Ha Ttaih le Bible Rel

Ahopaoh kan si ah umtu siarem lo in a kan tuah tawnmi thil pakhat te a um. Cucu ha ttaih kan philh khi asi. Aa thianhhlimh lem lomi caah cun apoi tuk men lai lo nain aa thianhlimhmi pawl ca'h i ha ttaih philh cu apoi taktak. Zing an thawhkaa i an ha an i ttaih lo ahcun chun nitlak an nuam ti lo. An siarem ti lo. An i phuhrung. Zeidek nih a dawnhmi hna khi an lo. Cun kan kaa nam lai ti an phang. Tam tuk zong an holh ngam fawn ti lo. Cucaah ha ttaih hi an caah biapi ngai asi. Hi bantuk pawl caah cun ha ttaih hi "habit" (ziaza nih a lemmi) bantuk ah a cang thai. Hihi minung tam deuh cu kan si cio hna. Ha ttaih cu zeitluk kan i manh lo (busy) tuk zongah tlolh kan duh lo. Hi bantuk in Bible rel zong hi asi ve awk asi, tiah ka ruat ngai. 

Ha ttaih hi kan caah "habit" pakhat asi bantuk in Bible rel hi asi ve awk asi. Nikhat ah kan ha kan i ttaih lo i kan siarem lo bantuk in Bible kan rel lo ahcun kan siarem ve awk asi lo. Ha ttaih loin kan um khawh lo bantuk in Bible rel loin kan um khawh ve lo ding asi. Kan ha kan i ttaih lo ahcun kan i phuhrung, kan siarem lo, kan i nuam lo, kan kaa nam lai ti kan phang, umzia thiam loin kan um tawn. Hi bantuk in Bibel rel zong hi si ve seh. Bible nikhat ah (kan thawhkaa zongah asi ko lai) kan rel lo ahcun kan siarem ve hlah seh. I phuhrung ve hna usih. Kan kaa nam lai ti kan phan bantuk in kan Thlarau a derthawm ve lai tihi phang ve hna usih. Ha ttaih loin hawi sin kan chuah tikah umtu zia kan thiam lo bantuk in kan Bible rel loin hawi sin kan chuah tikah umtu zia thiam ve hlah usih! 

"Minung hi rawl lawngin kan nung kho lo, sihmanhsehlaw, Pathian nih a chimmi bia paoh cu a nunnak asi lai" Matthai 4:4