Ka Philh Khawhlo Dingmi CBCUSA P&W Concert le Youth Consultation

US um Lai mino hna hi kum khat hnu kum khat kan thangcho chin lengmang. Sport lei zongin kan thangcho. Naitan CYO final i Seattle le Amarillo an chuih hna cu Pro team bak an si ko. A zoh an dawh tuk. Fim cawnnak lei zongin kan thangcho. Tu kum chung lawng i CYONA nih thawng an thanhmi ah Lai mino chungin degree thatha a hmumi le scholarship tampi a hmumi an um. Min thatnak hmumi zong an tor rih. A sung lawi taktak. US Lai mino hna nih kan thanchonak a lam tampi lakah pakhat cu music lei hi a si ve. 

Thinlung dihlak in Pathian thangthat lio

Hlan ah ka rak tial cang bantukin kan hnu zarh July 11 (Saturday) i CBCUSA Youth Department nih kan umnak Cincinnati, OH ah an tuahmi Youth Consultation le P&W Concert cu ruahnak lengin a nuam. A nuam taktak khi a si. CBCUSA Youth Department Bawipa nih thluachuah chin lengmang ko hna seh! Ka chan chung concert ka kalmi vialte lakah kaa lung hmuih bik a si. Thlarau leiin thazaang tampi ka lak lawng siloin, chun program i youth consultation tuahnak ah a kan cawnpiaktu Pastor Rev. Charles Nunuk sin hrimhrim in thazaang tampi kaa lak. 

Pastor Rev. Charles Nunuk

CBCUSA Youth Department nih P&W Worship concert lawng siloin Youth Consultation zong an rak telh chihmi hi a tha kho tuk. Kaa lunghmuih tuk. Zeicatiah, a kan cawnpiaktu sinin thazaang tampi kaa lak. Cawnpiak zong a thiam caah lungluh a fawi. Ka note book zongah tampi kaa tial sek. An kan cawnpiakmi pawl hi tuchan Lai mino hna nih kan theih herhmi lawngte an si. Ka hawile riantuan ruangah a ra kho lomi ka sia an herh taktak. An kan cawnpiak mi cu a tlangpi in Khrihfabu kong, pekchanh kong le nifatin kan nunnak i kan herhmi lungput kong pawl hi an si. Cawnnak lio ah pumpak in ahopaoh nih kan ruahning le kan hmuhning zalong tein kan chim cio. Hi kan ruahnak cio kan chimmi nih khua kaudeuh in a kan ruahter caah a hlawk khun.

Cawnpiaknak a that tuk ruangah ka hawile dang hmaichia in ka tuah sual hna. Cawnpiaknak kan tuah lio ah kan ule pahnih innka hramah phone an dek i an thu ko. Hi tluk cawnpiaknak a that lio i innka hram phone an deh ko mi cu ka thin van ka hung pah ziar. Cucaah, "ziah, innka hram ahcun nan thut ko?! Hi tluk cawnpiak a thami hi khoi dah nan lak ti la?! Rak lut uh! Kan caah theih tha lawngte an si. A biapi in zumtu Khrihfa kan nunnak le nifatin khua kan saknak ca ko khin a kan bawmtu an si hih" tiah ka hei sik hna i an rak lut. A hnu i ka theithanmi cu, mi an rak don tu a rak si. Cawnpiaknak zeitluk a that kha an rak thei tak ve ko. 

Hruaitu tha Jesuh nih a zultu pawl 'toidor nun' training a pek hna lio

Laimi cu zeilei paohte ah training pek a rak herh ngaimi kan si. Miraang holh zong pakhat hmanh kan thiam lo nain a cawn kan huam bak lo. A chunh in chunh hau phun in kan um. Cu lawng siloin, kan pale mifim thiam nih training pek dingin kan Khrihfabu sin i an rat caan zongah caanpek ahohmanh kan huam lo. Laimi cu training pek a herh taktakmi kan si nain biapi lo ah kan ruah top ko. Hruaitu tampi zong training kai le cawnnak pawl hi zei ah kan rel lo. Jesuh nih a zultu pawl hmanh kum thum chung training a pekta hna, ti a si. Training zong kai huam lo. Cawnnak zong kan ngeih lo pinah kan huam bak fawn lo. Mah bu cun meeting ah kan bia hna an hak ngai tawn rih. Meeting ah a tule tu kan dir i bia kan chim rih. Hruaitu pakhat a simi nih cun, training kai le cawnnak phun hi a huam awk hrimhrim a si. A si khawh cun cawnnak zeimawzat tal rak ngei hi a herh hrimhrim ko. Khrihfa bu kan kuai lengmang nak zong hi hruai thiam lo zong ai tal. Cucu, tuni hruaitu a simi kan dihlak nih fiang hna usih law, training kai le cawnnak phun paoh hi thazaang pe hna usih. 

Hi biakinn hi a lian ngai nain minung kan khat dih ko

Tuchan mino nih Praise & Woship cu kan duh dih lai ka zumh. Nain, pumnak biakinn ah duhning in zeitikhmanh ah ai sa kho loh. Laimi cu caan kan upat lo caah kan pumh thok tlai ruang zong hin a si pah. Pinah, kan pale cheukhat nih hin an rak i ziak ve lo. An mawh lo. Mino zong nih kan theithiam ve hna awk a si ko. Annih cu CBC hlabuu dah tilo cu an tui kho ve lo cu teh. Cucaah, ai zat tein Pathian kan biak tik zongah amah thangthatnak hla kan sak ve awk a si ko. Keicu, anmah Thlarau caah thazaang an laknak ding a si ko ahcun CBC hlabuu lawngte sak zong apoi ah ka chia lo. Zeitintiah, Krihfa caah kan nung kan ti cu, mi ca'h i nun khi a si.

An cawn lio a si

Atu i Praise and Worship group cu adang pawl he an i dang. An i dannak cu 'thlacam nun' an ngeihmi hi a si. An hlasak dingmi vialte Bawipa sinah an pekchanh dih. An pum le an nunnak zong an pekta dih. Zinglei pathum, pali tiang Pathian sinah thla an cam. An program vialte le an caan hmannak ding vialte Pathian sinah pekchanhnak an ngeih. An minung sinak menmen zeihmanh bochan awk a tlak lo zia an i fian tuk caah Thlarau thawnnak an sawm. Thiang Thlarau bawmhnak lo cun zei thil kan tuahmi hmanh hi san a rak tlai hrim lo. Tikah, hi bantuk in Pathian sinah thlacamnak le timhtuahnak fak piin an ngeihmi hrimhrim hi ka upat tuk hna. 

An program vialte Pathian sinah pekchanhnak an tuah lio

An thlacamnak zong a nung i Pathian nih a leh hna tihi fiang tukin a lang. Zan concert a rami nih hlawknak tampi kan hmuh. Thlarau thianghlin an sawm bantuk in Thlarau ai phuang taktak. Thlarau umpinak thawngin mi tampi nih Thlarau thazaang lila ah hlawknak kan hmuh. Mitthli he Pathian kan thangthat. Zeitin le zeitindek caan a kal manh zong theih a si lo. Keimah pumpak hrim nih hlawknak tam tuk ka hmuh, tiah tehte van khan lawlaw ka duh. Ka nun hi a zaang dih. Ka retheihnak vialte zong an dam. Ka lungretheihnak le thatbaatnak vialte zong an tlau dih. Bawipa min ka thangthat hringhran. 

Bawmtu Thiang Thlarau an sawm lio

Lawi pah in ka thlahmi ka hawile dang zong an ruahning le an hmuhning ka hal cio hna. Ka hawipa pakhat nih, "an thiam tuk nakah ka ngeih hna a chia" tiah a ka leh. Anmah hi pumh zong a huam lemlo mi a si nain biatak tein thazaang a rak ti hmuh khawh a si. Praise and Worship concert chung i tehte a khangmi Pa Bawi le Rem Rem zong nih thazaang tampi an kan pek fawn. Anmah nunnak i an tonmi bak an chim caah hmual a ngei khun. Mi lungthin chung zongah rian a tuan. Tehtekhannak cu, mi caah i thazaang laknak a tha bik hriamnam pakhat bantuk a si. 

Pathian sinah thla an cam lio

CBCUSA Praise and Worship group cu an thiam kho tuk. Hi an tuahmi "Youth Consultation and Praise and Worship" hi na kal rih lo a si ahcun rak kal ve hrim. Naa chir bak la loh, tiah bia kan kamh ngam. Cun, khat lei ah ka sia hrimhrim nan herh. Cucaah, siaherhnak nganpi he hi ca hi ka tial. An thiam tuk! tiah van nolh rih ko ning. Pathian nih kan Lai mino chungin hlasak thiam tampi zong thlua a kan chuah. Kum khat hnu kum khat a thiamthiam an karh peng. Hi hna nih Pathian an duh i, Pathian thangthatnak hlasak bak ah a vakmi an si. A cheu vanlawng in an a ra. A cheu nazi tampi rau in Bawipa sunparnak caah, tiah an ra ko. Zaan zongah an mitkuu a cim men la loh. Sihmanhsehlaw, zei thil kan tuahmi paoh hi minung caah a si, ti lungput ngei loin Bawipa caah kan tuah timi lungput tu kan ngeih ahcun zeibantuk harnak caan zongah tuar khawh a si ko. 

Music Group: Alvin, Van Tin Thang, Sang Za Hmung, Bawi Cung Lian, Tluang Kip Thang le Daniel

Music tumtu zong an tiru hoi! An angki hruk he hro zong an kual. Laimi hi Music lei ah kan thangcho tuk tihi anmah hmang in a lang khun. A tumtu zong hi mino tete Pathian a duhmi lawngte an si fawn. Music a uarmi ka silo nain anmah thawngin biaktak tein music tum ve ka lungah a chuak. Hi tluktluk a thiammi lawngte an vah i, local Khrihfabu kip ah Pathian thangthatnak hlasak ding an tum cu i lunghmuih um tuk. Pathian nih amah sunparnak caah hmang chinchin ko hna seh. Hi Praise and Worship group le music lei an hruaitu bik cu Saya Sailo Thang a si. Anih hi, mino te a si nain Pathian nih a hman taktakmi a si. Music le Praise and Worship lei zongah Khrihfabu kip ah training a pe tawnmi a si. Hi program vialte zong hi amah nih a tuaktan mi le a hruaimi hna an si. A fimthiamnak le pahrang Pathian sunparnak caah hmang chinchin ko seh. 

CBCUSA Youth President Sailo Thang le group

CBCUSA Praise and Worship group le Youth Consultation cawnpiaktu hna cu hi pinlei zongah an vak rih la. An cungah kan i lawm tuk. Local Khrihfabu thazaang tampi an kan pek. Free in hmuhmim thil ahcun, hi an tuahsernak hi vawleicung ah a hlawk bik a sila, tiah ka zumh. Ca reltu nan umnak khua le a hrawnghrang zongah an ra te kho men. An next tour cu August 01 Atlanta, GA ah a si la. Rak kal ve hrimhrim. Thazaang tampi na hmuh la. Na taklawng in na kir hrim lai loh. 

Awzai leiin Pathian mi hman P&W le Music group pawl