Khrihfa Buu Van Ti Laknak (canal) Ah a Tla; Minung 8 An Thi

Ka ca tlangtar ah "Khrihfa buu van ti laknak (canal) ah a tla, minung 8 an thi" tiah, ka van ti tik hin na lau tuk theu lai. Na mawh lo. Kanmah Laimi ah na van ruah colh caah a si. Zeisihmanh ah, Pathian a tha. Laimi cu kan si lo. Florida state chung i ummi khua, Forth Pierce timi ah a si. 

Khrihfa Buu Van a Tlak Lio

Hi thil ai thoknak hi a mongtu pa daithlan a si, an ti. Tuzing zinglei 12:00 am hrawng ah Independent Haitian Assembly of God Khrihfa buu mawtaw van nih minung 18 hrawng a phurh hna. Biakinn pumhnak program a dih hnu i inn lei lawng dingin an kal pah ah a si. Hi ahhin, khua zong a dawm theng lo. Ni khua zong a chia lo. Sinain, an van mongtu pa daithlan ruangah "Stop Sign" a pah. U.S 27 lampi thluangthluan hei hrawng thluahmah i ti laknak "canal" ti thuknak ah a va tla. Lam belte cu ai kuaih pah caah, a hmuh lo si men lai, an ti.

Minung ai citmi hi an tam ngai. An dihlak fonh ah minung 18 an si. A mawngtu pa hi direct in a thi colh. Adang passenger ai citmi minung 8 a thi ve. A mongtu pa fonh chih he nu 3 le pa 4 an si. An church Pastor kum 57 hrawng a simi zong ai tal ve. Cun, ngakchia kum 4, car seat ah a thu mi zong ai tal ve. Fak tuk in an i khawn caah hi ngakchia te cu lungfim lo ngaiin a um. Hospital ah an tlikpi colh nain, zapi an hnabeisei lo.  Adang a taangmi zong fak ngaiin an i khawng tiah, Fox News nih a thanh chih. 

Caan zeimawtzat a van rauh hnu cun an mawtaw hi ti chungah a rak pil pah cang. Zing leiah truck, mawtaw hnuk mi nih a hnuh i an chuah.  An mawtaw van hmai lei a sawp dih, ti asi. A innka zong, a bauh in an bauh dih lawlaw. Fak tuk in an rak i khawng tihi a fiang. Hi ahhin passenger pakhat cu, mawtaw chungin a van lawn (crawl) i, "rak kan bawm uh" tiah a au. 

Hi Khrihfa buu le an hawi le dang nih an theih tikah an ngaihchia ngai. "Hibantuk in thil a cang te lai tihi kan ruah bal mi a si lo. Kan um kalnak zong hi ai hlat lemlo. Nuam tein kan kal um tawn lengmang mi a si ko.", tiah ngaihchia ngaiin an ti. 

Hi news article nih minung kan nunnak hi cikhat te khi a rak si ko hi a ka fianter chinchin. Hmailei kan nunnak kong kan hei chim khawh lo ning te hna zong mu. Hi thil a cangmi ah an hawi le nih an rak hngah len ko hna ti a si. An mah zong nih, "hi bantukin thil a cang te lai tihi kan ruat bal bak lo", an ti ve. Minung kan nunnak hi cu pangpar bantuk a rak si. Cikhat te ah a par i, a zia colh mi. Thiamphei fung khawh bantuk zongin a rang. Cun, minung kan nunak hi minmei zaam bantuk zong a rak si. Cikhat te ah a zaam i, a ttio dih than menmen mi an si. Pathian tu nih kan umpi hram seh. Jesuh lawnglawng hi kan himnak taktak a rak si ko. 

Salm 90:12

"Kan nunnak hi zeitluk in dah a tawi ti kha kan hngalhter law cuticun kan fim deuh lai."

Reference: Fox News

Khoika dah Fort Piere, FL cu si?