Theihtlei: Rian Interview Kal Tikah a Herh Taktakmi Timhtuahnak

Rian caah interview kal cu zeitlukin naa timhlamh zongah thin a phang tawn. Nain, biatak tein timhlamhnak na ngeih ve ko ahcun na duhmi rian fawi tein hmuh khawh asi. Timhlamhnak ngeih hi an rak biapi taktak. Rian kan sok tikah rian ngeitu nih midang tampi an application le resume an rak chekhlat dih. Cu lak ahcun a tha, a rem bik la tiah an ruahmi minung paoh kha interview tuah dingah auh asi tawn. Interview tuah thawngin rian hmuh tinak a si lo. Interview an kan tuah tik i timhlamhnak zeihmanh kan ngeih lo ahcun adang interview an tuahmi hna nih an kan tei lai i, rian hmuhlo khawh a fawi te. Cucaah, zeitindah rian kan sok hnu i interview an kan auh tikah timhlamhnak kan ngeih khawh la timi tawi tein ka van thai. 

Chan hi a kal rang chin lengmang. Minung zong an fim chin lengmang ve. Ram thatnak ahcun an thutdir ning hi a sang chinchin. Ram a thangcho lemlo tiah ruahmi zong theihlo karah an rak thangcho ve. Tikah, rian ngeitu (employer) pawl tiang hmanh nih riantuanmi caah an kan saduhthah piak mihi a sang chinchin ve. Kan company tha chin seh ti an duh. A chung riantuanmi zong mifim cathiam le sianginn lei cawnnak degree a ngeimi si hna seh ti an duh. Zeicatiah, an company caah a thathnemter lai i, hawinak in thil dang tampi an sersiam khawh la ti, an zumh caah asi. Cucaah, rian interview tuah dingin an kan auh tik zongah an rak kan ngiat taktak. Kan thutdir le kan mihoiher an rak kan bih. A thli tein an rak ngiat ziarziar hi i philhlo ding. Cucaah timhlamhnak tha tein kan ngeihta hnu lawngah rian interview an kan auhmi ah kal ding. 

Rian interview na kal lai ah zeidah interview an tuahtu hna nih na thatnak kong thei hna seh ti na duhmi kha tial hna. Na kal hnawhmi rian ca i na thiam biknak. Na thilti khawh cemnak (strength) pawl kha i ruat, i ruat law tial hna. A tlawm bik panga tal na tial a herh. A fawinak cun mah hi na rian sokmi he pehtlaiin laksawng le minthatnak na hmuhmi tibantuk. A luancia caan ah experiences na ngeihmi le na ziaza he aa tlak ning pinah lungthawhnak na hmuhmi pawl kha tial ko hna. Cun, a dang riak sok vemi pawl he naa dan khunnak le zeitluk in dah a tu na sokmi rian hi ttuan na duh timi hi biapi deuh in na tial hna la. Aruang cu, interview an tuahtu hna nih an in hal te khawh i, fawi tein na leh khawh hna la (interview tuah lio ah i ruah len hau tilo in). Interview an tuahtu nih an hal lo hmanh ah a donghnak interview dih hnu ah na chimh khawh thiamthiam rih hna. Na caah miaknak tampi a chuak la. Interview an tuahtu hna lung a luhter khun. 

Rian interview na kal tikah thil hrukaih thiam zong an rak biapi. Na kal lai ah thiang tein naa kholh la. Na sam zong tha tein i hriat. Zihmui zong a herh ningin i kaap ko. Jean bawngbi i hruk lo ding. Zoh dawh tein kal i zuam. Tumbul le tthi i oih lo ding. Zeihmanh tai ah siseh, kut ah siseh i thlaih lo ding. Nangmah interview an tuah dingmi bantuk tein i hrukaih ve. Na rian sokmi management le office rian hna si ahcun suit i hruk ko. Zoh dawh (formal) deuh tein thil hrukaih i zuam. 

Ti hin i hrukaih ding

Keden zong a hruk nuammi le na zaatmi te i hruk. Interview an in tuah dih in an company chungah an in chawhpi khawh. Acheu cu kedil sang hna an i hruk sual tawn i an kedil a fak tuk caah sau an i chawk kho tawn loh. Kan i denhmi keden zong thianghlim tein hnawhta ding. Na sam zong a buat tuk ahcun i riam ta law a tha. Na ha zong thiang tein i hnur. Nu simi nih hnuk a lang tukmi i hruk lo ding. Skirt zong a tawi tukmi i hruk lo ding. 

Bia an in hal tikah rianrang tein leh khawh i zuam. Na hmai panh tein chia peng. Mirh peng. Smiling face ngeih khawh peng hi a biapi tuk. Na thut tikah ding tein thut khawh i zuam. I ngerh tuktak hlah. Na kut zongin phone le adangdang zong dek len lo ding. Khunrang tein zei thil paoh tuah i zuam. I hliphlau peng. Bia an chim tikah anmah kha zoh peng hna. Eye contact timi mit le mit i zoh khi a biapi. Khaicek khai lo ding. Zeitluk in dah na sokmi rian na duh le mah rian kongah na vikvak that kha langhter peng. 

Rian interview na rat tikah na resume van i put chih. Na tuanbia hi a si khawh chungin theihter hna. A hlan na tuannak company i na tuahmi thil paohpaoh kha theihter khawh hna i zuam. Tahchunhnak ah memo, a Ballpen le catlap phun zong van i ken chih. Interview  an in tuahpah in biahalnak na ngeihmi tete kha tialnak caah. Notepad zong apoi lo. Rian interview na rat tikah tlamtling tein a hlan na riantuannak le na sianginn kainak a nii le thla tling tein van i put chih. Application form a thar zongin an in fill up ter khawh. 

Interview an i tuah lio silo, an in tuah dih ah hi pawl hi tial hna. Interview an tuahtu a min. Interview an tuahtu nih an uar biknak zeidah asi. Interview an i tuah lio i biachim naa palh sualmi le na siaremlonak tete kha tial hna. Aruang cu, follow-up letter le phone in na hei theihter khawh than hna. Follow-up letter cu interview an kan tuah hnu i ni hnih rauh hnu ah an sinah lungtho ngaiin lawmhnak biachimhnak cakuat asi. Cun, anmah nih an kan duh chinchinnak hnga le an kan auh zokzok nak hnga caah ca tlawmpal te hei tial chap i kan resume kong an hei nolh khi asi. Cucu follow-up letter an ti i, Laimi nih cun kan hmang tuk lem rua lo. 

Interview an in auhni caan te ah phak khawh i zuam. Tlai sual bak lo ding. Address tlamtling tein i dotthlat cia. Na manh ko ahcun tuan te ah i thawh. Interview tuah an in timhmi suimilaam caannak in minute 15 tuan deuh in phak khawh i zuam. Na tlai sual vingvang ahcun interview an tuahtu hna kha phone chawnhnak in hei theihter cia hna. A biapi tuk. Kuttlaih ning, na hrukaih ding, na tthut ning, an biahalmi na leh ning, zeitindah an company office chung na luh le chuah lai tiang zong practice nak ngeih khawh ahcun a rak tha. Company lianlian i rian an sok tikah interview auh te hna an ton ahcun tikhan an practice tawn, ti asi. Cun, anmah le anmah zong video an i zeih i tha tein an i zoh hmasa tawn, ti asi hoi. 

Rian interview tuahtu paohpaoh nih opening, body le close tiin an ngeih dih. Opening cu minute pahnih in panga karlak a sau tawn. Cun biahalnak tawite khi an tuah theu. Tahchunhnak ah, kan uarmi sport le sianginn major tibantuk khi hal asi. Cun, a cheu nih bia thoknak le bia van awnnak ah tiah, an company kong hi an chim theu. Tikah, felfai tein an bia ngeihpiak a herh. 

Body cu minute pahra in pakul tluk a sau. Biahalnak thuk deuh le kau deuh in an tuah theu. Hi ahhn fak piin na sokmi rian caah na qualify khawhnak kha theihter hna. Tulio ah sianginn maw na kai, rian dah na tuan ti zong theihter hna. Nangmah na thil ti khawhnak le na thiamnak kha an lung lut dingin le an in duh dingin fak piin biachim caan asi. Close cu minute pahnih in panga karlak te a sau ve. Hi caan ahhin interview an tuahtu nih zeitluk tlai hnu ah dah result an in theihter ding kha an in chimh la. Tahchunhnak: "Zarh thum hnu ah rian na hmuh le hmuh lo kan van in theihter te la," tiah an in ti khawh. Interview an tuahtu minung a phone number zong lak khawh i zuam. Thanwg an in thanh ti lo ahcun nangmah nih chawn ko hna.

Interview an kan tuah tikah biahalnak phunphun an kan tuah. Cu biahalnak pawl cu zeitindah a tha bik in kan leh hna la timi zong van tial chap ding asi ko nain, a sau tuk cang. Za rih sehlaw, a herh cun kan peh than te la. 

Laimi tampi hi rian interview an kan auh ve tawn. Tikah, pumpak in timhlamhnak tete ngeih a rak biapi tuk. A hleiin, Laimi cu kan tonmi le kan hmuhmi hi a tlawm tuk rih caah cawn awk kan herhmi a tampi rih. Cucaah, hi rian interview kal lai i timhlamhnak ngeih zong hi a herh ngaimi a si, tiah ka ruah caah hi ca hi ka ka tial. 

Chirchanh: Locker, Kitty O. and Kaczmarek, Stephe Kyo. "Business Communication: Building Critical Skills." New York: McGraw-Hill/Irwin, 2014.