Nawlbia cu Miraang nih "command" an ti ko i, Lai holh in "fial" le "nawlpek" ti a si. Jesuh nih nawlbia a kan pek tik hin hnek sawhsawh men dingah a kan pe lo. Nitin kan nun ah an biapit tuk caah "tuah uh" tiah nawlpekmi kan si. Fialmi kan si. Jesuh nih John 14:15 chungah, "nan ka dawt ahcun ka nawlbia hi nan zulh hna lai" tiah a kan chimh.
Jesuh nawlbia hi a tor. 40-50 hrawng cu an si, tiah Institute in Basic Life Principle nih an chim. An dihlak tial ahcun a sau tuk lai caah a "biapi bik" ti ka ruahmi 7 in ka van char. Thlacamnak he rel law, thazaang rak la ve.
John 14:15
"Nan ka dawt ahcun ka nawlbia kha nan zulh hna lai."
1. Pakhat le pakhat i daw uh
John 13:34-35
"Nawlbia thar kan pek hna: Pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai, tiah a ti hna."
Keicu Jesuh zumtuk ka si. Keicu Khrihfa ka si (I am Christian). Keicu Jesuh hnu zultu ka si, tiah kan kaa in i chim len a hau lo. Pakhat le pakhat kan i dawtnak thawngin a zultu le Jesuh zummi kan si hi zum lomi hna nih an kan theih khawh ko.
2. Nan ral caah thlacampiak hna uh
Matthew 5:44
"Sihmanhsehlaw, kei nih cun, hitihin kan ti hna: Nan ral kha va daw hna u law an hremtu hna kha thla va campiak hna u."
Tuchun zumtu kan nun ah a har bik si la, tiah ka zumh. Kan kong an kan ceih zongah dawt kho hna usih. An kan mawhchiat zongah thlacampiak ko hna usih. Cun, Krihfabu chung i buaibainak um zongah hin, pakhat le pakhat thla i campiak hi um sehlaw, kan i dawtnak a thawng hnga i buu kuainak te hna zong hi an rak um hnga lo.
3. Nan sual i ngaichih uh
Matthew 4:17
"Cu caan thawk cun Jesuh nih, "Vancung Pennak a nai cang caah, nan sualnak kha mertak cang hna u," tiah a chimh lengmang hna."
Kan sualnak hi, "aw, a si tak" tiah voi tampi cu kan i ngaichih. Nain, nile caan a rauh hnu cun kanmah buan kan si than tawn. Zeicahtiah, Adam sualnak in aa thokmi kan chung i a ummi "sualnak ci" ruangah a si. Sihmanhsehlaw, Amah Pathian sinah nifatin thlacamnak le Bible relnak nih thazaang a kan pek khawh than tawn.
4. Jesuh cu Pathian fa a si kha zum uh
John 14:11
"Kapa chungah ka um i Kapa cu ka chungah a um kha zum ko u. Cucu nan zumh khawh lo a si le hi thil ka tuahmi hna ruang tal hin zum ko u."
Jesuh cu ka khamhtu a si (Jesus is my savior) ti le Jesuh le Pathian an i lawh hi hngal hna seh ti a kan duh taktak. Jesuh cu Pathian fa a si le, Pathian nih van thlahmi si hi rak ka hngal hna seh ti zong a kan duh zungzal. Kebei a damter. Mitcaw khua a hmuhter. Mithi a thawhter. Sihmanhsehlaw, an rak zum kho thiamthiam lo.
5. Nai vailam tung i put law ka zul
Matthew 16:24-25
"Cun Jesuh nih a zultu cu a thawh hna i, "Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh."
Jesuh hnu kan zulh tikah hin, kanmah le kanmah zong i dawt ngah ti lo. Kan nunnak zong biapi ah chiah a ngah ti lo. Chungkhar le salawh unau zong biapi ah chiah a ngah ti lo. Amah ca'h bak hin kan thih i, harnak kan intuarmi vialte zong hi Amah ca'h hrim ah siseh ti a duh.
6. Thlacam zungzal uh
Luke 21:36
"Hi a tlung hnga dingmi thil vialte hi him tein chuak lakin nan tan khawh nakhnga, thazaang nan ngeih nakhnga le Mi Fapa hmaiah nan dir khawh nakhnga, ralring tein um ulaw thlacam zungzal ko," tiah a ti."
Hihi, Jesuh nih mi a cawnpiak lio hna ah ralrin a herhnak kongah thlacam zungzal dingin a kan fialmi a si. Tukforhnak chungah nan tluk sualnak hnga lo a zungzal in thlacam uh, ti zong Cathiang chungah a um fawn. Zumtu simi nih kan rian ngan bik pakhat cu thlacam hi a si. Pumpak in thlacam mi le a cam lomi cu an i dang hrimhrim. Chungkhar le Khrihfabu zong cu kan i dang hrim ko. Kan theitlai in a lang.
7. Hihi ka duh bikmi Jesuh Nawlbia a si. "Kal ulaw, mi vialte kha ka zultu ah va ser hna uh"
Matthew 28:19
"Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u."
Carson le Laura cu an umnak ram an chuaktaak i Pathian zultu ser dingah Lairam tiang an rak phan. An i tinhmi a tling taktak. Tuni ah Laimi cu anmah thawngin a nung Pathian zumtu/zultu ah kan i cang. Nang le kei zong leiba nganpi kan ngei. US ram an tlau tuk cang hih. Jesuh zultu le zumtu ah ser ve cang hna usih.
"Jesuh na daw maw?" tiah i hal usih law "daw" kan ti dih lai. A hmasa ah ka tial cang. Cathiang chung zongah kan hmuh. Jesuh bia bak a si fawn. "Nan ka dawt ahcun ka nawlbia hi nan zulh lai," a ti. Jesuh cu kan dawt dih caah Jesuh nawlbia zulh khawh i zuam lengmang ko hna usih.
No comments:
Post a Comment