Republican Party Donald Trump Nih Mexico-US Border a Va Zoh Cang!

A chim theu bang, tuni ah Donald Trump nih Mexico le US ram karlak (border) a va zoh. Donald Trump cu mirum taktak a si cu zapi nih kan theih dih cia a si. Forbes Magazines nih US ram chung i billionaire lawnte a rum bik tiah an ruahmi minung 400 an thim hna i Forbes 400 tiah min an bunh. Cu chungah anih hi 122 nak a si. A network hi Billion $4 fai a si ve. Amah nakin mirum tampi cu an um rih hme teh. Bill Gates hi atu lio i vawleicung ah a rum bik a si i a network hi Billion $81 a si. Microsoft company ngeitu a si. 

Republic Party: Donald Trump

Donald Trump hi kum 69 a si ve cang. Fa 5 a ngeih hna. A ummnak cu New York ah a si. Cun, anih hi business tampi a tuahmi a si. Cu a tuahmi business pawl chungah an hruaitu bik zong a si chih fawn i, amah hi nawl ngeitu bik zong a si. A cawnnak hi Arts le Science lei ah University of Pennsylvania in Bachelor (BA) degree a hmumi a si. 

2010 lio ahhin Donald Trump nih 2012 president i cuhnak ah min pek a rak duh ziar cang. Nain, 2011 ah a rak i let than diam. Zeisihmanh ah, 2013 hnu hin biatak tein president i cuh ve a duh than. US president pakhat a si khawh ve nak dingah a lam tampi zong a kawl i a tuaktan. Cu hnu cun, June 16, 2015 ah Republic Party ai awh in 2016 president i thimnak ah ital ve dingin min a rak pek. 2016 president i thimnak ah kaa talve cang la, tiah a ummnak Trump Tower ah official in mipi sinah thawngthanhnak a rak tuah.  

New York ah a um. Sibuaizii tuahnak hmun zong a si. Office thatha zong an um pinah aparment phun zong in um khawh a si. 

Adang president aa cuhmi cio bang. Mipi nih kan duh hna seh, tiah heh-chat tiin mipi duhnak in bia a chim len ve. Anih aa tinhmi hi US ram thar remh le sersiam than hi a si. Cucaah, "Make America Great Again," tiah aa ti. A speech chimnak tam ka ngai thiam ve loh. Nain, a chimmi speech ah a talh lengmangmi pakhat cu US ram thlangte i a ummi Mexican miphun pawl duh paoh in US ram i an rak luhnak kong hi a si. 

Mexico ram le US ram kar hi tha tein kham a si lo. Tikah, Mexico ram chung minung lawng siloin, Latino (Mexico ram tang i ummi ram) hi a thli (illegal) in an rak lut lengmang. Kum fatin tam in tam tuk hi an rak lut, ti a si. An zat balte ka van kawl kho loh. Nain, immigrantpolicy.org nih statistic an tuahmi ahcun million 11.6 hrawng hi Mexico ram chung lawngin a rami mipem an si. Cucu, US ram chung i ummi mipem vialte kan dilak chungah 28% tluk an si. An ram a harsa tuk ve caah a mawh cu an mawh ve ruam lo. 

Mexico le US border

Annih pawl hi US ram chung i a thli-thup in an rak pinah harnak tampi an chuahpi. Identification card zeihmanh an ngeih lo pinah an duh paoh in khua an sa theu. Meithal zong duh paoh in a puahmi an um. Sii tha lo bing (drug) le rithai sii zong an van i luhpi. US ram chungah a cin zong an cin chap hna. Misual buu (gangster) zong a sermi an um rih. Mifir le damiah ah an i cang. Hitin ka tial tikah an zaapi kha chim duhmi a si lo. Illegal in an rak luh pinah US ram i ningcang loin khua an sakmi kha chim duhmi a si. Hi ruang hin, US mipi nih an rem hna lonak a ruang pakhat a si ve.Hi kong hi Obama zong nih tam ial a chim tawn nain zei ngai an tuahmi a um fawn lo.

Micheu cu sianginn ah fimnak zong tha tein an cawng ko. Identification card ngeih lo ruangah sianginn kai kho lomi zong an tor ve. Cun zapi lak zong hin rian an tuan ngam theng lo. Cucaah, restaurant i cokaa (kitchen) ahkhin rawl chumh rian an ttuan. Riantuannak zongah palik tlaih khih ttih ruang i a zaammi hi an tlawm ve tawn lo. Malaysia i kanmah Laimi khua kan sak he aa law ngai caan a um tawn.  

A pumpak vanglawng he Mexico le US border a va zoh lio

Sihmanhsehlaw, tuni ah Donald Trump nih cun Mexico ram le US ram karlak cu amah pumpak nih aa ngeihmi vanlawng he bak a va bih. President ka si ahcun vaam (wall) in kan khampiak hna la, tiah bia a kamh rih hna. Hitin a chim tikah, mipem pawl hi a kan huatnak asilo. Ningcang loin US ram chung rak luh i khuasak kha an duh lo bia tu a si. Cun, "ningcang tein US ram chung a rak lutmi (legal immigration) lawng kan herh. Hispanic minung hi a thawng in ka sin zongah rian an tuan. Anmah zong nih legal immigration hi tha an pek ve" tiah a chim chap rih. 

A vanlawng mawngtu pa

a chung

ihnak hna a um

Din le einak zong tling tein a um

Reference: http://www.bbc.com/news/world-us-canada-33645971

http://www.cbsnews.com/news/donald-trump-to-visit-the-us-mexico-border/

Note: Pictures are from Google.