Manny Pacquiao Sungh Chinchap i Minchiat Cu Apoi Ko!

Pacquiao le Mayweather cu an i thongh hlan in vawleicung a tur. Zaapi nih kan ingaih i, a hngah kan hngak kho lo. Social network zongah anmah kong lawng te tial le rel cio asi. Hodah aitei te lai tiin tongte bawh in bawh cio asi. Pakhat le pakhat zong tangka tampi in ai betting (lawng) mi kan um lai ka zumh. Cheukhat riantuan mi zong vacation (day-off) tiang an la i an zoh ve. Vawleicung a turcawl ning le mipi kan i ngaih ning he tuak ahcun a phu tuk palia. Keizong ka rak i ngaih taktak ve. Amahbalte, Pacquiao sunghmi lam kha cu ka hacang kai rial, ka hmur kai bo i mithmai chia he inn ah ka lawi. Zeisihmanh ah, Paquiao cu ruah lo piin a sunghnak he petlaiin minchiatnak le mi nih ceihphai a tong. Social network ahcun Mayweather thawngpang a dai i, a sungmi Paquiao thawngpang tuhi a kenkip ah a leng. Cucu zei ko dah an si hnga van zoh hna usih. 

Mayweather caah naitan Pacquiao he an ithongh cu avoi 48 nak voikhat hmanh sung loin teinak a hmuh zaan a si. Nain, tuni May 05, ah Mirror.co.uk thawngzamh nih hmak petu (judges) pawl hmak peknak catlap (scorecard) an i palh rua, tiah an chim. Cun, Pacquiao nih tei dawh a si in an chim rih. Aruang cu, a donghnak i biahalnak an tuahmi hrimhrim ahkhan Pacquiao nih ka tei ko tiah a rak iruah peng ve. Naitan boxing cu thawngh cu a tiru tuk caah kan zoh viar ko lai. A konglam tampi chim hau lo. Mayweather cu thawngh awk tha loin a zaam thulh, a kuh thulh, a tlaih thulh. Tikah, Pacquaio nih a si khawh chungin a dawi i mih khawh cu ai zuam peng ve. Cucaah hmak petu pawl nih Pacquiao a cawlcangh deuh ruangh asi lai cu, hmak rak pek deuh dawh a si. A tanglei hmanthlak hi van bih law, Pacquiao nih tei dawh a si tiin an ruahnak cu na fiang theu ko lai dah. 

Pacquaio le Mayweather an thutnak hi zoh hmanh, an chim ningin si ahcun hmak peknak catlap i a sen 'red' (r) paoh hi Pacquiao a si lai i, hmak an pekmi a tam deuh bantukin Pacquiao nih a tei hnga. 

Hmak petu (judges) Glenn Feldman, Burt Clements le Dave Moretti nih hmak an pek ning hi phunthum in an tthen. 118-110, 116-112, le 116-112 tiin. Cun hmak peknak catlap (scoredcard) ah 'white', 'blue' le 'pink' tiin hmak petu hna pathum caah tthen si hnu ah boxing ai thawngmi an umnak (corner) an zawng color in hmak an pek hoi hna i, a fawinak in a sen ahkhan 'red' tinak ah (r) lawng an ti i, a dang khatlei tthunak corner i blue tinak ah (b) ti lawngin an tial ve. Hmanthlak chung i hmak an pek ning le an thutnak hmunhma he zoh ahcun Pacquiao tei nih tei dawh ngai cu a si. Hihi Twitters zongah a laar ngai. Cucaah mi cheukhat nih hmak petu (judges) pawl cu a thli in thil ningcang loin rian an ttuan, tiah an mawhchiat hna. 

Pacquiao hrimhrim zong nih khan, "ka tei bak ko, tiah kai ruah. Mayweather cu zoh hmanh a tuah ttung lo, a zaam lawng pei zaam peng ko cu, cucaah tha tein thongh awk zong a tha lo. Amah nak mitthawng tampi he a luancia caan ah kai thawng tuk cang. A tthawnnak (power) te hna cu ka zeihmanh ti lo", tiah Pacquiao nih a chim. 

Zeisihmanh ah, Pacquiao nih hiti a sunghnak hi a orhlei liang a rak irawk caah a si. Hi a liang ai rawhnak hi naitan an i thongh hlan zarh thum ai duh ah a si. Ai khawnmi a liang a fah tuk caah training ttha tein a rak tuah kho lo. MRI scan tha tein an tuah i an orhlei liang cu a tlek ti a si. An i thawng hlan deuh nazi pahnih hrawng ai duh ah fah theihlonak sii kan in chunh lai an ti nain, Pacquiao nih a duh ve lo. (a si khe la kati pah ve. Pacquaio hrimhrim nih khan awidang a mi thawngh ningin a thawng ruam lo ka ti pah ziar). 

Pacquiao hi nai a pianthar hnu cun Pathian lawnglawng hi a ruat. A kaa hin Pathian bia le min lawng hi a chuak. Pathian zong ai bochan tuk fawn. Cucaah hi bantukin siichunh zong a duhlonak hi a si lai ka zumh. Zeisihmanh ah, Pathian i bochan hi a rak tha tuk ko. Pathian i bochan si pinah "self-confidence" hrim a rak ngei tinak a si. Nain apoi tuknak pakhat balte cu "self-confidence" kan ngeih tuknak ahhin "over-confidence" kan ngei theu tawn. Cucu minung nih thil kan tuahnak ah iralring awk ah a herh ngaimi a si. Over-confidence ka ti duhnak cu kanmah le kanmah kan thiamnak le kan thilhti khawhnak kan i bochan zong khi sin pinah Pathian zong nih a ka umpi ko tiin luan tuk lehpek in mah le mah ruahchanak ngeih sual khi ka chim duhmi a si. 

A orhlei liang ai rawhnak kong a chim lio ref: google

Pacquiao orhlei liang cu tuzarh weekend ah surgery ai tuah lai. A tlawm bik kum khat a rau lai ti asi. Hi a orhlei liang ai rawhnak thawngpang cu a thang lawlaw. Pacquiao uarmi zapi zong an thin runh. Aruang cu, Pacquiao nih ai khawnnak zong media le mipi sinah zeihmanh thawngthanhnak a tuah lo i, an i thongh dih hnu sunghnak a hmuh hnu i theihternak a tuah ruang hin a si. Cheukhat media nih a chimnak le bangah Pacquiao hi thawng (jail) tiang thlak a phu, an ti. Cutluk cun an thin runh. An thin runh khunnak hi an i thawngh lai ah biahalnak an tuah hna. "Na liang, na kut, na baan hliah siseh nai hawndennak an um maw? A um sual ahcun a tawinak in van kan chim", tiah biahalnak an tuah i, Pacquiao nih, "um lo", tiah a leh hna. A fawinak in lih a chim kan ti lai cu. A ngaite kan ti ahcun Pacquiao nih a chim awk a si. Hi dantatnak hi, Nevada Athletic Commission nih an cozah phung (law) he pehtlaiin an ngeihmi (law) pakhat a si. Cucaah, Pacquiao nih cozah phung (law) a buar ti zong kan ti khawh tthiam. Cun hitluk in vawleicung mipi nih i ngaih ve i ruahning in an i thawng ve lo tik ahcun thin runh phu ve rengreng.

Pacquiano nih hi dantatnak a tonmi he pehtlaiin zei bantuk ciah dah a ton lai ticu bia fiang theih a si rih lo. Nain, million $5 cu Pacquiao le a management team nih an cawi hrim lai pinah, thawng kum 1 in kum 4 karlar chung a tla kho rih. Cun boxing zong i thawng kho ti lo dingin dantatnak (suspension) a ton khawh, tiah an chim. Lungretheih tuk awk um rih lo, "an thlak khawh chih men, a tong kho men" heiti sawh lawng khi a si rih. Biaceihtu (judges) pawl a donghnak an biakhiahnak cu kan ngai rih te hna lai. 

Hi boxing event cu "pay per view" ah dollars $100 in cawk a si. Mipi nih kan i ngaih tuk mi si ve caah lungtho tein cawk cio zong a si. Hi event i a chuakmi dihlak hi an tuaknak (estimated) ah million $350 tluk a chuak ti asi. Vawleicung hotel lian bik ah pahnihnak le sport arena ai fonh chihmi The MGM Grand Arena chung i thutnak 16,800 chungin $350,000 an hmuh. Cun, million pathum nak tam nih pay per view in rak zoh a si i million $300 nak tam a chuak. Hi zatzat tangka chuakin mipi nih kan cawk le kan zoh. Sinain, a thlithup in an rak i khawndennak mipi theihter loin an rak um i, mipi ruah ning le kan i ngaih tluk in thil a kallo ruangah hi bantuk dantatnak tiang a chuahnak hi a si. Hi an i thonghnak cu a thaizing 'Sunday' pumh dih bawlung kan chuih hnu ah kan hawi le ceihcum dih a si. An hmurka ka ngaih ziar hna tikah a nuam, a tha, timi hohmanh an um lo. Mayweather a tlik, a zaamnak kong lawng te khan chimceih cemmi a sipin ah tlangpi in an chim cemmi cu a "boring" tuk ti a si ko. 

Zesihmanh ah, Mayweather nih Pacquaio surgery ai tuah hnu i damnak a hmuhtthan tikah i thongh than a duh. Mayweather cu 2007 i a rak retired bal cangmi a si pin ah a tuhi kum 38 a si cang. September thla ah Amir Khan timi pa he an i thawng lai i, cucun boxing thonghnak in kai ding thai cang, a ti. (a retired cang lai). Hi an i thonghnak ding hi Amir Khan hrimhrim nih a sing-khaw (challenge) mi a si. Amir Khan cu Pakistan miphun a si nain Bolton, England a chuakmi le a tthangmi a si. Boxing voi 33 ai thawng ve cang. Hi chungah voi 30 a awng i voi 3 a sung. Knock out in voi 19 a tei ve hna.

Amir Khan le Boxers

Sihmanhsehlaw, Mayweather nih, "Pacquiao he voikhat in i phomh than rih usih law ka duh ko", tiah a chim. Zeitik ah an i thongh lai le Pacquiao nih zeitin dah a leh te lai ticu zeihmanh theih rih a si lo. A fiangmi cu, Pacquiao nih surgery ai tuah hmasa hau. A tlawmbik thla 12 (kum khat) a kuah lai caah ai dinh hrim hau cun. Pacquiao nih biahman chimlo ruang i tazacuainak a tonmi kong zong hi biafiang tha tein theih dih hmasa a herh. Theilo cun million $5 cawi hnu ah Pacquiao hi thawng zong kum 1 in kum 4 karlak thlak khawh a si. Cucaah Mayweather nih Pacquiao i thongh tthan a duhnak kong hi zeihmanh biafiang theih khawh a si rih lai lo.