Pathian Kan Thangtthatnak Ah Ka Hmuhning

Hlasak hi ka thiam lo nain ka huam ngaimi thil pakhat ah aa tal ve. Noami le Saya Tial Uk hla
tibantuk mit chimh bu in ka van sak le bang ahcun a nuam kho tuk. Zei khuate ka hngal ve tawn lo. A cancan ahhin kan mino Praise & Worship group pawl nih an ka sawm ve tawn i pulpit cungah ka kai ve tawn -- P&W ka hruai ve. Hawi he kan tthut ahcun Pathian kan thangthatning hi i hmuh khawh tuk asi lo nain pulpit cung cun kan cuang ngai tawn. Micheu cu kan hmai thutnak khi fek tein kan i tlaih i ralkap hmai a dirmi bantuk in kan dir. Micheu cu kan bawngpi zal kan i purh salem; micheu cu kan hmai chiat tuknak ah zoh ngam ding hmanh in kan um lo; micheu cu kan kut hna kan i sih salem i aw chuak huaha lo khin Pathiang thangthatmi kan rak um. Hihi zei ruang dah asi hnga tihi ka ruat tawn. Ziah hme hi tluk in thangthat awk a tlakmi le a lian nganmi kan Pathian hi hitin kan thangthat hna hnga tihi voi tampi kaa hal tawn. Salm catialtu nih "thil nung vialte hna Bawipa thangthat uh" ati. A nungmi le kan si fawn. Pathian kan thangthat ahhin robot (seh) kan lawh tawnmi hi ruah lo awk a tha hrim lo tiah ka ruah. Zeisihmanh ah, a donghnak ah a phi ka chuahmi cu hihi an si:

1. Pathian kan hngalhnak a tenau tuk. Mithi evangelist minthang A.W Tozer nih a chimmi cu, "Pathian kan hngalhning a thuh/kauh ning le a niam/bit ning nih hin minung kan nun hi a kan hruai" ati. Phun dang in kan chim ahcun Pathian hi thuk piin na hngalh deuh paoh ahcun na thangthatning hi le na biakning hi an sang deuh ve hrimhrim la. Kan nunning zong aa dang hrim lai. Kan biakning le kan thangthatning zong a hman deuh fawn lai. Pathian zeitluk in dah kan hngalh? Bible cawnpiakning tein teh kan hngal maw? Hngalh ka timi hi thawngtha chimtu nih an kan chimhnak le kan carelnak in kan hngalhmi khi chim duh mi asi lo. Pathian he pumpak tein hawikomhnak kan ngeihnak thawngin kan hngalhmi "hngalhnak" khi ka chim duhmi asi. Kan Pathian cu a nungmi asi (Jeremiah 10:10). Cu a sullam cu pumpak tein kan i hawikom kho i bia kan i ruah kho tinak asi. 
2. Vawlei he kan i hawikom. Vawlei hi kan tlaihchan chung paoh cu Pathian dawtnak kan chungah a um lo (1 John 2:15-17). Cun, vawlei he kan i hawikom chung paoh cu Pathian zalong tein zeitik hmanh ah kan thangthat kho bal lai lo. Vawlei he naa hawikom sual maw? Mi zeihmanh Bawipa pahnih sal kan si kho lo. Baal pathian maw Israel Pathian dah kan i thim lai? Baal pathian hi Pathian ah kan ruah ahcun bia hna usih law, Israel Pathian thiang hi Pathian taktak ah kan ruah ahcun Israel Pathian thiang lawng hi bia ko hna usih. 
3. Zuk hmawmnak a tawngmi kan um. Kan khainii i hnawm bu hna in pumhnak chung kan rak luh cang ahcun zeitin hme Pathian cu zalong tein kan thangthat khawh lai? Pumhnak chungah kan zukhmawm lo hmanh ah hi bantuk a tawngmi kan si ahcun Pathian thangthat arak kan dawntu an si. Pathian thangthat lawng siloin zuk hmawmnak a tawngmi na si ahcun Pathian na thlacam zong a tui kho lai lo. An dawnh peng la. Cucaah, Pathian zalong tein na thangthat ding ahcun na kaltaak a herh lai. Kan keh lei in vawlei thil, kan orhlei in Jesuh kan ti ahcun a ngah lo. Kan kut hnih in fek tein kan i tlaih a herh. 
4. Kan khuaruahnak a ping ah kal. Pathian nih lungthin a kawl (Salm 139). Kan takpum cu biakinn a phan men lai nain kan ruahnak cu rian ah asi kho. Facebook chung i a mikip nih an tialmi rinhtlak a si lem hoi ttung lomi thawngpang chiahru pawl zong asi kho. Kan i pumh tikah kan tak umnak kan ruahnak hi a um ve maw? Hlasak bu hna in kan thawngpang relmi hna kan ruat sual maw? Prophet Isaiah sinah Pathian nih "an hmurka cun an ka biak nain an lungthin cun kaa dangpi ah a um" ati. Hihi tu lio Laimi mi tampi Pathian thangthatnak he pehtlai in kan dirhmun asi.
5. Kan riantuan kan ceiciar tuk. Minung hi vawlei kan um chung cu kan vawlei taksa he kan i then kho rih lo. Cucaah kan taksa zawn zong ruah ve a hau. Kan taksa kan ceiciar ruangah Thlarau lei derthawmnak zong a chuahpi. Ingpuannak, thintawinak, lungdonghnak, buainak, lungretheihnak, tbt a phunphun a chuahpi. Kan taksa zawn zong ruat pah hna usih. Pathian nih kan kaltaak bal hna lai lo i kan hlaw fawn hna lai lo a kan ti (Hebrew 13:5).

"Thil nung vialte hna, Bawipa cu thangthat uh! Bawipa cu thangthat uh!" Psalm 150:6