Zeidah a Kan Fial...???

Ka lungah a um tuk. Thut zong ka thiam lo. Ih zong ka thiam lo. Hawi he bia kan iruah zong i zeiltuk kai nuam ka ti zongah ka lung chungah a van ra than lengmang. Atu le tu a ra i umzia thiam loin a ka tuaitam. Cucu nungak kong ruangah a si lo. Rian kong le sianginn kong zongah a si lo. Vawlei sibuaizii kong zongah a si lo i chawva le rumnak kong zongah a si lo. Tunii i ka hawi le he Indianapolis CEBC i CBCUSA Mino lei hruainak in Carson le Laura philhlonak service kan kalnak kong a si. Cucaah, a tu inn kan phaknak zinglei 4:40 am a si ko nain hica hi, ka tial. 

March 15, 2015 Indianapolis, IN CEBC

Tunii Carson le Laura philhlonak service kan kalnak nih khua zaza a ka ruah ter. Hawi le kom he zong van i hmuh a si pinah a nuamh hrim a nuam tuk. Hihi ziah atu lawngah kan tuah tiin Thlarau lei ka upa Sailo Thang sin zongah ka chim. Pastor mino tete nih biatawi chimnak le Carson le Laura an tuanbia tawi chimnak nih ka nunnak ah fak piin rian a tuan. Thazaang zong tampi ka la i, kai hliphlai taktak. Kan hlawhtling tuk. Kai kal fuh tuk. Pathian rian taktak le Pathian nih zeidah tuah deuh hna seh tihi kan i fian lo ahcun zeithil hmanh hi vawlei ah an rak fawi lo. Lungdongh a fawi te i, hnulei kir than a fawi te. Hi kongah Carson le Laura nih tampi a kan cawn piak.  

Tunii Carson le Laura philhlonak service i an biatawi chimnak le Rev. Dr. Van Ni phungchimnak nih kan nunnak ah rian a tuannak kong tawi tein van langhter ka duh. 

Rev. Dr. Van Ni

Carson le Laura cu March 15, 1899 kum ah Lairam Hakha ah an rak phan. Tunii ahcun kum 116 a rau cang. Laimi kan caah an sung lawi tuk. Kan ceunak taktak an si. Anmah hi rak ra hna hlah seh law, Laimi hi zeibantuk dirhmun dah kan phak hnga timi hi ruahlo awk a tha hrim lo. Carson le Laura an rat lio caan ahhin Laimi cu thilrukaih hmanh kan rak thiam lo. Luu-yaan bantukin kan rak thudir. Kan rim a rak chia i fih kan rak nung. Cucaah, Laura cu a minung si nakin a lung rak dong ve. A ttah bu he, "Arthur, himi hna he cun ka um kho bal lai lo" a ti tawn. Sihmanhsehlaw, a pasal Carson nih a hnemh lengmang ve i zeidang hleiin hnemh awk a lam um ve lo caah hitin a hnemn tawn. Aw nem tein, "Ka dawt, thaizing ahcun ee, khua adei te ko lai. Thil ai ningcang deuh te ko lai" a ti tawn. Hi lio ahhin Carson cu kum 26 a si i, Laura cu kum 25 a si, an ti. Mino te an rak si nain Pathian riantuan dingin an umnak US ram an chuaktaak cang. 

Hi lio caan ahhin, sibuaizii ruangah ra hna seh law Laimi kan sinah nii 2 hmanh an um kho lai lo. Vawlei lei thil ah siseh law, an tlung zai hrim lai. Laimi kan sining zoh tikah sau rak um khawh ding a si hrim lo. Sinain, Carson le Laura cu an rak i tinh mi zeidah a si ti an rak i fiang. Pathian rian a si ti kha an pian tuk caah hnulei an kir lo. A sungkhaan an duh lo. Hi tluk kan Lairam a muimi le fihnung mi ram ah Pathian nih a van thlah hna. Tunii ah Laimi hna cu anmah thawng le Pathian thawngin a sunglawi tukmi Khrih dawtnak a kan theih tei i Amah he hawikomhnak caan tha a kan pek ve cang. Amen!

Hi nih hin tampi an kan cawnpiak. Carson le Laura kha tluk muinak he a rak khat mi Lairam ah Pathian nih a rak thlah hna bantukin, tunii ah Pathian nih hi tluk a mui mi US ram ah a van kan thlah ve. US ram cu vawlei cung ram ah ram tha bik tiah zohcho mi a si nain, thlarau leiin zoh ahcun a mui ngai. Kum khat hnu kum khat biakinn panh ti lomi an tam chin lengmang. Biakinn zong zuu dawr, night club le tattoo dawr te hna ah an hman cang. 

Kan pa le nih thawngtha an chim lengmang mi cu hika US ram kan phak hi rumnak ruah ah a si lo. Inn le lo thatha ngeih i zalawng ngaiin tlonlen ding zongah a si lo. Amah Pathian thawngtha hrimhrim kha Carson le Laura nih a muimi Lairam i an rak aupi bantukin nang le kei zong hika a muimi US ramah aupi ve hna seh ti an kan duh. 

Zeidah a kan fial? Amah thawngtha bia chim le phuan ding cu a si ko! Carson cu kum note, kum 26 a si ah Lairam a rak phan cang. Nangmah le keimah zong kum note si hmanh usih law, Pathian nih Carson le Laura amui mi Lairam ah a hman hna bantukin hman ve a kan duh. Cun, Laimi nih Laimi sin lawng i thawngtha bia kan aupi mi hi ka lungtling lo tuk. Zeicatiah, US ah hitluk in Thlarau he an i hlat. Vawlei taksa duhnak party, sex, le drug an i ritpi. Hihi kan theih ko buin kan umsawh awk a si lo. An zawn kan ruah ve hau cang. An sin hrimhrim ah thawngthabia kan chimh ve hna awk a si. Carson le Laura zong nih an rak kan zoh sawh ve tung lo. Harnak vialte cu an in le Lairam ahcun arak kan fuh riangmang in Pathian thawngtha cu a rak kan chimh cu.. 

Pathian riantuannak le Abia aupi nakah Fimnak a herh loh. Rumnak a herh lo. Degree sangsang zong a herh lo. Thlarau nih umpinak lawnglawng kan herh mi a si. Zeitlukin kan hruh le kan sifah zongah Thlarau nih a kan umpi ahcun Pathian bia cu chim cawk lo a si. Peter cu nga tlai sawhsawh. Galilee rili kam ah surcheh in a paw ai cawm sawh mi te a si ko nain, Pentikos nii a thawngthachimnak ah Pathian Thlarau nih a umpi i minung 3,000 a thlen ko hna. (Lamkaltu 2:41)

Bawipa sinah thlacam zungzal cio hna usih. Bawipa nih kan nunnak second pakhat te a zuahmi zong hi Amah sunparnak caah si ko seh. Ni fatin kan nunak zongah Amah muisam cuang ko seh. Abia hi a aupi kho ve mi kan si khawh cio nakhnga thla fak piin cam cio hna usih. A reltu Bawipa nih thluachuah za an pe ko hna seh!