Ka Sianginn Kainak Palikpa Nih Minakpa a Kah Hramhram Ve

U.S ram palik pawl hi ttih an nung chin lengmang. Tu kum hi an zual khun. US ram state tampi ah palik nih mi an thah hna. An palh pek, palhlo pek ah an kah mei ko hna. A hlei in minak ko hi kah an tong khun. Micheu nih cun, "an si awk a si ko, minak cu hawi pei an lawh lo tuk cu" tiah an ti theu. Nain, Minak pawl hi an rak palh thlu ve loh. Palik pawl an riantuanning hi an rak hrokhrol tuk ve ko. Cucaah, US ram state dangdang ah buainak tampi a chuak. Missouri, New York, Baltimore le South Carolina ah minak pawl fak piin an rak buai len cang. Minak pawl nih, "Mithleidennak an kan ngeih" an ti. Mawtaw zong mei in an khangh dih. Dawr zong an den, an khuai. Khuachung bus zong lung tiangin an cheh i mipi biatak tein hnahnawhnak an pek hna. Meithal tiangtiangin a puahmi an um rih. Hi tlukinMiraang pawl nih Minak zei ruaram loin an kah hna ruangah buainak a chuakmi cu ka umnak le ka sianginn kainak pawngah a hung cang phut ve.

Palikpa le a kah hrammi Samuel DuBose 

Hi an i kahnak hmun hi kan inn he aa hlat lo. Minute zeimawtzat te kal lawng a si. Hi kahnak hi ka sianginn kainak University of Cincinnati he zong aa neih caah sianginn zong zinglei 11:00 am cun khar dih a si. Office zong khar dih a si fawn. Hi a kaptu palik pa hrim hi ka sianginn kainak UC ah rian a tuanmi a si. Sianginn campus chung i buainak a um caan ready in chiahmi palik a si. 

Samuel DuBose hi a kah hramram mi a si. Zeidang tampi chim awk a um lo. Obama nih palik an riantuannak hi zumh awk an tlak deuh nakhnga, tiah Video camera palik pawl an ttang ah benh khawhmi a rak serter hna. Zumh awk an tlak lo tuk ruang le an hrokhrol tuk ve caah si. Hihi, Hilary Clinton zong nih thazaang a pek ve. Cu ttang i benhmi video camera cu hi palik zong nih tha tein aa hruk ve i video camera nih a record mi zong tha tein an langhter. A kah hramhram bak ko. A kahning cu hitihin a si. 

A chungkhar he

Voikhat te palik bialeh ruang i kah cu a fak tuk. A chungkhar le a unau zeitluk in dah an temtuar hnga ka ti! Samuel cu mipoint ah a dir. Palikpa Ray nih Samuel a mawtaw hmailei i plate licence a um lo ruangah rice and valencia street an i tonnak ah a dirter. Palik pa nih bia a van hal i, "zeihmanh a hman lomi thil ka tuah ttung lo?!" tiah Samuel nih a van leh. Cu cangka cun, palikpa a kehlei kut in a lu cu a tlaih i hmuahchih in a orhlei kut meithal he a lu ah a kah. 

Hi thil hi July 19 ahkhan a cangmi a si. Palikpa nih Samuel DuBose (kum 43) a kah tikah palikpa nih, "zaam aa timh caah ka kah" tiah lih a rak chim. Sinain, Cincinnati i ummi Minak le mipi tam deuh nih an zum lo. Zeicatiah, palik kut in mipi tampi an thih caah hin a si i lunghrinhnak an ngei. Cucaah, ni 10 chung "a ttang i aa benhmi video camera cu mipi sinah rak kan thlahpiak uh" tiah mipi nih an hal hna. Protest an tuah. Tikah, tuni ah ah van chekhlat than i an van zoh tik ahcun palikpa nih a rak kah hramhram tak ko.  

Hringtu a nu

Ray Tensing cu Hamilton County court ah an kalpi colh ve. Joe Deters (Hamilton court i riantuannmi) nih "kum 30 chung hika hin ka tuan cang i, hi bantuk zohchia in mithahnak hi a voikhatnak ka hmuh a si. Hi palikpa nih US palik tuan ding zongah aa tlak lo" tiah a chim ve. Citizenship lawngte a simi minung 12 nih a kong tha tein an ceih. Kum 15 chung thong an thlak la. A rian zongin an fired (chuah) lawlaw ve. 

Laimi zong hi US ram ah palik nih tlaihkhih kan tong lengmang. Speed limit luan sual ruangah siseh, siikaan ngeih lo ruangah siseh, tlaihkhih tongmi kan tam. Tangka cawi le zan khat zaan hnih thongtlak lawng hi kan tong rih. Acheu cu, zuurit ruang i tlaihkhih a tongmi hi kan tam theu. Kan zuurit bu hna in palik pawl hi let sual hna usih law an kan kah top ve khawh. Laimi zong nih palik nih kan tlaih tik hin ralring tein kan um a herh. Tukar hrawng US palik pawl an cawlcanghning cu ttih an nung taktak khi a si. 

Samuel a ruak. Church of the living biakinn in an chuahpi lio

Hi bantuk kahnak hi Cincinnati, OH ah a voikhat a si. Minak pawl balte Baltimore le Missouri an buai bantuk cun buai dawh an si lo. An dai ngai rih atu tiang cunn. Mithleidennak nan ngeih, tiah an buai sual ve ahhin cun apoi tuk la. Cincinnati, OH area hin Laimi 300 fai kan um. Thantlang le Hakha deuh kan si. Cincinnati, OH cu US ram i Laimi an chah biknak Indianapolis, IN he nazi 1 le cheu te mawtaw mongh a si. 


Zohchunhmi ca: http://www.theatlantic.com/politics/archive/2015/07/body-cameras-sam-dubose-tensing/399953/

http://www.cincinnati.com/story/news/2015/07/29/publish/30830777/