Teinak (Victory) Timi Cu...

Miraang nih "Picture worth a thousand words" an timi khi a hman tuk, ka ti. Kan ca i sullam a ngei mi hmanthlak pakhat cu cafang a thawng in tial aphu tak ko. Hi atang lei hmanthlak te nih zei ka tuah paohah thazaang a ka pek ngai tawn. Bawlung ka chuih i kai khawnnak a fah zongah a fak lo a ka ti ter. Riantuan ka thabaat zongah ka baa loh a ka titer. Ka mitkuu cimlo zongah a cim ko a ka titer tawn. Thazaang dernak a simi kha kan hmuh piak ahcun kan thazaang der chinchin lai i, a sung tu (loser) ah kan i cang lai.  

Bawlung kan chuihnak ah, "a zawh", "a fak", "ka thi lai","ka chei loh" kan ti tawn. A dangdang zongah kan hman ko. Sinain, hi hmanthlak te cu fei nih tleng lakin a chunh ko zongah "I am not hurt" an ti ter. A tuahtu a hodek si hnga a thiam tuk, ka ti. A ngaite kan ti ahcun, Bible chung i mider mi nih ka thawng ti hna seh, sifak mi nih ka rum ti hna seh, a hrutmi nih ka fim ti hna seh timi te he khan a van i lo tuk. 

Teinak cu aho paoh nih kan hmuh khawhmi a si bantukin sunghnak zong a si ve. Teinak kan hmuh khawhnak dingah zeidah a herhmi (requirement) kan i fian hlan cu sunghnak kha kan co zungzal. Nifatin te teinak hmuhnak dingah ai zuam lengmang mi kan si fawn. Riantuannak zongah hawi tei kan duh, sianginn kainak zongah hawi tei kan duh, sport lei zongah hawi te kan duh i, rumnak le fimnak tiang zongah hawi tei kan duh.  

Teinak timi cu kanmah nih pakhat khat kan pek hnu lawngah a ra mi a si. Chim duhmi cu, tuahserhnak tel loin zeitik hmanhah a ra kho lo. High school ka kai lio bawlung ka chuih ahhin, thaizing bantuk ah game kan ngeih sicun meng 8 hna voikhat tlik ah ka tli. Meng 5 hi cu avoi tam tuk. Meng 2, 3 hi cu va um rih seh. A caan ahcun ka kedong tiang khin an rak durh tawn. Keden hi keimah ka ke size nakin a lian deuhmi kai cawk peng. Zeicatiah, ka ke tha dam deuh seh tiah a si. Gym ah ka um, cu hnu cun bawlung kun ah ka kal i ka tli tawn lengmeng. Mah cu lio caan i kai sehchih zungzal mi cu, "Teinak ka duh ahcun, pakhat khat tal cu ka pek ahau. Intuar nak ai tellonak ah teinak a um kho lo. Ka caan ka pek ahau i, ka tha le zaang hrimhrim ka pek a hau. Cu hnu lawngah teinak timi hi ka hmuh khawh lai" tihi a si. 

Bawlung chuihnak ah a hlaan tein timhlamhnak hi rak ngeih a herh. Tikah, tliknak in siseh, tha le zaang in siseh caan tampi pek a hau. Cu hnu lawnglawng ah teinak timi cu a ra lai. A ra hrimhrim lai! Teirial thlu mipa le mi thathu pa cu an i tluk kho lo. Sianginn lei fimnak cawn ah siseh, sport lei in siseh, hawi tei kan duh ahcun i zuamnak, thazaang chuahnak le, intuarnak a hau. 

Mi tampi cu kan i fiang tawn loh. Tei kan duh maw tiah ahcun, aho paoh nih kan duh dih. Sinain, mah cu "TEINAK" hmuh dingah zeidah a herh timi kan hngal kho tawn lo. Intuarnak le thabaat lai kan ngeilah. Teinak cu kan duh ko nain thazaang chuah le van i hnek nak kan ngei kho lo. A chawngkhut phun in kan i la. Mah le mah i zumhnak le bochannak self-confidence kan thlau colh. Mahcu nih a result a chuahpi mi cu "SUNGHNAK" a si. Zeicatiah, kan duhmi teinak caah zeihmanh kan pek ve lo ruangah a si. 

Pathian fa Jesuh hrimhrim zong zeizong vialte teitu a sinak cu vailamcung a intuarnak a si. Teinak kan duh cun kan tuar ve hrimhrim a hau. Intuarnak aitel lo cun teinak cu a ra kho lai lo. Arat sual hmanhah, lih hrokhrol teinak a si lai tiah, kei cu ka pom ning a si. Pathian sinah zeitluk in thla kan cam zongah intuarnak le tuahsernak aitel lo ahcun pakpalawng a si. James 2:14 ah fiang tukin a kan cawn piak. 

Teinak cu vawlei lei zongin kan herh i, thlarau lei zongin kan herh. Intuarnak a hau. Hrum ai caan zong a um ko lai. Thangchiat ton caan zong um ko lai. Mi nih sersat le zomhtaih ton caan zong um ko lai. Mitkuu cim lo caan zong um ko lai. Rawltaam tihal caan zong a um ko lai. Sihmanhselaw, mah cu a dongh tiang fek tein ai tlaihchih kho mi cu teitu an si. 

Facebook group pakhat ah Rev. Dr. C Duh Kam nih "Teinak" timi kong tawi tein a rak tial mi a um. Thazaang ka lak ngai caah na rak lakcio ve theu lai ti zumhnak he ka van taar chin. 

"TEINAK (VICTORY)

Harnak le temtuarnak lo in hmuh khawh a si lo.

Harnak tuar kho mi cu teitu an si tawn.

Pathian hmanh nih teinak ruah ah harnak aa thim.

A har bik mi vailamtahnak cu hrial a duh lo.

Bawi Khrih zong nih a ttih tuk ve vailamtah lai cu,

A thlan thi sen in a luang, Lung rethei tuk in thla a cam, 

Maw ka pa, hi hrai in ka luat ter ko a ti. Nain,

Nangmah nawl si ko seh a ti, a pa bia cu thih tiang in a zulh.

Zumtu tha nih Khrih thawng in teinak an hmuh tawn. 

"Vawlei cu ahodah a tei kho? Jesuh cu Pathian Fapa a si tiah

A zummi lawng nih an tei khawh" (1 John 5:5)."