Jolie hi a thei lo mi kan um lai lo. Kan ngakchiat lio Kawl ram kan rak um tein a rak laar tuk cang mi a si. A pungrua tha. Amui zong ai dawh. Iang zong a ngei. Iang ngeih timi cu Angeline Jolie bak hi a si. Jolie hi a fim zong a rak fim. Mi cungah dawtnak le zaangfahnak lungthin zong a rak ngei ngai mi nu sal tha pakhat a si. Movie ai zeih nak le bang ah pa a lo ka ti le ka uar kho tuk.
A kong lam hi tamtuk ka thei ve loh. Theih dingin van hlathlai khawh zong a si ko nain kai manh ve loh. Zeicatiah, sianginn kai pah le riantuan pah mi ka si ve bantukin sianginn ka ca le rian nih a ka nenh deuh tawn. Tial ka duh mi thawngpang le thil dang tete zong an um len tawn nain caan ngeih lo ruangah ka kaltaak tawn.
Jolie kong hi tamtuk cu ka thei bak loh nain, tawi te tal van tial chih ve rumro lo cu ka sia rem than loh. Ka uar tuk ve mi si caah mu.
Jolie hi June 4, 1975 Los Angeles, CA ah a chuak. Movie ai zeihnak ah laksawng zong tampi a rak la mi a si. UN lei ah riantuan mi pakhat zong a si. Tuan sawh lawng si loin a bawi ngai rih. UN refugee agency ah Goodwill Ambassador pakhat a si i a rian tlaih mi a sang ngai. A luancia caan ah pasal voi 2 a rak ngei bal cang. 1995 ah Jonny Lee Miller he an rak i thi-um i, 1999 ah an i then. 1999 thiam ah Billy Bob Thornton he an i thi-umm than i, 2003 an rak i then than. Cun, a tu a pasal Brad Pitt he 2004 ah "Mr. and Mrs. Smith" timi movie an rak i zeihnak in an i duh i, an i thi-uum ve. Fa 3 an ngeih hna i adang ngaktah fa 3 an i cawm rih hna. Asia ram Cambodia, Vietnam le Africa ram chung in an si hna. Hiti ngahtah buangro le mi sifak hna cung i zaangfah dawtnak a ngeih ruang ko hin kei ka uar khun. Jolie hi director tuan zong a thiam. Kan hnu kum movie chuakmi "Unbroken" timi zongah director a si. Adang movie tampi ah Brad Pitt he zong director an tuan ti nak a um len.
A pasal Brad Pitt hi a no lio ahcun vawlei cung nu tampi nih ai dawh tuk ah an rak calh bak lomi pakhat a si. A movie minthang pakhat "Troy" zong a laar ngai. A zoh lo mi kan tlawm te lai ka zumh. Keimah hmanh voi tam lak kai nolh. Ka hmai an piah cun ka zoh peng. Upa lei a van panh ve bantukin a mui hi a van i dang ngai in ka hmuh. Sinain, pa chuak thiam ai theihnak ah a style thiamthiam ko. An nu va in an i tlak kho tuk. Vawlei cung muidawh minthang veve ciamam.
A kong ka van ruah than tikah Jolie nauinn cancer kong thawngpang tawi te hi tial a rak phu than ko ka ti. Ruah ruangmang ahhin zaangfak zong a si. Zahan ah BBC nih Angelina Jolie cu, a nauinn ah cancer um sual la ti phan ruangah a nauinn an lak piak, tiah a van thanh. Jolie te chung hi nauinn cancer in a thi mi an rak tam ngai. A nu zong nai te kum 2 luancia ahkhan a rak thi. Adang a nu le chung zong an rak thi ve thiam. Zawtnak cancer tibantuk le kal zawtnak te pawl hi i chawnh khawh an rak si. Chungkhar chung i pakhat, a hlei in kan nu le pa siseh, kan pi, pu hna sin hin i chawn khawh a si. An dam lonak cii (disease) nih an kan chawnh khawh. Cu tikah, an mah an dam lonak bantukin zawt i thih ve khawh kan fawi te.
Jolie zong a nu nauinn cancer in a thih bantukin nauinn cancer ngeih ding hi a rak ttih ziar cang. Kan hnu kum interview an rak tuahnak zong ah a rak chimh chung cang hna. "Ka nu siseh, ka nu chung le hi nauinn cancer in an thi. Kei zong ngeih ve te khawh ka si. Cucaah, nauinn cancer ai sem hlan te hin, ka nauinn le tube hi itan i te zong ka hau lai," tiin a rak chim.
Jolie hi cancer cu pakhat hmanh a ngei rih lo. Nain, a chungah a nungmi ci (gene) a riantuan ning a hman ti lo. Cucu "BRCA1" tiah an auh. Hnuk (breast) cancer le nauinn cancer ngeih khawh a fawi. A ran zong a rang. A doctor pa nih a tuak piak nak ah 87% hrawng hi breast cancer ngei khawh a si cang. Cucaah, 2013 ah a hnuk (breast) surgery zong an rak tuah piak cang. Cancer zawtnak in thih hrial duh ah a si. Cun, a tu hi 50% hrawng hi nauinn cancer ngei khawh ding dirhmun ah a um than cang. Cucaah, a doctor pa he an i ton nak ah a nauinn lak piak hau cang dingin a rak chimh. Aruang cu, a nu siseh, a nu le chung nauinn cancer in an rak thih ruangah khan a si. A nauinn hi lakpiak hna hlah seh law, nauinn cancer le hnuk (breast) in a thi ding dirhmun ah a um.
Hiti an nauinn le an hnuk surgery tuah nak nih cancer zawtnak a chuah ter kho lo. Jolie nih a nauinn surgery tuah i lakpiak dingin biakhiahnak a tuahmi hi a pasal Brad nih a hnatlak pi mi a si. UK ram zong ah nauinn cancer in a thi mi nu pawl hi an tam ngai. An thihnak le an zawtnak pawl hi "BRCA1" timi a si. Hi nih Jolie a thinphan ter chinchin. Hi zawtnak hi, a ngeimi ca ah tih a rak nung tuk pinah, an fa le tiangin chawn khawh a si. Cucaah, tuan laang in a nauinn hi ai lak.
Nu pakhat nih BRCA zawtnak an ngeih tikah duhthimnak an ngei. An duh cun an hnuk siseh, an nauinn siseh tan piak le lakpiak khawh an si. Tikah, cancer zawtnak in an luat tawn i sau pi an nung kho. Cu ve bantukin tan duh lo le, lakpiak duh lo cun cancer zawtnak in thih khawh a si. Atu bantukin Jolie nih ai tuah ve mi hi an hmuh tikah zapi nih an lawmhpi ngai ---- a raltha tuk tiah. "Cancer zawtnak hi hrial ding ah a herh mi dihlak cu kan hrial kho la lo. Nain, si khawh chungin hrial ka duh. Ka fa le caah saupi zong nun ka duh i, ka fa le nih kan nu cu 'cancer' zawtnak in a kan thih taak an ti ding hrim hi ka duh lo," tiah Jolie zong nih a ti.
Angelina Jolie hi nusal tha pakhat ah ka ruah. Amah pumpak kong lawng ka tial than te lai. Zaapi nih thei awktlak le tihzah awktlak ngai pakhat ah ka chiah ve mi a si.
Reference: BBC
Photo from Google.com
No comments:
Post a Comment