We Are Created In Christ For Good Works

“Pathian nih sualnak tuah lengmang dingin a kan au lo” 1 Thesalon 4:7

“… thil tha cu kan tuah khawh nakhnga a kan ser thanmi kan si.” Efesa 2:10

“… thil tha nan tuahmi kha an hmuh lai i vancung khua i a ummi nan Pa kha an thangthat lai.” Matthai 5:16

Khamhnak hi kan thil tha tuahmi in kan hmuhmi asi lo cu chim hau loin kan hngalhmi asi (Efesa 2:8). Cun, Jesuh tal loin kan tuahmi thil tha zong hi Pathian hmai ahcun puanchia fihnung bantuk an rak si (Isaiah 64:6). Sihmanhsehlaw, Pathian nih minung a kan khamhnak a ruang tampi lakah thil tha tuah hi a biapi taktakmi pakhat asi. Khrih kan zumhnak hi kan tuahsernak (kan nun) in a langh tung lo ahcun kan zumhnak hi thimi zumhnak asi (Jeim 2:20). Khamh kan si hnu i kan nun ah Khrih muisam a ken lo, thil tha zong pakhat hmanh kan tuah lo ahcun kanmah tein faak ngaiin bia kan hal ding asi. Saya Hoi Cung Tum nih, “vawlei cungah apoi bikmi cu pianthar lo asi. Apoi bik a changtu cu pianthar tung i Khrih muisam pakhat hmanh ken lo hi asi” tiah a ti. A hman tuk ka ti. Micheu cu kan piangthar ko nain a piangthar lomi hna an nun he kan i dannak arak um tawn lo. Hi ruang ahhin, khamh kan si hnu ah thil tha tuah hi kan i zuam bak ding asi. Kan thil tha tuahmi cu kanmah caah si loin a kan khamhtu kan Bawipa sunparnak caah asi lai. Cun, kan thil tha tuahmi nih hin khamh kan sinak zong a langhter lai i mi nih kan Pathian zong an thangthat fawn lai.

Ruah Awk:

1.     Khamh na si hnu ah thil tha tuahmi na si maw? Na thil tha tuahmi thawngin mi nih Pathian an thangthat maw? Na thil tha tuahmi thawngin mi nih Jesuh zultu na si an in hngal maw?

2.     Thil tha tuah khawhnak thawnnak na ngei maw? (Micheu cu thil tha tuah khawhnak thawnnak hi an ngei tawn lo; a duh cu an duh ko).

3.    Khamh na si cang hnu ah na nun in na langhter maw? Na nun zoh in khamh na si le si lo hi mi nih an hngal kho hnga maw?

Happy New Year!!!!

Careltu hna, Happy New Year!!! 

Kumpi kum khat chung ka blog ah Pathian bia in thazaang arak la mi Khrih ka ule ka nau nan dihlak Bawipa nih thluachuah in pe ko hna seh. Kaa lawm tuk! Hmailei zong ah Pathian bia ka tialmi tete hin thazaang rak la rih ko uh. Kei zong kaa zuam ve lai. Pathian bia rel le thlacam hi zumtu kan caah a biapi bikmi asi ko.  Pathian bia relnak le thlacam nun kan ngeih ahcun hi vawlei sual thawnnak in kan luat deuh thluamah ko lai. Khrih muisam kan keng chin thluamah fawn lai i kan nun ah Thlarau thei a tlai hrimhrim ko lai (Galati 5:22-23). Kum 2017 hi kan dihlak caah kum tha le thluachuah kan hmuh kum si ko seh.

Kum thar kan phak hlan ah thazaang a kan petu ding Bible caang 12 ka van taar. Thazaang rak la cio uh. 

1)      “Sihmanhsehlaw Bawipa nih cun, “A um ciami thil kha i tlaih peng hlah u, hlanpi i a rak um cangmi lawng kha tuah peng hlah u. Thil thar ka tuah ding tu kha i ngiat u. Cucu atu ah hin a um lio cang, a hmuh hmanh nan hmuh khawh ko lai. Ramcar chungin lam pakhat ka kalter lai i cuka ah cun tiva luang kan pek hna lai.” Isaiah 43: 18-19

“Forget the former things; do not dwell on the past.  See, I am doing a new thing!  Now it springs up; do you not perceive it?  I am making a way in the wilderness and streams in the wasteland.”  Isaiah 43:18-19 (NIV)

2)      “Atu caan hi zei caan dah a si cang ti kha nan hngalh caah hihi nan tuah awk a si. Atu cu nan i hlauh awk caan a si cang, zeicahtiah khamh kan si lai caan cu kan rak zumh ka nakkhan atu ah cun kan naih deuh cang.” Rom 13:11

“Besides this you know the time, that the hour has come for you to wake from sleep. For salvation is nearer to us now than when we first believed.” Romans 13:11 (ESV)

3)     “Kan nunnak hi zeitluk in dah a tawi ti kha kan hngalhter law cuticun kan fim deuh lai.” Salm 90:12

“So teach us to number our days, that we may apply our hearts unto wisdom.” Psalm 90:12 (NIV)

4)      “Nan ca i ka tinhmi cu keimah lawnglawng nih ka hngalh, tiah Bawipa nih a ti. Cucu vanchiatnak si loin hmailei ruahchannak le thluachuahnak caah a si lai.” Jeremiah 29:11

“For I know the plans I have for you,” says the LORD. “They are plans for good and not for disaster, to give you a future and a hope.”  Jeremiah 29:11 (NLT)

5)      “Ka u le ka nau hna, cu thil cu ka phan cang tiah ka ruat hrimhrim lo; sihmanhsehlaw thil pakhat ka tuahmi cu, hnulei thil kha philh i hmailei banh i zuam kha a si. Cucaah kawltung leiah cun ka laksawng hmuh awkah khan ka tli i cu laksawng cu Pathian nih Khrih Jesuh thawngin cunglei nunnak i a kan kawh hi a si.” Filipi 3:13-14

“Brothers and sisters, I myself don’t think I’ve reached it, but I do this one thing: I forget about the things behind me and reach out for the things ahead of me. The goal I pursue is the prize of God’s upward call in Christ Jesus.” Philippians 3:13-14 (CEB)

6)      “Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.” 2 Korin 5:17

“Therefore, if anyone is in Christ, the new creation has come: The old has gone, the new is here!” 2 Corinthians 5:17 (NIV)

7)      “Bawipa kha na lung chung dihlak in i bochan law nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai.” Phungthlukbia 3:5-6

“Trust in the Lord with all your heart, and do not rely on your own understanding;think about Him in all your ways, and He will guide you on the right paths.” Proverbs 3:5-6 (HCSB)

8)      “Sihmanhsehlaw Bawipa aa bochanmi cu thazaang thar an la. Mupi bangin an zuang lai; an tlik tikah an baa lai lo, an kal tikah zongah an tha a di lai lo.” Isaiah 40:31

“…but those who hope in the Lord will renew their strength. They will soar on wings like eagles; they will run and not grow weary, they will walk and not be faint.”  Isaiah 40:31 (NIV)

9)      “Bawipa le a thawnnak kha kawl tuah u, A hmai kha kawl lengmang tuah u! A tuahmi khuaruahhar rian le khuaruahharnak a tuahmi hna le Biakhiahnak a chimmi hna cu philh hlah u.” 1 Chanrelnak 16:11-12

“Seek the Lord and his strength,seek his presence continually.Remember the wonderful works he has done, his miracles, and the judgments he uttered.” 1 Chronicles 16:11-12 (NRSV)

10)  “Bawipa na Pathian cu, nangmah kha him tein umter awkah na chungah ralkap bantukin a um ko; Na cungah a lung aa lawm lai i a tha a nuam lai; A dawtnak cu an hmuhter than lai; Hlan lio bantuk khan na cungah lunglawmhnak au thawng he aa lawm lai.” Zefaniah 3:17

“The Lord, your God, is in your midst, a warrior who gives victory; he will rejoice over you with gladness,he will renew you in his love; he will exult over you with loud singing.” Zephaniah 3:17 (ESV)

11)  “Bawipa dawtnak a fekmi cu, a dong hrimhrim lai lo, a zaangfahnak zong a cat lai lo; Zing fate in an thar lengmang, zumhtlak a sinak cu a lianngan hringhran. Ka ngeihmi dihlak cu Bawipa hi a si ko, ka ti; Cucaah amah cu lungsau in ka ngan ko lai.” Tahnakhla 3:22-24

“The unfailing love of the LORD never ends! By his mercies we have been kept from complete destruction. Great is his faithfulness; his mercies begin afresh each day. I say to myself, “The LORD is my inheritance; therefore, I will hope in him!” Lamentations 3:22-24 (NASB)

12)  “Pathian sunparnak le thatnak i hrawm ve awkah a kan kotu kan hngalhnak thawngin Pathian tihzah in nun awkah kan herhmi thil vialte cu amah Pathian thawnnak lila nih cun a kan pek. Cuticun a ngan ngaingaimi le a sung ngaingaimi laksawng a kan kamhmi cu a kan pek i cu laksawng a kan pekmi thawng cun a kan hrawkhral khotu vawlei pumsa duhnak chung hin nan luat kho lai i Pathian sining cu nan i hrawm kho lai.” 2 Peter 1:3-4

“Everything that goes into a life of pleasing God has been miraculously given to us by getting to know, personally and intimately, the One who invited us to God. The best invitation we ever received! We were also given absolutely terrific promises to pass on to you—your tickets to participation in the life of God after you turned your back on a world corrupted by lust. 2 Peter 1:3-4 (MSG)

Zeitindah Kan Community Ah Gang Kan Kham Lai?

      Kan hnu zan mino pawl choir hla kan cawnnak ah kan mino upa pakhat nih US i Laimi kan tam biknak Indianapolis ah Lai mino gang lutmi an um, a ti. Mino siaherhnak he kan mino zong kan i ralrin a herhnak tete a chim. Cu nih cun khua zaza a ka ruahter. Laimi kan umnak hmun paoh (US lawng si loin) ah kan i ralring cu a herh ko. Hi bantuk thil hi kan khua chung (community) cio ah kan ton sual ve nakhnga lo a tanglei (strategies) hna hi ka van chuahpi. 

1.     Khrihfabu nih kan member chung i family pawl hi Pathian lei ah kan tthanter deuh hna la.
2.     Khrihfabu chung i Christian Education zong kan tthawnter deuh a hau.
3.     Khrihfabu (a bikin hruaitu) nih vision thuk deuh le kau deuh in kan ngeih a herh.
4.     Cun, kan CE saya/saymah te zong training tha deuh in kan pek hna a hau.
5.     Kan nule pa (parents) zong hi training pek an hau (fale chimh cawnpiak an thiam deuh a hau).
6.     Khrihfabu chungah mino dihlak hi crusade, camping le conference lawng si loin social life standar hi training kan pek  hna a hau.
7.     Khrihfabu chung ah mino le mino i rem lonak tete a ummi hi kan zorter a herh. 
8.     Khrihfabu nih kan mino chung i ca aa harh deuhmi hna a bawmtu ding minung (tutors) kan kawlpiak hna hau. Education tha tein a ngeimi an si ahcun gang luhnak lam a har.
9.     Kan fale hi Christian college le university ah ca cawnter ding.
10. Nule pa nih caan pek in fale he biaruahnak caan pek deuh a herh.
11. Cawnpiaktu (pastor, CE saya, nule pa) hna nih “gang” luh ttih a nunnak hi kan chimh hna a herh.

A Bia Nih A Kan Thianh

“Annih cu biatak khan thianter hna: biatak cu nangmah bia kha asi.” Johan 17:17

“Make them pure and holy by teaching them your words of truth.” (NLT) John 17:17

Nan inn ti aa rawk. Na mawttaw zong aa rawk. Na inn pawng ah hotel zong an um ko nain na kal thiam lo – na mawttaw aa rawh ruangah. A fawinak in cun nan inn leng pin in khoika hmanh na chuak kho lo. Na ke in kal awk tha ding asi fawn lo. Na ti ngeihmi le na rawl chumhnak ding caah i khon na duh. Na ti ngeihmi in i kholh ding cu um rih seh, na hmai phiahnak ding hmanh ah hman na siang lo.

Thla khat a rauh hnu ah na inn ti a ttha tthan. Thla khat chung vialte hmai phiah lo le kholh loin na rak um. Van ruat ve hmanh, zeitluk in dah na rim a chiat hnga? Mi cu chim lo nangmah le nangmah hmanh nih naa celh lai lo. Cucaah na thiannak ding caah naa kholh a hau i naa kholhnak dingah ti na herh. Cu bantuk cun Pathian bia zong asi ve. Bible kan relnak thawngin nun thiannak kan ngei. A bia nih a kan thianh. A bia kan relmi kan chungah a hmunh ahcun tthawnnak kan ngeih pinah nun thianhlimhnak zong kan ngei. Kan khuaruahning le thil kan hmuhning zong an thianghlim deuhdeuh fawn.

Inn nganpi chungah umkheng a phunphun an um. Umkheng dawh le tthat a biapi lo. A hmet le ngan zong a biapi fawn lo. Nain, Bawi nih hman a duhmi cu “a thianghlimmi” umkheng kha asi (2 Timote 2:20-21). Pathian nih hmanmi si kan duh taktak ahcun nun thianhlimhnak hi faak piin kan kawl i kan ttanh a herh. Hawi sin kan chuah i kan rim chiat cu an mawh lo. Kan ti aa rawh caah kan i kholh kho lo le asi. Kan lungput le kan ruahnak a chiat tuk tawnnak le a thurhnawmh tuk tawnnak zong kan mawh ve lo; zeicatiah, Khrih muisam kan ngeih khawhnak dingah a kan thiantu Pathian Biatak kan rel lo ruang le kan i nunpi lo ruangah asi.

 Ruah Awk:

1.     Bible relnak in caan na pe kho maw? An dawntu an um maw?

2.     Bible nakin thawngpang le thil dang hna na rel deuh sual maw? Bible hi na caah zeitluk in dah a biapit?

3.    Bible na relnak thawngin naa thleng maw? Nun thianhlimhnak teh an pe ve maw? Thawnnak le lawmhnak teh an pe maw?

4.     Zumtu kan caah Bible rel a biapitnak hi na hawi le na chim tawn ve hna maw?

Rejoice In The Lord

Paul nih, "Bawipa chung i nan nunnak ah khan i lawm zungzal ko u ti kan duh hna. I lawm ko uh, tiah ka nolh rih ko lai" (Phil. 4:4) tiah a ti. Kan Bible ah "lawmhnak (Joy)" timi biafang a tam biknak cu Filipi cakuat hi asi. Cauk hmete asi ko nain "lawmhnak" timi biafang hi voi 16 hrawng kan hmuh; "Khrih" timi hi biafang hi voi 50 hrawng kan hmuh ve. Filipi cakuat hi Paul nih A.D 60-62 hrawngah Rom khua ah thawngtha ruang i harsa ngaiin thong a tlak lio ah a tialmi asi. 

Paul nih, "Khrih chungah i lawmh ding" hi a kan fial. Vawlei thilri le kan ngeihchiah thilri ah asi lo. Kan i lawmhnak hrampi hi Khrih si zungzal ko seh. Khrih chungah kan i lawmhnak hrampi kan bunh ahcun kan i lamwhnak a hmun ko lai. Khrih cu zungzal in a hmun. Cu Khrih cu a chuak cang! Ngeihchia lungrethei in um hlah. I lawm hna usih. Harnak caan zongah Khrih chungah i lawm ko hna usih. Paul zong thonginn ah harsa ngaiin a um nain aa lawm peng ko. Zeicahtiah cu aa lawmhnak cu Khrih chungah asi caah asi. Vawlei ah harnak tampi kan tong ko lai. I lawmh peng hi a har caan a um ko lai. Vawlei cu duh a tling fam lo. Nain, a voi hnihnak a rak rat than tik ahcun ngaihchiatnak le lungretheihnak a um ti lomi, zungzal dong loin kan i lawmh peng nak ding Vanram ah a kan kalpi te ko lai. 

"Rejoice in the Lord always; again I will say, rejoice." Philippians 4:4

Merry Christmas! 

Bawipa Thangthat!

Pumhnak inn thla kan cam tikah, a bik in, hram thok thlacamnak le zapi thlamnak ah kan cam tawnmi cu, "Bawipa, minung tampi nih nangmah thangthat an in duh ko nain an in thangthat khawh lo lio ah

kannih nangmah thangthat ding in caan tha na kan pek caah kan i lawm" tihi asi. Hi thlacamnak hi a hmanmi asi ko. Aruang tampi ruang i Bawipa a thangthat kho lomi hna lak ah kannih Amah thangthat kho mi kan si cu kan i lawmh tuk ding asi. Nain, khua ka ruah tikah, Bawipa hi a thangthat kho lomi lawng kan rak um lo. "Bawipa hi a thangthat kho ko nain a thangthat duh lomi zong kan rak um ve." Ka chim duhmi cu, Bawipa nih Amah thangthat kho dingin damnak le caan rem a kan pek ko nain a thangthat duh lomi le a huam lomi hrimhrim kan um. Pumhnak caan ah Amah thangthat duh loin thil dang aa dawnhtermi kan rak tam tuk. I ralring hna usih. Bawipa ngaih kan chiatter sual la! Tu hnu cun thla kan cam tikah, "Bawipa, nangmah an thangthat kho lomi hna tampi lak le nangmah an thangthat kho ko nain an thangthat duh lomi hna tampi lakah kannih nangmah thangthat kho dingin caan na ka pek caah kan i lawm" tiin cam hau dingin kan um cang rawh... !

Merry Christmas !! :) 

Christmas and The Second Coming Of Our Lord

December cu Christmas thla asi. Aho paoh nih kan i ngaihmi ni le thla asi. Kan i ngaih biknak le kan sunhlawih khunnak a ruang cu, Pathian nih a Fapa ngeihchun (John 3:16) misual nangmah le keimah kawl awk le khamh awk caah a rat hi asi ko (Luke 19:10). Jesuh vawlei a rat hnawhchan hi Bible chungah a tampi. Minthang Pastor-theologian John Piper nih cauk in a tial i aruang 50 tiang a hmuh. Christmas cu kan sual ruangah a thi dingmi nangmah le keimah kha (Rom 3:23), Pathian nih a kan dawt tuk caah kanmah aiawh ah thi dingin Fapa a van thlah hi asi caah kan i ngaih bik nak asi. December 25 ah Judea ram, Bethlehem ah a chuak lai kan ti i, don dingin thinlung chungin timhlamhnak ngeih cio asi. Atha tuk. Nain, hi lawng hi zumtu hna nih kan i ngaih dingmi asi ahcun kan palh. Zeicahtiah, Jesuh nih ka ra than lai a ti caah a rat than naklai zong hi kan i ngaih ve ding asi. Jesuh rat thannak ding (second coming) kan i ngaih lo ahcun Christmas kan i ngaihmi san a tlai lo. Jesuh cu kum 2,000 a luancia mi ahkhan a thi diam cang. Pathian hmai ah thiamcoter kan si nakhnga a herhmi (requirements) vialte a lim dih cang. A tantaakmi zeihmanh a um ti lo, "aa lim cang" a ti i a thi (John 19:30). A taangmi tu cu kan sualnak i ngaihchih i Jesuh nih a kan tuahpiakmi zumh le cohlan lawng asi (Mark 1:15). Tu caan hi vel ngeihnak caan asi. Ni khatkhat ahcun a dih te lai. Thiang Thlarau ngeimi lawng thiar kan si lai. Faro siangpahrang bantuk in a lungthin a hak i thawngtha zei ah a rel lomi paoh cu Hell ah thlak an si lai i an hacang an i rial lai. Na dirhmun van i check ve tuah? Jesuh rat thannak ni hi kan i ngaih maw? Zumtu hna nih cun Jesuh kan sualnak ruangah a voikhatnak arat ni le caan hi kan i ngaih awk asi i, a mithiang hna sin i a rak kirthan te tik zong hi kan i ngaih ve ding asi. Kan Bawipa le kan Siangpahrang don awk ah a zungzal in ready tein um hna usih.  

"Cun Mi Fapa hmelchunhnak kha van ah a lang lai; khi tikah vawlei cung miphun vialte kha an tap lai i Mi Fapa cu lianhngannak le sunparnak he vancung in a rat kha an hmuh lai. Muko nganpi cu an tum lai i a vancungmi kha vawlei kil li ah a thlah hna lai i vanrang toi khuazakip in a mithim hna kha a pumh hna lai." Matthai 24:30-31

"Cun ka va kal lai i nan ca i ka va timh dih hnuah ka ra kir than lai i ka sinah kan lak hna lai, cun ka umnak ah nannih zong nan um ve lai." John 14:3

"Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir than lai." Lamkaltu 1:11