Refugee Pa Bawlung Chuihin Paw Ai Cawmmi

Danny Mwanga cu Democratic Republic of Congo in a ra mi si. Kum no te si i a tuanbia rel ah lung t’ha lo ngai nain, thazaang zong i lak khawh ngai si hoi. Danny cu July 17, 1991 ah chuak. Ngakt’ah si i a pa hi Congo ram chung i dohnak (civil war) in 1997 ah a rak thi.  A pa thih hnu pin lei ahhin, a nu nih a unau dang he U.S ah a rak kal taak chung hna. Danny cu unau dang he a pi le pu sin te ah an rak um. Caan zeimawzat hnu ah Danny cu 2006, kum 15 a si ah U.S a nu sin te ah an rak phan ve.

Danny U.S a rak phaknak le a rak t’hennak hi Portland, Oregon ah si. Jefferson High School ah a kai mi si i hngakchia tein bawlung duh ngaingai mi si. High school a kai pah hin club sawhsawh te ah a rak chuih pah ve. High school a dih hnu hin college a kai pah i Oregon State University ah bawlung zong a chuih pah. A kum khat nak college a kai nak hin a thiam, a laar tuk cang. Amah kum le khua tawk lo in mint’hatnak laksawng tampi zong a hmu. Cuticun a laar chin lengmang i 2010 ah Philadelphia Union, Professional Soccer Club nih  an rak thim colh. Mah hnu cun, bawlung chuih in a pawcawm hram hi ai thok cu si.

Danny Mwanga 

Danny cu a nu nih dawt ngai fapa pakhat si. Danny unau pa 4 an si i, hngakchia cem si pinah a mah te lawng hi pa si. U.S a rak phak ahhin Laim kanmah bantuk tein refugee bak si. Holh zong thiam lo. Ca rel zong thiam lo. U.S sining cang zong zeihmanh a thei ve hlei lo. Sinain a tu ahcun, TV in zoh mi le bawlung chuih thiam mithang pakhat ah ai chuah  (Laimi zong kan si kho hrim ve). Bawlung chuih a thiam tiin mi nih an theihnak hi local park sawhsawh tein si. Inn pawngkam park sawhsawh te i an chuih nak luklak in a laar i high school le college tiang.

U.S ram professional tiang si duh ahcun, college level tiang tal phak hau. College bawlung chuihnak hin a level an um dih i a sang cem cu NCAA si. Division 1-3 in an um i dvision 1 chuih mi paoh hi profession club coach te nih thim deuh mi an si.

Danny kong na van ral ahhin, Bible caa i “Naa thawknak cu hme hmanh sehlaw, na donghnak lei cu a ngan lai.” (Job 8:7) timi kha thinlung ah an van chuak thluakmah lai ka zumh. Congo cu ram a harsa ngai ve mi pakhat si. Nain, African ram chia lak ahcun, a zaa deuh fawn. U.S ram ahhin, Congolese refugee pawl an rak tam ngai ve cuh. A cheu cu sianginn le bawlung chuihnak ah hawi ka ngeihmi hna zong an um.

Danny, Philadelphia Union le Manchester United 

Hi pa tuanbia hi Laimi kan si ning he ai lawh tuk caah ka van tial duhnak khun si. Laimi zong bawlung chuih kan duh tuk ve tikah hi pa bantuk si hi kan duh dih. Hika U.S ram phak hnu cun a lam tampi um. Hi pa bantuk hi Laimi chung in kan chuak ve te lai ti chim khawh si loh. Professional bawlung chuih thiam hna cu um rih seh, sal in rak zuat mi hmanh nih a tu ah president an tuan. Amah belte, khat lei in a poinak cu Laimi nu le pa cheukhat cu fa le duhnak zulh hi kan thiam tawn loh. Thil pakhat khat an hngakchiat tein an duh mi thil hi bawmchanh (support) hi nu le pa sinak in kan hmang lo. A theih hrimhrim maw kan theih lo dek si. Miraang le ram dang nu le pa cu an fa le hi an tuah mi sualnak lei si lo mi cu thazaang an pek tuk hna caah Laimi nu le pa zong nih kan i cawn ve awk si. Ca thiam mi nih caa lei ah tha pek peng ding. Tennis thiam mi nih tennis lei ah, soccer lei thiam mi nih soccer lei ah kan i pek hna awk si. Laimi nu le pa nih kan fale chance an ngeih lio te i kan bawmh (support) hna ahcun, nii nikhat ah Laimi phun miphun dang nih zohcho mi kan si kho ve.  

 “Congo ram ahcun, keimah tluk si lole, keimah nak hin bawlung chuih thiamthiam an um ko nain, professional sinak dingah caant’ha (chance) an ngei hna lo ee.”

-         Danny Mwanga