New Bern, North Carolina ah kanmah Kawlram Karen Refugee pa nih an innpa hna cu nam he a luh hnawh hna. A thah mi ngakchia pathum an si. Kum khat, kum nga le kum 12 an si. Kum khat ngakchia le kum nga pa hi a thah cangka in an thi colh. Kum 12 pa balte hi sizung an tlikpi hnu ah a thi. Hiti a luh hnawh hna lio ahhin ngakchia pathum an nu le an unu te zong an i tal ve. Nain, dot hnih thlalangawng in an zuang i an luat manh tiah, BBC nih a tial.
 |
| Eh Lar Doh Htoo |
Hi hna a thattu hi kum 18 te lawng a si i amin ah Eh Lar Doh Htoo a si. Palik nih minung a thahnak he dantat dingin an tlaih ve. Tuzarh Friday ah court kal dingin timhtuahnak an ngeihpiak. Dantatnak fak ngai a ing te men lai. Ngakchia thah le den hi U.S ram ah tih nung ngai mi a si.
New Bern, NC ahhin Kawlram mi refugee 1,900 hrawng an um i khuapi cu a si lo. Nain khua nuam ngai cu a si, an ti. Kawlram mi refugee zong tam ngai an va phanhnak khua pakhat a si. Malaysia ka hawi le zong hika khua cun an um ve. Ruah bak lo piin ka van rel i Burmese refugee ti an van tialmi nih a ka lauter ngai. Kanmah Laimi chungin asi lo mi hi a tha tuk ko nain ram khat tein a ra vemi Karen nih hiti thil an ton cu ka lung a nuam thiamthiam lo.
*******************************************************************************************************************************
Zeisihmanh ah, ka Tunisia thawngpawng relnak kong cu van peh ning. Hi thawngpang hi a din tetuai lomi a si caah zaapi zaara nih theih dih cio cang mi a si. Tial zong a phu loh. Zeicahtiah, thawngpang a dinte lomi si bantukin online Lai thawngpang tialtu zong nih an tial len cang lai ka zumh.
A fawinak in cun, Africa continent i a ummi ram hmete Tunisia i Bardo Museum ah terrorist pawl nih meithal in an kah hna. Hi museum hi zoh dawh ngai mi a si. Tourist pawl an tam tuk nak a si. Kan hnu kum chung i tourist a rami vialte hi million 6.1 hrawng an si (bbc). Vawlei cung ah a minthang ngaimi Museu pakhat a si ve. Zoh awktlak museum pakhat a si ve caah ram kip nih van fuh tawn asi.
 |
| The National Bardo Museum |
Hitin an buainak hi zahan chun lai cer ah asi. Zahan cu an buai tuk ve hna caah an mah Tunisian minung le, ram dang tourist zeizahdah an thi le an i khawng ti zong an hngal ve rih lo. A rak thup i saupi kawl hnu ah hmuh zong an um len. Hi terrorist pawl hi khuazei in a ra mi an si ti zong an i fiang ve hoi lo. Sinain, zaapi zumhnak ahcun Muslim kalsual IS pawl theutheu kha a rak si ko.
Tuni ah fiangfai tein khua chung palik nih an hlathlai hnu ah minung 23 an thi, an ti. Cun, hi minung 23 chung ahhin tourist pawl museum a rak zohmi minung 20 an i tal. Adang minung 40 nak tam hrawng hma an pu rih tiah, BBC nih a thanh. Tourist pawl cu Japan, Colombia, Australia, UK le adang Europe ram chung France le Poland te hna an si. Tunisia nih mahhi ngaihchiatnak an ton mi kong ah minung zeimawzat nih Bardo Museum innka luhnak ah ngaihchiat pinak an tuahv e.
Hi terrorist pawl hi IS an ti ngam ciah ve hna loh. Aruang cu, khat lei ah Africa tapung al-Qaeda pawl an rak um ve. An mah zong hi a dinte tuai lomi an si ve caah an si kho ve ko. IS ti le Tunisia he a luancia caan ah an i pehtlaihnak a um lo. Nain, minung 3,000 in 5,000 karlak hi Tunisian minung IS ai fonh mi an si. Minung 500 tluk hrawng an rak kir than ve. Cu nih minung lunghrinhnak a ngeihter chinchin. Cun, Tunisia hi Libya ram he ai tlai mi a si caah Libya ram nichuah lei a ummi IS pawl zong an si kho. IS nih Twitters account an ngeihmi pakhat a um. Hitin vawlei cung i an buai caan paoh ah thawng an thanhnak tawn. Mi an lu an tannak video tibantuk zong mah cu an Twitters account ahcun an thlah tawn. Muslim holh in an tial i an pathian an thawngthat tawn. Mah hi Tunisia ram Museum methal kah nak kong he pehtlai in cu bantuk cu an Twitters account ah an tuah ve ti, a si. IS si dawh in aho paoh nih an zumh hna i, an lunghrinh dih cio hna.
Khoika dah Tunisia ram cu a um?
 |
| Tunisia ram le a pawngkam |
References: BBC
No comments:
Post a Comment