USA Ram Hmai Hngaltertu US Nu Bawlung Team

US ram mipi hi bawlung chuih an thiam chin lengmang. Kum khat hnu kum khat zong an thangcho ve. Bawlung chuih a huam bal lomi zong an van huam chinchin. A zoh huam bal lomi zong nih an van zoh deuh cang. USA sport chungah a laar bikmi sport cu American football le baseball hi an si nain a tu ahcun bawlung chuih (soccer) hi American Football changtu a si cang, tiah ESPN nih an rak thanh bal. Naitan US nu bawlung team nih champion an van tlaih hnu in mipi tam tuk bawlung lei ah an tha an thawhter chinchap hna.

USA: 2015 FIFA Women's World Cup Winner

Naitan i USA le Japan final an kai cu a tiru. US ruah lo ningin an rak thawng. Goal thlen hlan ah goal li bak an thuat ko hna. 2011 lio ah Japan le US cu Fifa Women World Cup thiamthiam ah an rak i tong i Japan nih penalty in an rak tei hna. Hi ruang ko hin US pawl nih i cenet lo deuh phun in an chuih in a dawh. Zeisihmanh ah, naitan US final an kainak bawlung puai cu US ram caah tuanbia thar pakhat an tial. Cucu, US ram chung ummi vialte nih bawlung puai an zohmi vialte lakah zoh tong bik a si. 

Thawngzamh tampi zong nih an thanh. Miraang holh TV in million 25.4 nih an zoh i, Spanish holh channel he komh chih ahcun million 26.7 nih an zoh, tiah. US tuanbia (history) chung i bawlung puai zoh a tong bik cu kan hnu kum World Cup i Portugal le USA an chuih kha a si. Million 18.2 tluk nih an rak zoh ve nain atu cu naitan USA women team final kaimi pawl nih an tei cang. Cu lawng si rih lo. USA nih an i uar tuk mi basketball le baseball an final kainak zoh an ton tluk tein naitan an final kai cu zoh an tong ve. 

Tutan USA nu pawl nih champion an lak hi an voikhat a si lo. 1997 kum ah voikhat an rak lak bal i, 1999 ah China (tuluk) he final an rak kai i an rak tei hna caah atu hi an voithumnak champion an lak a si. Vawleicung ram nu bawlung team i FIFA World Cup ah voithum tiang champion a hmu khomi USA nu pawl lawng hi an si rih. US midfielder Carli Lloyd zong Women World Cup final ah "hat-trick" a hmusa bikmi a si. USA nu bawlung team pawl cu USA ram hmaihngalter tu hmanh an si lawng si loin vawleicung ah tuanbia pakhat a tialtu an si. An hlawhmi tangka cu pa bawlung team nak in tlawm deuh hmanh sehlaw upatnak pek awktlak taktak an si. 

Tutan 2015 FIFA Women World Cup i champion a hmumi USA nih million 2 laksawng an co. Hi ruangah mipi a vuivaimi an um pah. Zeicatiah, nule pa an thleidan hna an ti. Kan hnu kum Brazil ram i World Cup champion a hmumi Germany vial nih million 35 an co. Zeiruang ko dah a si? Tam tuk lehpek in an i thlau ttung ti awkin a um taktak. Cun, kan hnu kum 2014 World Cup i USA nih round 16 nak tiang i an sungh hmanh ah khan million 8 he an tlung rih. Kan hnu kum 2014 i Men's World Cup vial ahcun FIFA nih million 576 tluk laksawng a pek hna. Nain, tutan Women World Cup vial cu million 15 tluk hrawng lawng an tinco. FIFA nih a piat tein nu nih pa tluk in a miakmi (tangka) an chuahpi lo, tiah an ti ve. 

Vawleicung khua dawh US le Japan Final an kainak Vancouver, Canada

Tutan nu World Cup ah laksawng a hmumi tete an um. A hmasa bik ah "Adidas Golden Ball" le "Silver Boot" cu USA team chung in number (10) Carli Lloyd nih a co. Anih hi tutan final ah hat-trick a ngahmi a si. Goal 3 a sut. Cun, China he quarter-final an kai lio zongah teinak goal (winning goal) a sut i an awn caah Semi-final tiang a kaipi hna. A nih hi a umnak hmun cu mid-fielder (lai-um) a si ko nain a herhnak caanah hmai zong a kalmi a si. 

US: Carli Lloyd

Adidas Silver Ball ti a si i Amandine Henry nih (France) nih a co ve. A kum 25 a si cang. A thawng taktak. Tha baat a thei lo. Canada chung an chuihnak vialte lak mi mithlang cemmi ah ai tal ve. 

Adidas Bronze Ball ti a si ve hoi i Aya Miyama (Japan) nih a co. Japan ram caah a ngeihmi game vialte tling tein a chuih dih khomi pakhat a si. Bawlung kun chungah a pumpak rian a simi a tlolh bal loh. Penalty in goal hnih te a sut ve i, an team pi cu final tiang a kaipi ve hna.

Adidas Golden Boot ti a si. Celia Sasic nih a co. Hi nu hi Germany le Chelsea midfielder mi puarhraang Michael Ballack he an i lo tak ka timi a si. An number zong an i lo chap hoi. Germany ram Frankkfurt Football Club zongah a chuihmi a si. Tutan World Cup i a chuihmi minute vialte fonh ah 553 a si i, goal 6 a sut ve. Tlik a cak. Bawlung deh le tawnghtham zong a thiam. Bek pawl nih an ttih ngaimi nu pakhat a si. 

Celia Sacic

Adidas Bronze Boot: Anja Mittage nih co. Germany team in a si. Kum 30 a si cang. A upa ngai cang nain Cote d'Ivoire he an chuih lio ah goal thum a sut piak ve hna. Norway he an chuih lio zongah amah goal nak thawngin Germany le Norway cu 1-1 ah an rak i tluk. 

Adidas Golden Glove: Goal bawh thiam bik laksawng a si. 2011 in vawleicung mipi nih thei takmi Hope Solo nih a co. Zapi nih zong nih zumh dihmi a si. Minute 540 tluk goal a bawhpiak hna i 90% cu a khamh, an ti. Nu goal bawh ah amah hi a pahnih nak bik goal tlawm bik an sut khawhmi a si. Anih hi bawlung chuih le goal bawh lawng a thiammi a si lo. Miraang nih "architect" an timi inn sakning a suai i a tuantantu pakhat zong a si chih. 

Hyundai Best Young Player: Kadeisha Buchanan (Canada) nih a co. Kum 19 lawng a si. Tutan nu World Cup ah ngakchia bik a changtu a si i kum no bawlung chuih thiam bik ah an thim. Bek ah aa calh. A nih hi a bawlung chuih thiam lawng a si lo. Minthatnak zong a hmuh. Hi nih hmak tampi a pek. Yellow Card le Red card pakhat hmanh a tinco lo caah hitin laksawng a hmuh phahnak zong a si. 

FIFA Fair Play Award an ti i pumpak laksawng si loin "team" tu a si. France team nih an co. An group cu "F"  a si i, quarter-final tiang an kai ah yellow card pathum lawng an team ning piin an co. Cun, an chuih ning zong aa dawh. An chuihtti hawi (opponent) pawl zong an upat hna. Cucaah, hitin laksawng an tinco ve. 

FIFA World Champion Badge ti a si i World Cup champion a hmu paoh nih i benh top a si ko. Hi chung ahhin, FIFA beach soccer world cup, FIFA futsal world cup, le FIFA Club world cup zong an i tal. Japan nu team nih 2011 ah world cup champion an rak hmuh caah naitan 2015 world cup Canada ram tiang an i benh. Atu hnu cu USA nu team pawl nih an angki hmailei te ah an i benh cang la. Cun, a tu i FIFA World Champion Badge aa benhmi team hna cu 2014 FIFA men's world cup champion Brazil, club world cup champion Real Madrid, FIFA Futsal world cup Thailand 2012 i teinak a hmumi hi an si hna. 

FIFA World Champion Badge

Zohchunhmi ca: 

http://www.pbs.org/newshour/rundown/u-s-womens-soccer-team-gets-2-million-world-cup-win-germany-got-35-million-2014/

http://www.fifa.com/womensworldcup/news/y=2015/m=7/news=lloyd-and-sasic-lead-the-way-2661396.html

http://www.washingtonpost.com/blogs/wonkblog/wp/2015/07/06/the-sad-gender-economics-of-the-womens-world-cup/