Nick
Vujicic timi pa kong le a hmanthlak hi van zoh ve law thazaang rak la ve. Khrih
ah ai nuam mi hi cu zei bantuk an rak si zongah vawlei holh in chimh khawh lomi
lawmhnak taktak an rak ngei hrim. A kalnak hmunhma tampi ah mithli he mi
thinlung a thleng kho tu pakhat a si.
Nick cu
kut le ke loin Dec. 02, 1982 Melbourne, Australia ram ah a chuak. Kut le ke lo
ti tikah a hme tete pahnih cu a ngei i, khat lei nih kedong pahnih te a ngeih
chap. Nick cu kut le ke tlamtling loin a chuahmi lawng hi a si. A zeidang hi cu
an dam dih (healthy) ko. Nick nih unau pahnih a ngeih hna. Pakhat cu nu
Michelle a si i pakhat cu pa Aaron ti a si.
Cuticun, kut le ke lo bu tein sianginn a kai
ciomo ve i BA tiang a awng ve. Nick cu a sianginn kainak kut le ke tlamtling lo
si bantukin hawi nih a rak nih sawh (bully). A hngakchiat lio ahcun hawi zong ngei loin
ticun harsa ngaiin a rak t’hudir. Zeiruangah dah hawi nih kut le ke tlamtling
tein a ngaih i kei vial ka ngaih lo tiah lungrawk in a rak um.
 |
| Nick Vujicic |
A
minung sinak in a rak harsat tuk ve tikah kum 8 hrawng a si hin mah le mah i
thahnak khua a rak ruat. Kum 10 a van si i keimah tein kai that a ti ah a nu le
pa nih an rak tlaih manh. Pum tlamtling lo si tikah a nu le pa nih an dawt tuk
mi a si. Nick hi kut le ke loin a um nain minung kan tuah khawh mi zaara cu a
tuah khawh dih ve. A ke dong pahnih le, a liang, a khabe tiin au bawm i a
duhning paoh in a cawl. Nick a huam cem mi hna cu ngasio, zuksuai le tilio hna
hi an si. Skate zong a duh paoh in ai cit i kohti (golf) le bawlung tiangin a
chuih kho.
Cu
lawng si lo, Nick nih kut le tlamtling lo buin a thiammi an rak tampi rih. A
kedong tein catial zong a thiam. Computer catial (type) zong a thiam chap rih i
minute pakhat ah words 45 a tial khawh. Tennis cheh zong a thiam i drum pedals
tum zong a thiam. Mah tein ti dinnak hrai vai lak zong a thiam rih. Adang sam
hriah, hat’aih, le phone tlaih tiangin a thiam.
 |
| Nick A Hngakchiat Lio |
Nick
nih ai chuahpi mi kut le ke a baumi pawl hi miraang nih Tetra-amelia syndrome an ti. Hi bantuk phun mi tampi nih cun a
ngaih mi si lem loh. A tlawm, a har ngaimi i mi tlawmte mi vanchia deuh nih an
ngaih tawn mi si. Africa ram zong ah pakhat nu um ve i a nih zong a kut pakhat
hmanh um ve lo nain, a ke, ke hnih ngei. A ke in thil zong suk, rawl zong
chumh, kayachinti (tomato) tiangin a riam dih.
 |
| Nick le a Family |
Nick hi
a hngakchiat tein biakinn ah a t’hang mi a si. Pathian ai bochan tukmi a si i,
Pathian sinah thlacam lengmang mi zong a si.
kum 15 a si ah Pathian nih a thlacamnak a leh i Pathian dawtnak a rak
thei. Nick nih John 9 chung i mitcaw pa a chuahkaa in a mit rak cawt ve nak kha
a rel i thazaang thar a rak laa chinchin. Kum 17 hrawng a si hin ‘thlacam buu’
tiah group tete a rak dirh. A donghnak cun ‘Life Without Limbs’ non-profit
organization pakhat ah a rak thlen lawlaw. Kum 19 hrawng a si tik ahcun, Evangelist in khuaza
ram kip ah kal in Pathian dawtnak t’hawngt’ha a chim. A tuanbia a chimh hna. Mino
tete nih mah le mah ai that mi an tam tuk tikah mino deuh hi thazaang a pek
khun hna.
 |
| Nick Le A Nupi Kanae |
Nick cu kum 2006 ah an family in
California ah an rak i thial. Nick hi minug sinakin zoh cun nupi a tong lai
tihi ruah awk a har ngai nain, February 12, 2012 ah nupi dawh taktak mi Kanae
Miyanhara he an i um. Nick nih hiti kut ke tlamtling lo ka si caah nupi hna hi hi
cu ka ton lai kai ruah bal mi si lo. Cun, zungzal in keimah bantuk he caan zong
aho hmanh an hmang huam la lo, a ti. An i um hnu tlawmpal ah fapa dawh te zong
an ngei. A nupi hi interviewer pawl nih bia tampi an hal i ka duh taktak ko, a
ti. Nick le a nupi Kanae cu an i dawtnak tuanbia he pehtlai in hika zawn hin
interview an tuah hna.
 |
| An Wedding |
Nick cu
capo seih zong a thiam. Bia chim zong a thiam i a hmai hi a panh zungzal. Mi
nih keimah kut le ke ngei lomi hmanh kai nuamh i kai lawmh ahhin cun, nanmah
pum tlangtling in a ummi chinchin nih cun nan i lawmh tuk awk a si, a ti.
Pathian nih aho hmanh tinhmi ngei loin a kan ser lo nak te pawl hi a chim khun.
Mi thazaang a kan pek daan hi tial ahcun a tam tuk lai caah Youtube ahhin rak
ngai ve. A cawl cangh le a biachim hin thazaang tamtuk na la ve hrimhrim lai.
Hi
bantuk in kut le ke ngeih lomi hmanh nih hi vawlei cung ah nuam tuk in khua a
sa. Ram kip ah a kal i Pathian t’hawngt’ha a aupi. Mi kip thazaang a pek hna i
an nun a thlen hna. Nang le kei Pathian nih hawi hlei vant’ha in a kan ser hi
rua lo awk a t’ha hrim lo. Kut le ke ngei lomi hmanh nih an hmai panh khawh
peng i an i lawmh peng ahcun kan nih chinchin cu kan i lawmh tuk ding a si.
Pathian dawtnak t’hawngt’ha zong kan aupi chinchin cio ve hna ding a si. Aho
paoh hi a rak kan ser tikah timhlamh piakmi rak ngei bu tein a rak kan ser ti
hi a ka fian ter tuk !
 |
| Nick le a chungkhar |
people.com
attitudeisaltitude.com
No comments:
Post a Comment