Manny Pacquiao (Pa Kio) Hi Hodah A Si??!!

Ka kumkhua a hngakchiat ruang le boxing ka hei uar lemlo ruangah dek a si, U.S ram kan rak phak tiangah Manny Pacquiao hi ka thei lo. Manny Pacquiao cu rak laar tuk kaw Laimi nih “Pa Kio”, “Pa Kio” rak ti lengmang a si. An tanh ning le tha an pek ning ka hmuh ve hna tikah ka khuaruah a rak har. Kan mah Laimi chungin dara boxing thongh thiam vawleicung minthang pakhat kan ngeih tiah, a si lo. Philippines ram mi “Manny Pacquiao” a rak si ai! Kan rak mawh ve hrim lo. A muisam le a tungtai hi Laimi bak a si tak ko. Filipino nak hmanh in Laimi a lo deuh ka ti cang. Dawtnak tein “Pa Kio” ti zong a rak phu rengreng. A tanglei hin a tuanbia tawi tein zoh chap rih hna usih.

Ngakchiat lio:

Pacquiao a ngakchiat lio

Pacquiao hi a min dihlak ah Emmanuel Dapidran Pacquiao a si. Mi tampi nih Pac-Man ti zongin an theih. Philippines ram Kibawe, Bukidnon khua ah December 17, 1978 ah a chuak. Pacquiao cu Rosalio Pacquiao le Dionesia Dapidran-Pacquiao nih an hrin mi a si. Pacquiao nih unau paruk a ngeih hna i, amah hi a palinak a si. A hngakchiat lio ah mi harsa ngai an rak si. An harsat tuk ruangah high school hmanh a rak dih lo. Tang ruk a cawn lio hin a nu le pa an rak i then. A chungkhar an khuasak ning a harsat tuk caah kum note a si hin inn pawng ah pawnghmoh (bread) a rak zuar. Pacquiao cu a ngakchiat tein vuak a huam tuk pinah a thiam zong a rak thiam. Pawnghmoh zuar pahah inn pawng ngakchia he tangka phalh in a rak i vua lengmang tawn.

Pacquiao te cu an harsat tuk ruangah high school hmanh kai kho loin a rak um. Sianginn kai kho lo dirhmun a si va tikah kum hleili a si hin Philippines ram an khuapi Manila ah a uar tuk mi boxing training kai dingah a rak kal. Kum hleiruk hrawng a si hin Pacquiao cu a thiam lengmang. A huam tuk vemi si caah hawihlei khin a thiam khun. Kum 1995 hrawng hin Pacquiao nih saduhthahnak nganpi a rak ngeihmi cu a hung tling chin lengmang. Kum hleiruk a si ah tangka phalh in a voikhaknak bik boxing kun ah Edmund Ignacio he an rak i thawng i, Pacquiao nih a rak tei. Cuticun, Manny Pacquiao cu a van awngmin chin lengmang i biatak tein laar hram cu a van i thok.

Upat hnu:

A nupi he

Vawlei cung boxing thongh thiam Manny Pacquiao cu May 1o, 2000 ah a dawt tukmi Maria Geraldine he an rak i um. Pacquiao le Maria nih fapa pathum le fanu pahnih an ngeih hna. Pacquiao cu boxing thongh thiam pakhat lawng a si lo. Philippines ram cozah riantu pakhat “congressman” zong a si. Cun, Pacquiao hi basketball kah le zoh zong a huam ngai mi a si. Boxing ai thongh lai paoh ah thlacam lengmang bantukin Pacquiao cu, a hngakchiat tein vawleicung Khrihfa buu ngan bik Roman Catholic zumhnak in a thang mi a si. Si nain, a tu cu “Evangelical Protestant” timi zumhnak in ai thleng cang. Laimi nih  kan biakmi Pathian Jesuh Khrih hi a bia ve cang. Pacquiao hi pa menlo tak a rak si! Philipplines ram ralkap officer pakhat “Lieutenant Colonel” pakhat a zong a si chih rih.

An family an fapa hniang chuah hlan

Pacquiao cu an harsat tuk ruang i high school hmanh a kai khawhlo ruangah fim cawnak ca taang lei in a chambau ngai. Sinain, khuruat kho lungfim pasal tha pakhat hrim a rak si. Fimnak ngeih lo si kho loh tiah, February 2007 ah high school kai loin college kai khawhnak ah exam lawng a rak phi i a awng. Kan mah US lei i GED kan timi bantuk he hin ai khat. Deparment of Education nih high school diploma tha tein an pek ve. Pacquiao nih an ram General Santon, Philippines ah business management in North Dame of Dadiangas University ah college a rak lim. February 18, 2009 ah Southwestern University in Honorary Degree of Doctor of Humanities a hmu rih mi a si. Manny Pacquiao nih an kum 2003 ah “Person of the Year” zong an ram Philippines ah a rak hmuh. An ram chung president pa zong a tei caah hnabeiseinak in political candidates ai cuh ve nain, a awngmin tuk lo.

Boxing Thonghnak:

Pacquaio le Sasakul

December 1998 ah Pacquiao cu Thailand boxing thongh thiam Chatchai Sasakul he an rak i thong. Pacquiao nih a rak tei i a voikhatnak bik World Boxing Council flyweight titile a rak hmuh ve. Kum 2001 ah a thawng, a thiam deuhmi pawl i thonghnak division ah a rak kai. Lehlo Ledwaba he International Boxing Federation junior featherweight titile an rak i thawng than i “Knock Out” in Pacquiao nih a rak thuat. Cucu, Pacquiao a voikhatnak US ram a rak i thonghnak le a voihnihnak title a hmuh a si. Cu title cu voi li tiang an cuh i an chut kho lo.

Pacquaio le Antonio

November 15, 2003 ah Pacquiao cu Mexican boxing thongh thiam Marco Antonio he Texas state ah an i rak i thawngh than. Pacquiao nih rawng hleikhatnak ah “Knockout” in a thuat i Lineal and The Ring Featherweight championship rak hmuh. Cu lio ahcun, Many Pacquiao cu Asian le Filipino mi vialte lakah division pathumnak tiang teinak a hmumi a rak si. Hi teinak championship hi voihnih tiang an cuh i an chut kho lo.

Pacquiao le Marquez

Thlaruka rauh hnu May 08, 2004 Las Vegas ah, Pacquiao nih WBA le IBF champion Mexican pa Juan Manuel Marquez a rak challenge. An rak i tluk ngai. An pahnih in a awng veve ding ah an rak i ruah. Si nain a donghnak biachahnak nih “i tluk” ah an rak chiah hna.

Pacquiao le Morales

Pacquiao nih sunghnak zong a hmuh ve. March 19, 2005 ah Mexican boxing thiam bik tive mi Erik Morales he WBC international le IBA titles an rak i cuh. Pacquiao a van chia. Erik Morales nih rawng hleihnihnak ah Pacquiao a mitlang tlek viar in thok i a rak sung. Sinain, Pacquaio ai cenet lo tuk ve caah a rak chelleng than ve. January 21, 2006 Las Vegas ah an rak i phomh than i Pacquiao nih a tei ve cang. July 2006 ah Oscar Larios nih Pacquiao cu WBC title a cuh ve nain a tei lo.

Paquiao le Hatton

Manny Pacquiao nih adang tampi a teimi hna an um rih. Kum 2008 ah Oscar De La Hoya he an rak i thawng i Pacquiao nih a tei. May thla kum 2009 ah Ricky Hatton he an rak i phomh hoi i Pacquiao nih rawng hnihnak ah “knockout” in a tei hoi. November thla kum 2009 thiamthiam ah  Miguel Cotto nih nih he an i phomh than i “technical knockout” in Pacquiao nih a tei hoi.

Pacquiao nih boxing tampi ai thonghnak ah lung ruah loin sunghnak a rak ton. June 09, 2012 ah Manny Pacquiao le Timothey Bradley cu an rak i thawng. Mah hi an i thonghnak nih Pacquaio fan tampi an ngaihchiat ter. Pacquiao lei mipi tampi nih a tei lai tiah an i ruah nain biaceihtu le hmak petu (judges)  pawl nih 115-113 in sunghnak an pek caah a si. Hi pin lei ah, Paquiao nih mitei a van i har deu. Las Vegas ah Juan Manual Marquez he an rak i thawng than i “knockout” in an rak tei than. Pacquiao ai thawnghnak ah a biapi deuhmi an si caah ka van langhter nak an si.

Pe nga le lemah paruk lawng si mi, Manny Paquiao hi a boxing thonnghnak a record zoh ahcun hiti a va sung hi a poi ah chiah awk a si lo. Voi 64 ai thawng i voi 5 lawng a sung. Voi 57 a awng i, voi 2 ai tluk. Cun, voi 38 “knockout” in a tei hna. Asian le Filipi no ah a mah bantuk minung an chuak rih lo.

Amah chan ahcun boxing thongh thiam bik pakhat a si. Online in a million nih an zoh. A ram mi nih an i uangthlar tuk pinah, amah thapek ding zong in USA an rak fuh lengmang. Paquaio zong nih an ram hi a dawt i biachim paoh ah a talh lengmang. Paquiao nih an ram chung tilet le thlichia hran zongah a bawmh tawn hna. A tuanbia zohah tihzah awk tlak pakhat a si. Pathian ai bochan ning le ai thongh lai paoh ah thlacamnak a ngeih lengmang mi ko khi kei ka uar khun.

Manny Pacquiao nih a dihlak title lakmi ah pa riat a si. Cun, boxing thoknak i class phun li an tuahmi ah a phun li ningin title in a hmumi a mah lawng si rih. Paquiao cu The Boxing Writers Association nih kum 2000 kum ah boxing thongh thiam cem "the best fighter" laksawng an rak pek. Atu hi WBO Welterweight champion a si. A hohmanh nih an chut kho rih lo.

Mi tampi nih biahalnak an tuah tawnmi cu Paquiao nih zeitluk in dah tangka a hmuh hnga tihi a si. Boxing ai thawngmi pawl an tangka hmuh ning ai lo bal lo. An i thawnghmi hna cungah zeizah man in dah kan i thongh lai le kan i miak lai ti biachah nak contrast an sign hlan ah tuah dih hmasa a si. Manny Pacquiao nih boxing ai thongh paohah million $15 hrawng hi cu a hmuh peng ti, a si. Cun, pay-per-view in an hmuhmi tangka hi 52% hrawng cu an hmuh rih, ti a si. Amah balte, an i thonghmi hna cung paoh ah a um lai bantukin Hatton he an rak i thongh hna ahkhan cun million $12 lawng a hmuh.Kan hnu kum ah Manny Pacquaio nih million $9 man inn zong a cawk. Cun, amah pumpak mongh ding mawtaw Ferrari 458 Italia $225,000 dih in ai cawk ve.

Ara lai dingmi May 02, 2015 Las Vegas an i thongh tawn lengmang nak ah Floyd Mayweather he million tampi dih in an i phomh lai. Hiti an ngiarnak hi a luancia kum nga khan a si cang. Maywheather hi voi 47 ai thong i voikhat hmanh a sung rih lo. An chan chungah boxing thongh thiam cem ti veve mi an si.  Vawlei cung a tur. Cable le ticket zong sport event tuah history ah tickets an zuar cem kum si lai, ti asi. A kenkip nih an i ngaih tuk caah biahalnak tampi zong an tuah hna. Pacquiao nih Pathian nih a ka umpi ko, ka tei hrim ko lai, a ti. Cun, voikhat hmanh a sung ballo mi kha keimah sinah a voikhatnak a sungh si lai, a ti. Ngaih um ko! Rak zoh cio vete uh! 

“Naa thawknak cu hme hmanh sehlaw, na donghnak lei cu a ngan lai.” (Job 8:7)

Zohchunhmi ca: totallyhistory.com / biography.com / wiki