Khrih Ah Pum Khat Kan Si

Bible ca Matthai 16:18 chungah Jesuh nih “khrihfabu ka dirh lai” tiah a ti nak kan hmuh. Hi Matthai 16:18 cu Bible ca chung i khrihfabu kong ai tial hmasa bik nak zong a si tiah an kan cawnpiak. Khrihfabu pakhat khat keimah nih ka dirh kan ti tikah mah hi Bible ca caang hi kan hmu hnga lo maw tiah khuaza ka ruat tawn.

Jesuh nih “khrihfabu ka dirh lai” a ti tik ahhin zeidah ai tinh mi a si hnga?! Ruah awk a um ngai. Jesuh nih tinhmi ngei loin zei thil hmanh a tuah lo. Kan nunnak a lak i, a cheu kan nunnak a kan zuahmi zong hi a sullam a um. Hihi i fian a biapi ngaimi a si. Kan i fian lo ahcun Jesuh hi kan ngenh peng ko lai. Zeidah a kan duhpiak mi taktak a si tihi kan hngal a biapi tuk hringhran.

ref. google

Jesuh nih “khrihfabu” ka dirh lai a ti tik ahhin ai tinh mi cu mibuu pi hmunkhat ah i funtom hi a rak kan duh piak bik mi a si. Jesuh nih mi zaapi kha hmunkhat ah i funtom i a mah thangt’hatnak pek a kan duh piak. Jesuh nih Khrifa buu cu a dawt zong a dawt tuk. Jesuh nih khrihfabu ca hin a nunnak tiang a pek tiah (Efesa 5:25) chungah kan hmuh. Khrih nih a nunnak a pekmi khrihfabu chung ahhin pakhat le pakhat i hmuhthiamlonak a um tik ahhin zeitluk in dah Jesuh a ngaihchiat hnga ti zong hi a ka ruah ter ngai tawn. 

Jesuh nih khrihfabu a dawt ahcun mi zaapi a kan dawt he ai khat. Jesuh nih a ka dawt. Mi khamhtu bawi a si. Ka caah a nunnak a pek kan ti paoh ahhin khrihfabu ca zongah a rak thi ve, a nunnak a pek ve ti hi chim ka duh mi a si. Krihfabu a dirhnak i khrihfabu caah a nunnak tiang a pek nak cu kan dihlak hmunkhat i funtom le i dawt hi a si.

Khrihfabu chungah kan um kan ti paoh ahhin Khrih chungah kan um tihi kan i philhlo ding a si. Hi ka ahhin fiang tuk in Bible nih a kan chimh:

Efesa 1:22-23

“Pathian nih zeizong vialte cu Khrih ke tangah khan a chiah dih hna i Khrih cu Khrihfabu lu ah a ser i zeizong vialte uktu Bawi ngan bik ah a chiah. Khrihfabu hi Khrih pum cu a si, Khrih nih zeizong vialte kha a tlinter i amah Khrih hrimhrim a tlinnak cu a pum ahcun a si.”

Zeizong vialte cu Khrih ke tangah a chiah. A sullam cu a hohmanh mifim, mithiam le mi lian kan um lo. Ai porhlaw ding zong a hohmanh kan um hrimhrim loh. Khrih ke tang ah a um dih mi kan si. Khrihfabu chungah mi ngan tuk le thil ti kho bik tiah minung sinak in rak i ruah zong hi an rak fawi te ve. Sihmanhsehlaw, nawl ngeitu bik le kan luu bik cu Khrih Jesuh lawnglawng hi a rak si ko. Amen!

Mah hi pum khat kan sinak chung ahhin zeitin dah kan nun awk a si ti zong Bible nih tampi fiang tuk in a kan cawnpiak chih. Mah cu a tampi mi chung ahcun mah hi Bible caang hi van char ka duh khun.

Efesa 4:2

“Tordornak lungthin ngei u, lungnem le lungsau in um zungzal u. Pakhat le pakhat i bawm u law, cuticun nan i dawtnak kha langhter uh”

Bible nih Efesa 4:4 ah “pum cu pakhat lawng a um i Thlarau pakhat lawng a um” a ti. Pum cu pakhat lawng a um bantukin kanmah zong Jesuh ah pum khat kan si awk a si. Thlarau pakhat lawng a um bantukin cu Thlarau chungah pum khat kan si awk a si.

Mah cu Pum khat a si mi ahcun miphun thleidannak zeihmanh a um ti lo. Khrih nih ai tluk tein a kan khamh dih. Jews mi lawng kha a khamh hlei hna lo. A daw hlei deuh hna fawn lo. Gentile mi deuh zong kha a khamh hlei hna loh. A daw deuh hlei ve fawn hna lo. Kan zaapi caah a thisen sung cu a thlet. Tuk le den ai huah nak zong Gentile mi caah deuh ah a si lo. Serhset le volhpamh a ton zong kha Jews mi hna deuh caah a si lo. Jesuh nih Jews mi lawng kha rak khamh deuh hna seh law a tu ahhin thihpi awk le nunpi awk a tlakmi Pathian a si hnga loh. Pum khat kan sinak cu a pum in a intuar mi hrimhrim khan a kan chimh.

Efesa 2:14

“Jews mi le Gentile mi kha miphun phunkhat ah a ser hna thawngin Khrih nih kannih cu daihnak a kan pek. Anmah a t’hentu hna vamping, ral a siter pengtu hna kha, a pum hrimhrim in a chimh.”

Jesuh Khrih a zummi vialte cu amah ahkhan Pakhat “pum khat” kan si. Ai tluk tein khamhcia mi lawngte kan si. A kan khamh cang bantukin amah a pum chungah a kan fonh chih cang. A Thiang Thlarau toih dihmi kan si. Mifir, damiah, Jews le Gentile ti a um ti loh.

1 Korin 12:13

“Cu bantukin kannih vialte zong hi, Jews mi kan si ah, Gentile mi kan si ah, kan dihlak in pum pakhat chungah khan Thlarau pakhat nih tipil a kan pek i kan dihlak in Thlarau pakhat kha din awkah pek kan si.”

A rel tu nan dihlak Bawipa nih thluachuah an ko hna seh.