Amah Biaknak Hmun a Tthial Lengmangtu Kan Pathian

Voikhat cu kan Khrihfabu ah khua dang mileng kan ngei i thawngtha a kan chimh. Cu thawngtha a kan chimhmi cu zeisi loin Pathian nih a umnak hmun a thial lengmangnak kong a si. Midang caah an voikhat theihnak si lai i an khuaruahhar ko men lai. Nain, kei cu ka khuaruahhar lem ti lo. Aruangcu, atu lio Pathian thawngtha chimtu i ka uar taktak mi le thazaang a ka petu bik tu  Rev. Hoi Cung Tum nih Australia ah a rak chim i YouTube in ka rak ngei cang. Avoi hnihnak ka ngeih si caah ka khuaruah har lem ti lo. Theih awktlak taktak a si, tiah ka ruah. Kan biakmi Pathian hi a tuanbia theih khawh chung thei dingin kan i zuam awk bak a si. Cucaah, cu hna pahnih Bible sianginn kai veve nih an kan chimhmi chung cun a tawi fiannak tein ka van langhter. Adongh tiang rak rel hrimhrim, thazaang na lak hrim ko la, tiah zumhnak ka ngei. 

Moses nawlbia 10 laknak le Pathian he an i chawnhtawnak Sinai Tlang

Kan Pathian hi ai thleng bal lo mi Pathian a si, nain a riantuan ning le a umnak hmun cu ai thlengmang. Eve le Adam chan ahcun Pathian nih a minung hna hi khoika paoh a rak kan ton. Pathian nih a kan ton duhnak hmun le hma theng hi a rak um lo. Sinain, rulpi tukforhnak nih hlennak in sualnak ah a kan kalpi hnu cun Pathian nih a minung hna a kan tonnak hi a den cang. Noah zong Pathian nih a chawnhnak hmun paoh kha Noah i Pathian sin raithawinak hmun a si. Abraham zong Pathian nih bia a kamh tikah an rak tonnak hmun paoh kha raithawinak pakhat ah Abraham nih a rak ser. 

A hlan lio biakamhlun i kan Pathian an rak ton biknak hmun cu tlangpar ah a si. Tlang cung lawnglawng ahhin an va kai i an rak chawnhbiak tawn, ti a si. Moses tuanbia kan zoh tik ah tlangpar lawng hin Pathian he an rak i chawn tawn. Cun, Pathian an rak tonnak hmun paoh cu "hmunthiang" tiah rak ti a si. A hlan lio Pathian an rak ton tawnnak tlang i a laar bikmi pawl cu Sinai tlang le Zion tlang tibantuk hna an si, tiah Bible sianginn a kaimi pawl nih an kan cawnpiak.

A hlan lio Pathian an rak tonnak "Puanthlam (Tebernacle)" 

Tlangpar a dih cun Pathian nih a umnak hmun a thial hoi cang. Tuan ahcun tlangpar ah an rak ton nain atu ahcun puanthlam chung lawngah ton khawh a si. Puan in an sakmi thlam chung lawngah Pathian hi ton khawh a si i ahopaoh nih rak ton khawh a si lo, tiah an kan cawnpiak. Cu puanthlam hmunhma cu a thianghlim tukmi a si. An rak ttihzah tuk mi zong a si. Pathian ton an duh tikah tlangbawi lawng nih rak ton khawh a si. Cun, puanthlaam chung ahcun an va lut i Pathian an lungton lo ahcun Pathian nih a rak thahbeh tawn hna, tiah an kan cawnpiak. 

Pathian cu puanthlam a um hnu ah temple ah ai thial than hoi. Cucaah a hlan lio chan biakamhlun hna ahcun temple, Pathian biakinn hi an rak ttihzah tuk. A thiangthlim tuk fawn, zeicatiah Pathian umnak hmunhma cu pei a si fam cu. Cuticun a hlian lio ahcun Pathian umnak hmunhma rak kawl a si. Pathian umnak paohpaoh cu a thianghlim i rak upat le rak ttihzah zungzal a si. 

Jerusalem Temple

A dongnak bik Pathian aithial than nak le biapi deuh in chim ka duhmi cu hihi a si. Mi tampi nih kan thei rih lem lai ka zum lo. Theih herh taktak mi pakhat ah ka chiah vemi a si. Cu ruang ahcun tihin ka van tialthannak zong cu a si fam cu. Hihi kan theih lo ruangah Pathian kan thangtthat ning hi a hman tawn lo. Ningcang loin Pathian kan thangthat. Pathian, a lianngant tukmi Siangpahrang hi ningcang loin thangthat awk a si lo. Cun, abiapi tuk mi cu Pathian zummi kan si ahcun khoika dah kan Pathian hi a um tihi kan i fian awk bak a si. Kan Pathian khoika a um ti kan fiang lawngah Pathian duh ningin thutdir le thlacam zong kan thiam deuh lai. Sile a dongnak bik Pathian ai thialthannak cu khoi hme si ne!?

A dongnak bik Pathian ai thialnak cu "nangmah na chungah khan a si." Um si, na chungah khan atu kan biak lengmangmi Pathian cu a um cang. A Thiangthlarau in a um. Hihi ka theih lo ruangah mi tampi kan nun ai rawhnak hi an rak si. Biakinn chung thla kan cam tik zongah, "Na biakinn thiang ah dam tein na kan phanhter le kan i lawm", kan ti. A si ti lo. Atu kan biakmi Pathian cu biakinn (temple) ah a um ti lo. "Na biakinn thiang ah" tiin thla kan cam lengmang rih ahcun "date out" cangmi thlacamnak a si. Kan i palh. 

Tha deuhin ka van hrilhfianh lai. Johan 2:19 kan zoh a si ahcun Jesuh nih, "Hi Pathian biakinn hi tthet u law nithum chungah ka sak than ko lai." tiah a leh hna. A chim duhnak cu ka thi lai i nithum hnu ah ka thothan lai. Cun cu thawhthannak i a hung ummi Thiangthlarau cu nangmah le keimah chung i a ummi ding mi kha a si. Cucaah kan chung hrimhrim ah Thiangthlarau hi arak um. Cu Thiangthlarau umnak na pum cu "a thiangthlimmi Pathian biakinn" cu a si. Biakinn ahkhan Pathian um ti lo. Thla na cam tikah "na biakinn thiang" titi hlah, "Na mithiang hna" ti deuh in ti usih. 

1 Korin 6:19
"Nan pum cu Thiang Thlarau biakinn a si kha nan hngal lo maw? Cu Thlarau cu nan chungah a um i Pathian nih an pekmi hna a si kha nan hngal lo maw? Nannih cu nanmah ta an si lo, Pathian ta nan si; a man in cawkmi nan si. Cucaah nan pum cu Pathian sunparnak caah hmang u."

Pathian hi kanmah kan pum chung i a um hi kan i fiang tawn lo caah sualnak tampi kan tuah. Biakinn kan phak lai ah kan khaini le kan kuak cu kan chak viar ta hna. Sinain, biakinn ah Pathian um rua tiah kan ruah caah thianghlim ngai phun khin biakinn chungah cun kan lut i  kan ipum tawn. Kanmah kan pum zeitluk in dah thianhhlimh a rak biapit kha kan rak theih lo caah a si. Kan pum hi Thiangthlarau biakinn a si ee, hawi dawt. Cucaah thazaang fak piin pek kan duh mi cu, na pum kha Thiangthlarau biakinn a si kha zeitik hmanhah philh hrimhrim hlah. Thianghlim tein chiah peng khawh i zuam. Kan biakmi Pathian hi THIANG-Thlarua a si bantukin a biatu zong nih nun dawh, nun thianghlim tein kan thangthat ve awk a si. 


Atang leiah Rev. Hoi Cung Tum nih fiang taktak in a sermon nak ka van thil. Rak ngai chap te. Zumtu Khrihfa a simi paoh nih theih awktlak a si pin ah, kan theih awk hrimhrim a si, tiah ka ruahmi a si.