Fale Cung i Nule Pa Hmurka

Zahan cu, kan Khrihfabu i inn cawmi hna nih inn luh thlacamnak an tuah i ka kal ve. Chung ka ttuan pah. Kan buai ngai. Tihaang hna ka suak, hnawm kan hlonh, rawl ka phaw hna, social worker phun khin a phunphun cu ka tuah i mipi an lunglawmhter kha ka i zuam. Keimah tawk cun ka va buai ngai ve. Zei pipa khi ka va tuah lem lo nain. Cuti kan buai lulh lio ahcun, pa pakhat nih a dawtmi a fanu te cung i a chimmi bia nih ka lungthin a ka tuaitaam taktak. Khua zaza hi a ka ruahter. Cu ka chungtuan chung cu ka ruat. Thlacam pumhnak kan tuah lio zongah ka ruat. Inn ka phak zong ah ka ruat. Ka ih lai ahcun ka ruat than chinchin. Zingka ka tho i ka ruat than fawn. A ruah in ka ruah cawk ve ti lo caah hika hin ka tial.

Nule pa nih kan ngeihmi fale hna hi, Pathian thluachuah vialte lakah "a sunglawi bikmi" an si hi zeitik hmanhah philh lo ding a si. Jesuh zong nih ngakchia tete hi a dawt hna. An lu cung hrimhrim ah a kut a chuan i thluachuah a pek hna. Vancung khua hi ngakchia tete caah hin a si, a ti. Hi ngakchia bantuk ah kan i can lawngah Vancung khua nan lut kho lai, tiah a nawlh fawn (Matt. 19:14). Cun, a zultu nih ngakchia pawl hna an cheh tuk ruang i an sik hna le an thawl hna hmanh ahkhan, Jesuh nih a zultu pawl tu a sik chin lehlam hna. Jesuh nih zeitluk in dah a dawt hna tiah ahcun, "Hi ngakchia tete keimah zumhnak in a pialter mi hna cu, an hngawng ah facang rialnak lung thleih hna seh law, rili ah hlonh si hna seh a ti" A sullam cu, "thah" si hna seh, tiah kan ti khawh. 

Hi tluk in Pathian nih a dawtmi ngakchia tete le, nule pa nih nan hmuhmi Pathian thluachuah vialte lak i a sunglawi bikmi fale cung ahhin zeibantuk bia dah kan chim tawn? Thlachuak bia maw kan chim tawn? Cusilo, fale cung i biachia le bia dawh lo a si pinah, kan pawngkam ummi minung hna hmanh nih an theih awk i aa dawh lomi bia dah kan chim tawn? Nule pa nih kan fale cu kan dawt dih ko hna lai. Sinain, an lu cungah kan kut chuan in thla kan cam bal maw? Pathian thluachuah teh kan pe bal hna maw? (Cheukhat nule pa cu a hrin lawng kan thiam i thluachuah pek balte kan thiam ti lo.) Zeisihmanh ah, hi thil nan tuah lomi cu nan fale nih an hlawh lo ruangah a si kho men. Kanmah zong Pathian nih thluachuah a kan pek tikah hin kan i hlawh ruangah a si ve hnga maw? Pathian nih thluachuah a kan pek cu kan i hlawh ruangah le thatnak kan tuah ruangah a si hrimhrim loh. A vel le a dawtnak thawng lawng in a si. Cu bantuk Pathian lungput cu zumtu zong nih kan ngeih ve awk a si. A hlei in, kan nule pa nih kan fale cungah kan langhter awk a si. Cucun, nan fale nih midang cungah an langhter khawh ve lai. 

Nule pa cu mit hmuh Pathian nan si. Fale caah an mit hmuh Pathian kan si, tiah rak i theih cu a biapi ngai, nain cucu a rak za thlu loh. Nule pa cu, fale caah kan mit hmuh Pathian nan si bantukin Pathian nih a fale kan cung i a ngeihmi lungput, ruahnak, thinlung le dawtnak he kan fale kan dirkamh zungzal hna ding hi a herh tuk hringhran. Nule pa nih kan thisen in kan hrinmi fale hna cu kan dawt dih ko hna lai. Sinain, nule pa cheukhat cu kan fale kan pamhhmal tuk hna. Pathian thluachuah rosung bik an si hi kan philh tawn. Fale nih an kan upat ding, dawt ding le, ttihzah ding rumro a hramhram in kan bawh; kan i ruahchan. Cucu a rak si thlu lem loh. Hi bantuk ruangah hin kan fale an i rawk kho. Kan fale an thinlung kan fahter hna ruangah hin an rawkral chin kho. An ngeih kan chiatter hna ruangah hin nule pa sinin an zaam kho. Efesa 6 chungah "nan fale kha a thinhung hna seh tiah ti hna hlah u" tiah Paul nih a kan cawnpiak. Zeitin fale cawkpiak zia kan thiam lo sile, Miraang pawl bantukin kan church pastor te sin hna ah bawmhnak hal i a biapi taktakmi a si.

Kan fale hi a lam phun kip in an ngeih kan chiatter hna. Cu hna lak ahcun an cung i bia tha lo chim zong hi aa tal. A si khawh chung in i sum ah a tha. James zong nih kan lei ttihnunnak kong tampi a kan cawnpiak. Sinain, lei kong cu ka tial lai loh (a sau tuk sual lai). Zahan kan chungtuannak ahcun, pakhat pa bak nih a fanu kum 2 hrawng simi te cu "khuachia" tiah a auh ko hih e. A fanute cu kum 2 hrawng lawng a si rih caah zei cu a va hngal lo. Sinain, a pawngkam ummi minung kan lung a nuam ti loh. Kum 2 ngakchia te zong cu a lung hei fim seh law a ngeihchia tuk ve lai ka ti. Sinain, a lungfim rih lo caah a pawngkam ummi tu nih kan ngeihchiatpi. 

Khuachia ti cu bia sawhsawhte a lo ngai nain "Satan" ti he aa khat. Satan ti cu Greek holh a si i, "dohtu" tinak a si. Satan  hi min tam tuk a ngei. Bible ca chungah a min hi a tor. Lucifer ti zong hi a si. Cun, Bible chung i a min tampi lakah Biathlam chung i a min van char ka duh. 

"Limkeng nganpi cu lengah an hlonh. Cu limkeng cu rulpi tar, Khuachia, asiloah, Satan timi, vawleicung mi vialte a hleng dihtu hna kha a si." Biathlam 12:9

Kan fale "Khuachia" kan ti tik hna ah "Satan" kan rak ti hna he ai khat. Satan kong cu Asaiah 14:12 ah rel khawh a si. Ezekiel 28: 11-18 zongah rel khawh a si. Bible chung hmunhma dang tete zongah rel khawh an si. Satan cu mihrokhrol a si. Mi lihchim a si. Mi lainawng a si. Vancungah a rak um hmasa. A rak bawi ngai ve i vanmi zong nih a rak cawngh ve. Aa dawh tukmi a si fawn. Sui le lungvar in ttamhmi a si (Ezekiel 28:13). Vancungmi pakhat a si ve nain porhlawtnak he a khah caah vawlei ah rak thlakmi a si. Pathian tluk si a duhmi a si i, Pathian thutnak hmanh a cuh ngammi a si. Vanmi hna nih Pathian an thangthat le an biak bantuk in rak ka bia ve hna seh tihi vancung a um lio ah a rak duh. Cu tluk cun a rak sualmi a si. Cucaah Pathian a vancungmi Micheal le a hawi le nih an rak doh i Satan cu a rak sung. Vawlei ah rak thlak a si (Biathlam 12:9). Satan a zerning le khuaruahhar sining cu a mah lawng rak thlak siloin a vancungmi cheu thum ah cheukhat a van i ttumpi rih hna. 

Nule pa nih kan fale "khuachia" tiah kan timi Satan a riantuanning hi khuaruahhar ngai a si. Biathlam 12:9-13 kan rel ahcun tampi kan hmuh khawh lai. Satan cu mihrem mi le lihchim hmangmi a si. Satan cu Pathian nih zungzal in Hell ah a chiah ding a si caah Amah Jesuh a zummi paohpaoh kalpi ve a kan duh. Cucu, a "tactic" pakhat a si. Thinlung ah sualpuhtu a si. Lainawng zong a si fawn. Lainawn le thah hi aa dang. Lainawn cu a sual lomi thah khi a si. A seh khawhmi paoh seh aa zuam. Chiandeuh bantuk in seh awk ah a vak peng (1 Peter 5:8). Ttih a nung tuk. Kan fale khuachia tiah kan timi Satan hi Jesuh Khrih a zummi paohpaoh a doh hna (Biathlam 12:17). Nule pa nih nan fale khuachia nan ti hna paohah nangmah an dohtu lila ah na ser tinak a si. Satan (Khuachia) cu Khrihfami kan doh lengmangmi asi.

Cucaah, nule pa nih kan fale "khuachia" kan ti hna ahkhin a cunglei i ka van tialmi "Satan" kha a rak si. Anmah cu an si lo hmanh ah nule pa nih kan siter hna. Fale cung i kan biachim holh rel zong hi i ralring taktak kan hau. Fale ca'h i Pathian thluachuah vialte cu nule pa cungah a um. Zeitikhmanh ah an thachiatnak in bia chim lo ding a si. Na hrut tuk, na thluak chia tuk, hawi na lo loh, ca na thiam lo tuk, na sual tuk tiah nule pa nih fale cung i bia sawhsawh phun in kan chim tawnmi bia pawl hi, kan chim dih cangkaa in an rak dong loh. An hna khat leiin an theih i, khat lei ah a chuak colh loh. Kha bantuk bia tha lo (negative) pawl kan chimmi kha an thluak chung ah a caam, tiah Psycholigist lei thiam sang pawl nih an chim. Cu nih cun vawlei khua an saknak le an sianginn kainak ah tam tuk thanchonak a donh hna. Kha bantuk hringtu nule pa sinin a rami bia tha lo kha an thluak chungah a caam i, an thil tuahnak ah i biatak duhnak lungthin zong a zorter. Cucaah, cheukhat fale cu zeihmanh an rak thiam/hngalh lo pin ah thazaang kan pek hna kan rak timi bia pawl nih khan, anmah tu a rak hrawh chinchin tawn hna. 

Cheukhat nule pa cu kan hngalh/theih lo zong hi a si pah ko rua ka ti. Cucaah dawh kan Khrihfabu le community i "training" tete an tuahmi zong hi biapi ah chia hna usih law kai hna usih ka ti cuh. Laimi cu thing le lung le hmawng lakah a thangmi kan si. Fimnak ah kan chambau. Kan ruahnak zong a tenau. Kan theihmi le hmuhmi zong a rak um lo tuk rumro ve. Cucaah a lam kip te hin "training" pek hi kan herh theu. Awi tampi zong ka nolh, kan pale nih kan Khrihfabu cio i training an tuahpiak ahhin kan kai hrimhrim awk a si, tiah. Laimi cu theih thlu ngaingaimi hi zeihmanh kan ngei lo. Sinain, na thei loh ti le kan duh fawn hoi loh. Mi chimhmi le kan i nautat fawn. Training ti bantuk an tuahmi le zei ah kan rel fawn hoi loh. Kan Lai Bible Hosea 4:6 chungah "Ka mi hna nih keimah cu an ka hngalh duh lo caah an rawk." Miraang ahcun, "My people are destroyed from lack of knowledge." Tha tein kan lehthan ahcun "Ka mi hna cu fimnak/hngalhnak an chambau ruangah an rawk" ti a si. Kan innchungkhar a hrawktu hi fale lawng siloin nule pa zong kan rak si kho.

Chirchanh: Bible Thiang