"Ka saduhthah cu Khrih an theih bal lonak hmun i Thawngtha chim kha a si zungzal, zeicatiah midang i a hram an rak thawk cianak hmun i va sak cu ka duh lo."
Obadiah Outreach Ministry tuanbia tawi:
Saya Lal Thangzel cu 2009 ah India ah Bible sianginn kainak a dih. A rak tlung i Missionary riantuan hi a thinlung chungah a um. 2010-2011 chung Bangladesh ram i Rangamaty Hill Districs ah kan unau Chakma zum lomi phun sinah Thlarau tlaumi tleih ding le Pathian riantuan dingin a um. A karlak ah harsatnak tete a tong. Cucaah a bu in dirh hi a tha deuh lai i, ka riantuannak a ka bawmtu si lai pinah zum lomi tam deuh ka tleih khawh lai, tiin Obadiah Outreach Ministry/Mission cu a dirhmi a si. Hi bu hi, Pathian sinah thlacamnak fak piin ka ngeih hnu ah Pathian nih a ka pekmi a si, tiah a chim.
Hi bu cu July 20, 2012 ah dirhmi a si. Hi bu hi, politics ah i telnak (involvement) zeihmanh a ngei lo. Chittagong Hill Tracts ah a ummi zumlotu pawl an Thlarau tlau liomi tlaih le a zumtharmi caah taksa le Thlarau thancho khawhnak dingin zohkhenhnak tuahmi zong a si.
Tinhmi:
Hi mission riantuannak nih aa tinhmi cu Thlarau tlau tlaih lawng a si lo. Thlarau tlau an tlaihmi Khrih thawngtha bia in cawm le zohkhenh zong a si chih. Cun taksa lei zong in a herhning paoh in zohkhenh chih an si fawn. Ngakttah buangro le zumtu thar si hnu ah umnak hmun a ngei lomi zong tha tein zohkhenh hi an i tinhmi a si chih. Khrih zumtu a simi nule pa, pitar le putar zong tha tein zohkhenh hi an tinhmi a si fawn.
An riantuannak hmun:
An riantuannak hi Bandarban Hill District Chittagong Hil Tracts Bangladesh ah a si. Hmun li dan ah rian an tuan lio a si.
1. Thansi Area Bandarban Sub-district
2. Chimbuk Area Bandarban Sub-district
3. Antaha Para Ruangshary Area Bandarban Sub-district
4. Bandarban Town Area.
An riantuannak:
July, 2012 in July, 2013 chung i an Pathian riantuannak ah Pathian Thiang Thlarau bawmhnak thawngin minung 200 nak tam an Thlrau tlaumi an tlaih khawh. An dihlak in zumtu thar an si cang. Hi hna hi, Khrih zumtu an si ruangah hohmanh nih zohkhenh a tong lomi an si. Cucu, tipil zong tha tein an pek hna i an zohkhenh hna.
July, 2013 in December, 2014 chungah Bawipa Pathian bawmhnak thawngin zum lomi minung 150 nak tam an hmuh rih hna. Cun, kan unau Marma zumtharmi KOMLA khua i ummi zong Jesuh Khrih an zumh caah anmah Marma Community (zum lotu haotu) hna nih pehtlaihnak an phih hna. Tikah, an si fak tuk i, an harsa ngaingai. Cucaah, Obadiah Outreach Missionary (OOM) nih 2014 ahkhan facang Kg 400 an rak bawmh hna. Hi an riantuannak hmun hi zalong tein Pathian thawngtha bia aupi khawhnak hmun an si loh. A cheu missionary cu dawi le zaam a tongmi zong an um. Cun, Khrih zumtu thar an si bak hin an umnak khua chung community nih an tthawl tawn hna i an umnak inn le lo hi an chuahtaak theu tawn. Thlacampiak ngai an hau.
Cun OOM missionary pastor Lal Lian cu, October 2014 ah kan unau zum loim Mereng khua Bandarban District ah an thlah. Tlawmpal a um ah Private School te zong a dirhpi hna. Amah a va um hnu hin minung paruk a thar in tipilnak zong a pek chap hna.
Pastor Lal Lian cu hi a kalnak hin a chungkhar zong aa kalpi chih hna. Khat lei ah a fale a zohkhenh pah hna pinah Mereng khuate i ummi zong A, B, C, D a chimh pah rih hna. 2015 ahhin anmah holh in Khrihfa hlabu le Bible zong an chuahpiak khawh hna lai, tiah an zumh. Amahbalte, 2014 lio ahcun an khua chung ahhin zum lomi chungkhar 6 an um rih, nain 2015 ahhin cun anmah zong nih Khrih dawtnak an i fiang lai, tiah an zumh.
Mission riantuantu:
1. Saya Lal Thangzel (Executive Director)
2. Pastor Van Neih (Field Supervisor)
3. Evan Buag Tui Mro (Field Supervisor)
4. Missionary Lal Lian (Field Supervisor)
5. Pastor Borthol Tripura (Field Supervisor)
6. Lal Piak Ngak (Administrator in education department)
7. Pastor Lal Lian Sang (Literature Department)
An riantuannak hi a hmun li ah a si i, a khua in khuat riat ah a si.
1. Padui Khua. 2. Niadun Khua. 3. Amoy Khua. 4. Chita Khua. 5. Galilee Khua. 6. Marking Khua. 7. Antaha Khua le 8. Mereng Khua ah an si.
Hi hmun hi Local Church a ngeimi an si lo. Sinain, hmailei ahcun zumtu thar an van karh deuh chinchin te lai, biakinn zong an ngei chom ve lai, tiah an zumh.
Khrihfa Cang Ciami Zumtu Thar:
Atu an dirhmun ahcun zumtu thar 245 an si. Amin in Khrihfa simi minung 309 kan zoh chih hna, an ti. Hi hna hi, biakinn zong an ngei lo. Pumhnak caan zong an ngei lo. Thawhlawm zong pek a thei lomi le zohkhenhtu ngei lo an si hna. Atu ah OOM nih an zohkhenhnak hna thawngin anmah local tete cu tuamlawm ding a theimi an tam ngai cang.
Thil a chambaumi le an herh tukmi:
1. Missionary, Evangelist le Pastor riantuantu zohkhenhnak cu 2015 hin field thar LAMA area ah awn an i tim. Hi hmun hi zum lomi an tam taktaknak a si. Hi hmun hi a kauh ngai caah Missionary/evangelist minung pathum tal thlah kan hau, an ti. Cucaah, hi pastor le evangelist pawl hi an eidinnak le an thutdirnak caah tiin (monthly salary) bawmhnak an herh.
2. Motor Cycle hi an herh tuk. An riantuannak in Bandarban khua Headquarter kal hi an herh tawn caah kan herh tuk, an ti.
3. Ngakttah buangro nule pa ngei lomi zong an tam ngai caah bawmhnak tuah zong an duh ngai. Anmah tein inn hna sakpiak i, zohkhenh hi an duh.
4. Sun Sawng Junior High School caah cachimtu saya pakhat zohkhenhnak zong an herh taktakmi a si. Hi sianginn hi kanmah Laimi/Bawm umnak hmun ah a ummi pakhat a si i, bawmh an herh ngaingai.
Hi a cunglei item pali chung hin na duhmi te na thim khawh i na bawmh khawh hna.
Hi an mission riantuannak ah ahar bikmi:
An umnak Chittagong Hill Tract cu zalong tein le direct top in evangelism hi tuan khawh a si lo. Cucaah, indirect evangelism hin tuan a hauhnak tampi a um. Cun, phun kip sinah Pathian thawngtha bia chim khawh a si hoi lo. Pathian bia cawnnak zong fawi tein an tuah kho tawn lo. An caah a tha bik dingmi cu "hostel residential" timi inn hi i ngeih kho hna seh law a tha bik ding a si. Cu ahcun duhsah tein Khrihfa siter khawhnak dingah a lam tampi a um.
Catialtu nih careltu sin biacah:
Hi mission riantuannak ah careltu (nangmah) zong i tal khawh a si. Rak i tal ve ko, tiah kan sawm. Keizong kaa tal ve. Pathian riantuan khawhnak thazaang le damnak a ka pek chung cu pehzulh dingin kaa tim. Thlacam bawmhnak te zongin i tal khawh a si. Chawva, thilri ngeihchiah le, thazaang zong in i tal khawh thiamthiam a si fawn.
Hi mission riantuannak hi tampi in theih deuh na duh a si ahcun hi phone number (614-316-5472) hin chawnh khawh a si. A min ah Paul Za Cung Lian a si i Columbus, OH/USA ah a um.
Chinchiah: Semnaklairam.blogspot.com in hi an konglam hi ka lak chinmi a si i, kanmah Thantlang/Hakha ca in ka leh (translate) chinmi a si.
Rom 15:20
"Ka saduhthah cu Khrih an theih bal lonak hmun i Thawngtha chim kha a si zungzal, zeicatiah midang i a hram an rak thawk cianak hmun i va sak cu ka duh lo."
No comments:
Post a Comment