Marcos Rojo: Manchester United in Dantatnak a Ing

A tuhi Europe ram club lianlian hna cu a ken kip ah khual an tlawn lio a si. A cheu Asia ram lei ah an kal. A cheu Australia lei ah. A tam deuh hi cu North America hin an ra. Hi lak ahhin, England ram i Premiere Title tam bik a lami Manchester United zong an ra ve. Tutiang an chuihnak ah a thiam bik zong an si fawn. North America an rat i bawlung an chuih tik hin chuih sawh in an chuih lo. Cuhmi an ngeih. Cucu International Champions Cup an ti. Kan hnu kum 2014 ah Man. Utd nih an rak lak. Tutan zong lak than dawh an si.

Marcos Rojo

Zeisihmanh ah, Man Utd nih bek (defender) ah an i bochan ngaimi Marcos Rojo cu aa relrem lo ruangah a talpi kho hna lo i Europe tangka pound in 140,000 dan an tat. US dollars in cun $ 218,532 tluk a si. Hihi, a zarh hnih nihlawh tluk a si fawn. Marcos Rojo hi zahzah dan an tatmi hi amah daithlan ruangah a si. 

Rojo hi kan hnu kum World Cup in mipi theihmi ah a hung um. Argentina ram nih an ngeihmi Club team ah tha tein a chuih ve mi a si ko. Nain, Manchester United thial hi biatak tein World Cup dih hnu ah a duh. Man Utd zong nih a ruah awk an rak thei ve lo. Rojo cu a chuihnak club team sinah training tuah a huam ti lo. Aruang an hal tikah cun Man Utd ah i thial ka duh, a ti ko. Man Utd nih an ka cawk hlan lo, zeitik hmanh ah training ka tuah ti la lo, tiah a leh hna. Tikah, thawngzamh (news) tiang nih vawlei pumpi theih in van cawngia i Man Utd tiang a va phak hnu ah an cawkmi a si. A tuhi an chung tein England ah khua an sa. 

A chung le tiang Man Utd. ah aa kalpi hna

Rojo cu South America i Argentine miphun a si caah Europe i riantuan an duh hin Visa cu an i tuah hrimhrim a hau. Visa lawng tein a tam deuh hi khua an sa hna. Tikah, Rojo Visa cu a rak thi diam. A rak expired. Rojo nih a theih lo bia maw a si, a theih ko buin a renew duh lo dek a si cu thei hlah. Nithla van tling i, US lei van i thawh ti lo caah an van dothlat cu a Visa rak thi ruangah a si. A felfai lo tuk caah dan an tat top ve. 

Hmaithla August 8 ah England club (Premiere league) an thok than cang la. An chuiihnak club zong nih Vacation tha tein an pekta tawn ko hna. Zeicatiah, kum khat chung din lo bakin bawlung an chuih i an baa tuk tawn ve. A cheukhat cu kum thar zing le thawhthan zing tiang hmanh hin an chuih tawn. 

Rojo zong hi naitan i South America nih an tuahmi Copa America ah Argentina in a chuih ve. Final tiang an kai caah sau lak a chuih. Cucaah, a chuihnak club Man Utd nih tha tein a vacation zong hi a sauhpiak ko. Hnu deuh ah van ra te, tiah an kaltaak chungmi a si. Sinain, Rojo nih daithlang ngaiin a rak um tikah US lei a van ra kho ti lo. Cucaah, hitin dan an tatnak hi a si ve. 

Real Madrid zongah a rak chuih thingmi le Argentina hmaikal Angle Di Maria zong a talpi ve hna lo. Man Utd manager Van Gaal nih cun aa ruahchan ngai nain an buaipi lem lo. Biapi ah an chia ti lo. Di Maria cu Paris Saint-German (PSG) nih Europe in 46.5 million cawk an duh ve fawn. Di Maria zong nih i thial a duh ve. Di Maria nih hitin a talpi ti hna lomi hi PSG lei ah kal tuan a duh tihi a fiang ngai.  

Hi an khualtlawnnak i Rojo le Di Maria nih an talpi khawh lomi hna hi an manager Van Gaal nih apoi ah a chia lem loh. Anmah loin teinak cu an hmuh thiamthiam ko. Mexico ram i club a thiam ngaimi Club America cu Seattle, WA ah 1-0 in an tei hna. Tlawmpal ah San Jose Earthquake he Avaya Stadium ah an chuih than i 3-1 in an tei than hna. Cun, kan hnu zarh nirukni ah Europe club a thiamthiam vialte an umnak UEFA Champion League ah Champion a simi Barcelona zong 3-1 in California i Levi's stadium ah an phomh thiam hna. Aralaimi nilini (July 30) ah PSG he Chicago i Soldier stadium ah an chuih than la. 

Soldier Stadium (Chicago, IL)

Laimi nih kan zoh duh bikmi England ram i Premier League cu February 20, 1992 ah rak dirhmi a si. Team 20 an um. Team khat nih kum khat chungah puai 38 peng an chuih tinak a si. Hi chung i a hmak tam bik paoh kha Champion cu an si. Hi bantuk cu League game a si caah, Semi le Final kai i chuih ti bantuk a um lo. Hi lakah Manchester United hi champion (title) a hmu bikmi a si. Man Utd nih voi 13 a hmuh cang. Chelsea hna hi an thiam, tiah zapi zara nih kan uar dom hna nain voi 4 lawng an lak. Arsenal zong hi tongte ttanh cun kan ttanh hna nain voi 3 lawng an lak ve. Manchester City zong hi nai hrawng i a lakmi te lawng dawh a si ko. Voi 2 lawng an lak rih. 

Zohchunhmi ca: http://www.dailymail.co.uk/sport/football/article-3176137/Marcos-Rojo-facing-two-week-fine-Manchester-United-defender-failed-board-flight-hadn-t-renewed-passport.html