Miraang pawl cu an fim tuk. Ral an tuk lai ah an ral kong theih dih viar hmasa an i zuam. "Khoika dah kan ral an um? An tam maw? Khoi in dah an rat? Zeitindah kan tei khawh hna la? Ttih an nung maw? Zeibantuk strategy dah kan hman la?" tiin an ral kong theih dih hmasa an i zuam. Cucu a herh bak mi a si. Ral kan tuk lai ah kan ral kong le an sining kan theih dih lo ahcun doh awk an tha lo. Sehtan zong hi a um ti cu kan theih nain a doh awk kan thei lo. Kalkap raltu ding bantuk in kan ralpa Sehtan hi a konglam fel tein kan theih a herh ve. Cu hnu lawngah kan tuk khawh lai i teinak kan hmuh la. Zahan kan pastor cawnpiak ningin cun ka van tial kho men lailo, nain si khawh chungin Bible rak kau pah law thazaang rak la ve. Sehtan pa hi aho a si ti naa fian hnu cun fawi tukin na doh khawh lai i teinak na hmuh hrim la.
2 Timote 3:16
"Cathiang hi a dihlak in Pathian thaw chuahhnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a thahnemmi a si."
Tutan cawnpiaknak hi Bible chirhchanh lawngte in an si. Vawlei mifim nih an chim mi pawl pakhat hman an i tal loh. Cathiang nih a kan chimhmi lawngte kha hika hin kan van langhter than ve. Bible hi mi tampi nih, "aa kalh" kan ti. Nain, aa kalh bak loh. Bible cu Pathian thawh chuahhnawhmi a si. Thlarau nih a tialmi a si. Minung bia a si lo. Minung ka in a chuak menmenmi an si lo. Thlarau nih a tialmi a si. Cucaah aa kalh kho lo. Hika hin fiang tein hmuh khawh a si (2 Peter 1:21).
Sehtan tihi "dohtu" tinak a si. Sehtan cu, limkeng, rul pitar, le Khuachia ti zongin auh khawh a si (Bia. 12:9). Sehtan cu, "biak" a duhmi a si (Bia. 22:8-9). Sehtan nih nifatin hrawh a kan timh. Pathian na biaklo cun Sehtan na biak tinak a si. Pathian zong biaklo, Sehtan zong biaklo ti a ngah lo (Mat. 12:30). Pathian fale i rawk hna seh ti a kan duh. Hihi a rian ngan bik a si. Minung lungthin ruahnak thalo a chuahtertu zong hi, hi Sehtan pa riantuannak lawngte an si.
Asaiah 14: 12-19 na rel ahcun Sehtan kong lawngte na hmuh la. Cun, Ezekiel 28: 12-18 na rel ahcun Sehtan pa kong thiamthiam na hmuh hoi la. Bible ah Sehtan kong hi a tam tuk. Hi Bible ahhin Sehtan a thawnnak, aa dawhnak le a lianngannak kha tampi na hmuh la. Cun, Pathian nih aa porhlawt ruang le Pathian sinak a cuh ruangah hi vawlei i a van thlaknak zong na hmuh la.
Sehtan cu Vancung khua ah a ummi a si. Pathian nih a hman ngaingaimi a si ve. Sehtan cu aa dawh taktak. Eden dum chungah sui le lungvar phun kipin rak ttamhmi a si. Hi Sehtan pa hmanh hi Vancung ahcun rak cawnghmi a si ve. A bawi ngaingai i, mi thil ti kho ngai a si. Zeithil a tuahmi hmanh soiselnak a um lo. Sehtan cu aa dawhnak le upatnak a hmuhmi nih a lung a puamter. Upatnak a hmuhmi karhseh ti a duh. Amah le mah aa porhlaw. Sual aa thoknak cu porhlawtnak hin a si. Vanmi hna nih Pathian an biak bantuk hin ka bia ve hna seh ti kha a van duh cang. A fimnak a ping in a hman. Vancungmi Mikhael le vancungmi hna nih Sehtan cu an doh i a sung. Cucaah, Pathian nih Sehtan cu a vancungmi hna he vawlei ah a van thlak. Vancungmi 1/3 a van i ttumpi rih hna (Bia. 12:3-4). Minung kan umnak vawlei i Pathian nih a van thlak cu a poi taktak si.
Sehtan kan ttih tukmi hi a poi. Ttih ding a um lo; Pathian vancungmi sawhsawhte khi a si. Pathian kut tang ah a um vemi a si. Kanmah zong a um vemi kan si. Amahbalte, Vancungmi hna cu Thlarau an si. Annih cu minung chungah an lut kho. Saram chung zongah an lut kho. Hihi lawng kan i dennak a si (Hebrew 1:14).
Pathian nih vawlei hi a kan pek. Saram le thilnung vialte uk dingah nawl a kan pek chih (Gen. 1). Sinain, Sehtan vawlei ah thlak a si hnu cun amah nih a uk dih. Cucaah, vawlei hi sualnak in a khah dihnak a si. Sehtan cu chiandeuh a rawltaammi bantukin nifatin aa chawk. Seh a kan zelh zungzal. Sihmanhsehlaw, Pathian nih rak doh hna ve seh ti a kan duh. Sehtan pa tei khawhnak thawnnak zong a kan pek chih (1 Peter 5:8).
Sehtan pa vawleicung a rat hnu cun a phunphun in rian a tuan. Sehtan hi mi thilti kho taktak a si ve. Pa men lo taktak a si. A thilti khawhnak ruang hin nii donghnak ahcun mi tampi hi Hell ah aa kalpi te hna la. Minung tampi nih an zulh te la (Bia. 13:3). Nangmah le keimah hna kan i tal sual ve hnga maw? Sehtan nih hin Bible zong a rel ve. Pathian fapa hmanh Cathiang chirhchanh in a tukforh ngammi a si (Mat. 4:5-6).
Sehtan riantuan ning kan zoh rih la. Sehtan cu milihchim a si. Sehtan cu mihlen a thiam mi a si. Eve le Adam chan te khan a tuni tiang lih a chim peng. Tuni ah lih kan chimmi le mi kan hlenmi te pawl hi Sehtan pa lawngte a rak si. Ka hlen hna lai i, Hell ah kaa kalpi dih hna la ti a duh. Piangthar zong a kan hlen lengmang tawn. Cucu, a caah "tactic" pakhat a si (Bia. 12:9-13).
Sehtan cu mi thinlung chungah sual a kan puh zungzaltu a si. Zei kan tuahmi paoh, na sual a kan titu a si. Kan sualnak i hmuh tuk hi a rak tha lo. Hi nih hin Pathian karhlannak ah thazaang dernak a chuahter. Cucu, Sehtan riantuannak pakhat a si ve. Sehtan cu mi lainawng a si. "Mithat" timi le "lailawng" timi hi aa dang deuh. Israel mi zong kha Pathian nih mi tampi a rak thahter ko hna. Lainawng timi cu a sual lomi thah khi a si. Tuni ah IS nih le tapung nih lai an nawn ning ruat ve. A hleiin Sehtan nih hin Pathian Fapa Jesuh Khrih a zummi paoh hi a doh khun hna (Bia. 12:17).
Sehtan nih hin Khuaruahhar (miracle) duh chungin a tuah khawh ve. Tu lio i vawlei kan zoh tikah khuaruaharhnak a tam ngai. Hihi Pathian riantuannak lawngte a si, kan ti awk a si lo. Sehtan riantuannak zong an si. Cucaah, thla fak piin cam i, Pathian hal zungzal a herh (Rev. 16:13-14).
Sehtan cu Vancungmi a si ve caah Thlarau a ngei. Cu a Thlarau cu minung chungah aa hrawlh kho. Cu aa hrawlhmi minung hna hmangin vawlei ah sualnak phunphun an tuah tawn (Luk. 22-3-5). Minung nih thil tha kan tuah la tiah tha tein kan i timhtuahmi zong hi a kan kham tawn. Pathian Lamkaltu Paul hmanh a rak kham ve (Korin 2: 2,11,13-15).
Sehtan cu zeitluk hmanh in thawng sehlaw, nii donghnak ahcun a sung la (John 12:3). Hell ah a zungzal in thlak a si la. Mei le kat tili chungah peih a si la. Sehtan nih vawlei kan nun chung i a hlen khawhmi zong Hell ah aa kalpi ve hna la. Nii donghnak ahcun Pathian zong fapa a rathan te la. Bawipa, Bawipa, tiah a timi paoh kha a kan cawite lai lo. Amah duhnak tuahmi lawng kha cawi kan si te la. Sehtan hlennak a tei lomi cu Jesuh nih, "Sehtan sinah va kal ko" tiah a kan tite la (Mat. 25:41).
Tial chin lengmang ahcun a sau chinchin la. Zaa rih seh. A kan cawnpiak ning zongin aa tial thiam loh. Nain, careltu thazaang nan laknak i, nan caah a thathnem ahcun a tha tuk. Cucu ka thlacamnak a si.
Sehtan pa hi tti hrimhrim hlah. A nung Pathian thawngin kan tei khawhmi a si. Amah nak in thil ti khomi le riantuan khotu a nung Pathian kan ngei. Amen! Bawmtu Thiang Thlarau Jesuh nih van a kai lai ah a kan chiahta kha, philh hlah (Johan 14:26). Thiang Thlarau bawmh hal zungzal law, teitu na si lengmang ko la.
Pathian fapa a rat cu, Sehtan pa riantuannak hrawh awkah hin a si.
1 Johan 3: 8
"Cun sualnak a tuahmi paoh cu Khuachia fa a si ko, zeicatiah Khuachia cu a hramthawk tein a rak sualmi a si. Pathian Fapa a hung langhnak cu Khuachia riantuannak hrawh awkah hin a si."
Chirhchanh: Bible
Pictures are from Google.com
No comments:
Post a Comment