"Annih cu, "Cathiang chungah, 'Pathian nih ka inn cu thlacamnak inn a si lai, a ti,' tiah aa tial. Sihmanhsehlaw nannih cun mifir kua ah nan ser cang," tiah a ti hna." Matthai 21:13Mi inn ka luhchuah tawn ah ka thinphan ngaimi pakhat cu, an inn chung i TV thatha le tape khuai chahchah in an pawn lulhmi a tam tukmi khi asi. Khi nih khua a ka ruahtermi cu, "hi hna inn chungkhar hi chungkhar thlacamnak caan hmanh ngei loin TV zohnak in caan vialte an hman dih sual la" tihi asi. Hitin ka chim tikah TV zoh hi a sual ka tinak asi lo. Sihmanhsehlaw, chungkhar thlacam rualttinak caan hmanh ngei kho loin TV lawngte (a bikin Netflix le Korean Drama) zoh hi cu Pathian nih a kan duhpiakmi asi lai ka zum hrimhrim lo. Kan inn chungkhar cio hi zei bantuk inn ah dah kan ser cio hna? Thlacamnak inn ah kan ser maw?
Rev. Dr. Hre Kio nih, "zumtu hna nih thla kan cam cu kan battery kan i tun asi" a ti. Minung hi Thlarau lei in a derthawm kho kan si. Cucaah, kan tthawnnak khawh nakhnga kan battery hi tun lengmang a hau ve. Cun, kan Thlarau a derthawm tikah kan thin a tawi. Kan lung a rang. Kan aukhuang. Kan i phuhrung. I siknak le buainak a tam. Dawtnak an zor. Chungkhar a buai i nule pa le fale kar ah pehtlaihnak a cat. A donghnak ah nule va tiang i tthennak tiang an chuak tawn. Hi bantuk thil hi ahohmanh nih kan duhmi asi lo. Cucaah, hi bantuk thil tha lo a can lo nakhnga chungkhar thlacam rualttinak te kan ngeih ahcun kan kham (prevent) khawh ko hna. Kan inn chungkhar ah thlacamnak rualttinak kan ngeih rih lo ahcun tuni in thok hna usih. Kan inn hi thlacamnak inn si cio hram seh!
No comments:
Post a Comment