.

Keimah talhchih in tampi kan palhnak lak ah atang lei bantuk in Laica kan tial hi cu a zohchia khun ko rua ka ti. Khrihfa kan si bantukin Pathian min le kan zumhnak lei he ai pehtlai deuh mi pawl hi cu zoh dawh deuh in tial hi thilt’ha a si ko. Remh khawh i zuam cio hna usih ti ka duh ngai.

"God" si lo “Lord” si caah "Bawipa"  si lo, “Pathian” tiin tial. “Bawi Pa” tiin le “pa thian” ti in kan tial t’heu.

"Jesus" si caah "Jesuh" tiin tial. “Zisuh” si lo, “je suh” ti hna in kan tial t’heu hih.

“Christ” si caah “Khrih” tiin tial. “khi rih” ti hna in kan tial hih.

"Bless" si caah "thluachuah" tiin tial. “thlua chuah” ti hna in kan tial theu hih.

"Pray" si caah "thlacam" tiin tial. “thla cam” ti hna in kan tial.

"Amen" si caah "Amen" tiin tial ko. “A men” ti hna in kan tial hih.

"Church" si caah "Biakinn" tiin tial. “biak inn” hna in kan tial tawn hih.

"Praise" si caah "thangthat" tiin tial. “thang that” ti hna in kan tial theu hih.

“Sing” si caah “hlasak” tiin tial. “hla sak” ti hna in kan tial tawn.

“Spirit” si caah “Thlarau” tiin tial. “Thla rau” ti hna in kan tial

“Bible” si caah “Baibal” tiin tial. “Bai bal” ti hna in kan tial.

A fawinak in chim cun miraang holh i word khat paoh hi, Lai ca kan tial tikah an i peh. Tahchunhnak ka van lak t’han. Miraang holh i “what” cu word khat si bantukin “zeidah” tiin tial ve hau. Cun, “personal” te hna “pumpak” tiin tial an hau. Adang “sad” tibantuk hna sic un “ngaihchiat” tiin tial ding si. Ca kan tial tikah kan i ralrin ngai a hau.

A cheu nih “Pathian” hna “pt” tiin kan tialmi bantuk le “si” ti hna “C” ti i tial khi ka uar lo ngai. A tawinak in kan tial ti cu kan si ko nain a zohchia tuk ka ti. Hawi nih an i cawn cio lai pinah, kan fa nau le nih an i cawn lai i Lai holh a tial ningcang taktak theih hngalh khawh a harter chin deuh. Kan Lai holh le kan ca tlau zong a fawi. Upa lungfim nih cun kan hman bak lo awk si ka ti. T’hangthar ka fa nau le nih an i cawn lai i Lai holh a tlau lai!

U.S ram hngakchia chuakmi kan fa nau le bang cu a caan ah lung an dong. Laimi sin zongah Miraang in an holh tuk leh pek. Nu le pa nih kan fa le cu miraang hawi an ngeih tuk caah Lai holh an philh tiin kan hei i uang ngai rih chap bei. Khat lei cun ningzak kan rak si tuk cuh. Miphun pakhat si i mah le ca hmanh thiam lo cu tiin nihsawh kan fawi te. Kan fa nau le Lai ca tial le chimh cawnpiak hi U.S siseh, ram dang um Laimi hna i kan rian ngan ngaimi pakhat a si. Keimah zong ka si khawh chungin ka chimh hna i ka sik tawn ve hna. Zeidang ziachiat ruang hna ahcun si loh. Kan Lai holh le ca ka dawt ruang tu ah si.