IF YOU DIE TONIGHT? HEAVEN OR HELL?

Kan hnu zarh cu Owensboro, KY ah bawlung chuih ah ka kal. Karen pawl nih bawlungpuai an tuah i an ka sawm ve. Khua hmete si nain Kawlram mi an tam. Laimi zong tlawmpal an rak um ve. Miphun thleidang loin ahopaoh nuam tein lentecelh khawh si dingin an tuah. A nuam ngai nain a linh balte a lin deuh. 

Hawi bantukin sunglawi ngai cun an tuah kho ve lo. Nain, miphun thleidennak zeihmanh um lo tein an tuah caah ahopaoh kan i tal kho. Minak, Miraang le ram dang an hawi/kan hawi le cio zong an i tal ve. Khatlei ka ruah tikah thil tha ngai ah ka ruah. Aruang cu, Kawlram mi kan cawlcangh ning le ka umtuning zong hi an hmuh pah ve awk asi. Miphun dang zong nih an kan theih deuh hoi la. Tikah, anmah lei nih soicelnak le thazaang peknak chungin thil tampi kan thlen khawh lai. 

Owensboro, KY cu ka umnak khua he nazi pathum le cheu ai hlat. Bawlung chuih ka huam tuk caah ka kal ve ko. Keimah lawng hla kai ngeih pah, kai zulh pah le nuam ngaiin ka kal ko. Cu ka kal i lamkam ah sanbawt nganpi (billboard) pakhat ka hmuhmi nih ka lung a ka tuaitaam ngai. US ram cu democracy ram ai theihnak ah zeipaoh zalong tein tuah khawhmi ram asi. Biaknak zongah zalong tein kanmah duhmi paoh biak khawhnak ram asi. Cucu "Freedom of Religion" an ti. Kan biaknak he pehtlaiin soisel le nihsawh kan ton ahcun tazacuainak nawl kan ngei. 

US ram cu Khrihfa ram tiah theihmi a si bantukin a kenkip ah Pathian lei hi hmuh pah lengmang asi theu. Vailamtah tung zong hmuh pah tawn asi. Khrihfa ram ai theihnak ah biakinn le bang cu a tam tuk. Nain, cheukhat biakinn cu members an tlawm. Miraang cheukhat biakinn an panh ti lo. Vawlei nuamhnak ah pil dih cang. Bible an kaltaak dih cang. Anmah le ruahning cio lawng tein khua an sa cang. Vawlei partlanhnak ah thuk tuk in an pil cang.

Mino le bang cu biakinn chung ah an hmu ti hna lo. Biakinn panh hi nutar patar ca'h lawngah an ruah. Pathian nii paoh ah homework tuah le dawr kal nii ah an rel. Hawi he i hmuhton caan ah an rel. Biakinn panh awk hrimhrim hi a ruah awk an thei ti lo. Khrihfa ram ai timi ram cu muihnak nih a thuam chin lengmang. Nule nu le pale pa i thitum khawhnak (same sex marriage) hna cheukhat state nih fawi tukin hnatlaknak an tuahmi te hna hi Bible he ai kalh bakmi asi. Atu ahcun state 50 chungah 37 nih hnatlaknak an tuah cang. Khrifa ai timi ram mit in van zoh ahcun ngaihchia taktak khi asi. Khrihfa ai timi Laimi phun zong an sin lak i khua kan sak tikah fak piin kan i ralrin ve a herh. An nun tha lo hi i cawn kan fawi te. Nule pa hna, nan fanu le nan fapa hna cungah rian lianpi kan ngei hih. 

Hi tluk a muimi ram ahhin, cheukhat Khrihfabu le community zong an cawlcang len ve. An si khawh chungin Pathian lei ah kir than hna seh tihi an i zuam ve. Ke zong in an vak i inn kip ah luh in Pathian thawngtha bia chim mi zong an um. Cun, billboard dang tampi ah biahalnak phun kip an tuah i, atanglei ah phone number te an chiah ta. 'Rak kan chawn hna sehlaw, Pathian bia kan ruah hna la' ti an duh caah asi. Cu bantuk billboard an tuahmi tampi lak i nai Owensboro, KY ka kalpah ah ka hmuh cu "IF YOU DIE TONIGHT? HELL OR HEAVEN" ti asi (John 3:36). Highway lamkam bak asi rih. Ka hmu le cangkaa in khua zaza a ka ruahter tuk! Hihi Khrihfabu pakhatkhat si lole, community pakhatkhat sinin van thlahmi cu asi hrim la. Pathian lei karhlannak caah an tuahmi zong asi la. 

Highway lamkam i ka hmuhmi billboard 

US ram cu nikhat zong i din sual loin mawtaw mongh asi. Rian tha tein tlaih ko ahcun mawtaw cawk zong a fawi ve. Europe bantukin tlanglawng, tinbaw le, bus ti bantuk hman tuknak ram asi lo. Cucaah khoika kan umkalnak paoh ah mawtaw mongh asi. Mawtaw kan mongh tikah mitthep bakin thih khawh asi. Kan iralring kan ti zongah hawi nih ttaih i thih khawh asi. Atu billboard i biahalnak an tuahmi zong cu 'mawtaw accident hei tong sual law, na thih sual ah Vanram maw na kal la hell ah?' heiti duhnak khi asi ko. 

Biahalnak mah le i tuah a phu taktak. Hi capar relmi zong rak ituah ve hrimhrim. Mawtaw na monghnak ah accident tong sual law khoidah na kal la? Hawi nih an in ttaih sual i na thih sual ahteh zungzal nunnak na co cang maw? High way ah na mawtaw ke kek sual sehlaw, lamdang pial in mawtaw dang he zong ittaih i thih khawh asi. Tuzaan ah thi ning law khoika dah ka ka la? Tuzaan ah thi law, khoika dah na kal ve la? Vanram ah maw hell ah? Jesuh na ngei cang maw? Jesuh nih, "keimah cu lam le biatak le nunnak ka si. Keimah sin dah ti loin cun ka Pa sinah ahohmanh an phan kho la lo" a ti (John 14:6). Pa sin phaknak dingah Jesuh kan herh. Zungzalnak ngeitu Jesuh kan herh. Jesuh ahhin zeizong te a tling dih. Jesuh kan ngeih ahcun teitunak in teitu kan si deuh. Jesuh kan ngeih ahcun ngeihlomi zong kan ngei lo. Jesuh ahhin vawlei fimnak, rumnak, le lungdaih hnangamnak vialte a tling dih. JESUH LAWNGLAWNG HI KAN ZEIZONG TE SI KO SEH!!