Khuaruahhar Pathian Riantuannak

Tuni ah mi tampi nih kan uar ngaimi cu "miracle" (khuaruahhar) asi. A bikin evangelist pakhat nih thlacampiaknak thawngin hnulei i ngalh i tluk ti bantuk hi kan uar ngai. Micheu nih hmuh le ton kan duhmi zong asi theu tawn. Nain, ngaih a chia ngaimi pakhat cu hi bantuk lawng "miracle" ah kan ruah sual tawnmi hi asi. Pathian nih tuni tiang "miracle" a tuah ko. Sihmanhsehlaw, thlacampiaknak thawngin hnulei i ngalh i tluk lawng hi asi hrimhrim lo.

Pathian nih mirale a tuahning hi a phunphun in a um. Cucu tuni ah a ruah awk kan philh tawnmi an si. Tahchunhnak ah, tuni ah ka kawipa nih University of Cincinnati ah B.A a lak. 2007 ah U.S arak phanmi asi i Miraang holh pakhat hmanh arak thiam lo. Nain, tuni ahcun sianghngakchia 50,000 hrawng an kainak university pi ah degree a lak khawh ko. Pathian thawngin asi. Hihi Pathian nih a tuahmi khuaruahharnak "miracle" kan uar tuk lenmi cu asi ko hnga lo maw?

Mipa pakhat nih a nupi a dawt khawhmi zong hi miracle asi ko. Nu nih Khrih tangah aa dor bantuk in a pasal tangah aa dor i a upatmi zong hi miracle tiah kan uar tukmi cu asi ko. Misual pakhat nih thawngtha a zumhnak thawngin khamh asi i Khrih ah sertharmi asi zong hi miracle cu asi ko. Ngaihchia ngaimi asi rih hoimi cu "miracle crusade" ahcun mipi kan tampi nain Pathian bia cawnnak i minung kan tlawm tukmi hna hi an si. Miracle hi uar len ding asi lo. Pathian dawtnak rel zia thiamtu a biapi. Kei cu miracle tuah thiam nakin Pathian duhnak tuah ka duh deuh. Miracle kong buaipi nakin Pathian kong i buaipi ka duh deuh fawn. Amah muisam lawh chin lengmangtu ka duh deuh. Ka chungkhar dawt ka duh deuh. Ka nun caan tawite chungah a thawngtha aupi hi miracle nakin ka duh deuhmi asi.