Kenya Ram Garissa Univeristy ah Thisen a Luang; Minung 147 an Thi

Hi thawngpang hi a din tuai loh. Midang ca ahcun thawngpang sawhsawh si kho men. Sinain, kannih Khrihfa, Khrih a zummi hna kan ca ahcun ngaihchia ngaimi thawngpang pakhat a si tiah, ka hmuh. Aruang cu, mi an thleiden. Khrihfa le Muslim tiin Islamic mi hrokhrawl pawl nih an then hna hnu ah, Khrihfa theng meithal he hmuahchih in an kah hna tiah, BBC le Guardian nih an thanh.  

Al-Shabaab an hruaitu Mohamed Kuno

Sianngakchia

Hitin an buai lulh lio ah, thawng latu pakhat nih sianghleirun kainak i an vice chairman Colins Wetangula bia an hal i hitin a ti, "Khrihfa na si ahcun, na umnak hmun paoh ah an in kah lai" tiah, a ti. A sullam cu, Khrihfa theng an rak kan ral pinah, thah le nawn an rak kan duh tihi a fiang. Bialam hla ah, kan vawlei pi hi a daih ti lai ka zum lo. A fah le a dinh lawnglawng hi a si cang lai, ka ti. Nifatin thawngpang rel tikah, ithah le i nawnnak siseh, bomh puahnak siseh, nuclear kongah siseh, vanlawng tlaknak kongah siseh, a phun kip in chiatnak lei ah tu kan vawlei hi a um. Cheu khat kan pa le nih Bible bia a tling chin lengmang an ti fawn tikah, fak deuh in khuaruah awk cu a si ngai tak. 

Hi thawngpang hi Kenya ram zinglei hrawng a cang mi a si. Kannih lei US lei cun zaanlei 1:00 pm hrawng a si. Hi siangngakchia a kap tu hna hi minung 4 an si. An hmai an i huh dih. Palik nih an 4 ningin an thah ve hna tiah, thawng theih a si. Tuan deuh thawngpang an van tialnak cun minung 70 hrawng an thi tiah, BBC le adangdang nih an van thanh. A sianginn ningpi cun an rak hlai kho ve rih lo. Zeicatiah, mi thattu hna dang an um sual ah ti ralring deuh ah a si. Sinain, caan zeimawzat van ruah hnu cun minung 147 an thi i, minung tam tuk hma an pu rih tiah, BBC le adangdang nih thawng an van thanh than colh ve. 

Siangngakchia palik nih an kalpi hna lio

Apoi tuk. Hi siangngakchia fimnak cawng lio mi aruang um loin va thah le va nawn cu ngaihchia tuk a si. Ahleiin kanmah Khrihfa theng deuh an then hna i, an kah mi hna hrim hi a fak khun. A luancia caan zeimawzet chungin siseh, atu nii tiang thawngpang kan rel tikah Khrihfa mi hna hi kan tuar taktak. 

An kahnak hna hmun hi, Garissa University ah a si i siangngakchia 800 hrawng an um. Zinglei ahcun tapung 4 cu an hmai huh buin college chung cun an van lut. Security 2 an van kah pah rih hna. Siangngakchia pawl cu an exam caah ready ngaiin an rak i timhtuah lio caan a si. Acheu meithal puah thawng theiin a zaam mi zong an um ve. Minung 147 an thi i, minung 79 hrawng hma an pu. Cun, minung 587 hrawng cu him tein an kalpi hna (BBC). An college chung hi thisen in a luang. Khrihfa mi hna an ruak cu ai phah lulh ko. Khrihfa paoh thah dingah an kham hna i, Muslim paoh an kalter hna ti, a si. Acheu an kah chih hna bu ah an si khawh chungin an zaam len ve. Ruah bak lo piin an kah hna tikah zeitluk khin dek khuaci an va muih hnga mu. 

Hi thawngpang chia hi UN le US zong nih an theihpi ve hna. UN secretary-General Ban Ki-moon nih, "hi bantuk cu "terror attack" asi caah bawmhchanh dingin ready kan si ko" a ti. 

An buai lulh lio

Kenya cozah nih hi bantuk i dohnak kong an hruaitu a simi hi Mohamed Kuno a si an ti. A nih cu al-Shabad ah a rank zong sang ngaimi a si. An ram chungah a hmanthlak an tar i, " Mohamed Kuno a that khomi cu $217,000 pek nan si lai" a ti hna. Cun, hi university cawng tu dingah security 2 lawng an chiah mi hna cung zongah an thinhung a zual.

Hi Muslim kalsual pawl ttih an nun tuk. An extreme tuk lawmmam. Anih hi Al-Shabaab tapung an si i, Al-Qaeda tapung he ai pehtlai mi an si. Hika Kenya ram hrawng siseh, Nigeria le Somalia ram hrawng i a hrang taktak mi an si. UN zong a luancian caan ah an rak doh bal cang hna. Khrihfa mi a kan that lengmang tu an si. IS he an i dang loh. A luancia 2011 zongah Kenya ram ah an rak buai hoi cang. Kan hnu kum zongah bus an rak kah hoi i, Khrihfa mi 36 an rak thah hna. Kan hnu thla zongah Mandera ram ah an buai hoi i, minung 12 hrawng an thah hoi hna. Cun, 2013 ah Kenya khuapi Nairobi i Westgate mall bawm an puah i minung 67 hrawng a thattu hna zong an si.

Khoika dah Kenya ram cu a um?

References: BBC/Yahoo News/Guardian