God Is Faithful

Tukforhnak na cung i a tlungmi kha midang kan cung zongah a tlung ciomi arak si ve ko. Nangmah lawng nih na in-tuarmi tukforhnak asi hrimhrim loh. Pathian cu zumh awktlak Pathian asi bantukin a biakamnak cu a zulh zungzal ko lai caah zei bantuk tukforhnak hmanh na in-tuar khawh lo leng tiangin na cungah a tlunter hrimhrim lai lo. Hi cu ka fa nu/pa nih a in-tuar khawh ko la tiah Pathian nih a ruahmi lawng hi a tlunter zungzal. Pathian a tha tuk ee. Cu tukforhnak na cung i a tluntermi cungah intuar khawhnak thazaang an pek hoi lai i chuah khawhnak lam zong an serpiak zungzal hoi la (1 Korin 10:13). Cucaah, tukforhnak na in tikah lungsau tein Bawipa hngak law, amah kha i bochan ko. Bawipa cu zumh awk a tlak!!

Pathian Hngalhmi Kan Si Maw?

Obama cu ka hngalhmi asi tiah White House ah amah ton ah kalning law ka tong kho nemmam lai lo. Security pawl cu um rih seh, amah Obama zong nih luhnak nawl (permission) a ka pek lai lo ding hi a fiang tukmi asi. Aruang cu, Obama nih a ka hngalh ve lo caah asi -- keimah nih hngalh lawng a za lo. Cu ve bantukin, Pathian hi kanmah lawng nih hngalh arak za loh. Amah Pathian zong nih a hngalhmi si ve kan herh. "Pathian nih a ka hngal ve hnga maw?" timi biahalnak hi i hal tuah hna usih. Matthai 25 chungah timhcia tein a ummi ngaknu panga lawng nih nupi thi tlangval an ton khawh. Adang panga cu innka a khar kenh hna i 'kan hngal hrimhrim hna lo', tiah a ti hna (Matthai 25:1-13).

Khrih Dawtnak Cu Kanmah Ta Asi

Khrih dawtnak cu kanmah ta asi. Cu kan ta a simi Khrih dawtnak he cun zeihmanh nih a kan tthen kho lai lo. Harnak nih siseh, temhinnak siseh, hremnak siseh, rawltamnak siseh, pamnak siseh, thil ttihnung nih siseh, thihnak nih siseh, zeihmanh nih a kan then kho lai lo. Vancung i a ummi vanmi nih si hna seh, uktu le thawnnak nih si hna seh, atu caan nih siseh, hmailei caan nih siseh, cunglei vawlei nih siseh, tanglei vawlei nih siseh, a kan then kho lai lo. Kan ta a simi Khrih dawtnak he a kan then khotu ding cu sermi thil dihlak ahhin zeihmanh a um lo!! (Rom 8:35-39)

Jesuh le Hngakchia

Jesuh thawngtha a chim lio ah ngakchia tete cu a sinah an rak ratpi hna. A zultu nih an tthawl hna caah Jesuh cu a thin a hung. A thawh hna i "ngakchia cu ka sinah ratter hna uh" a ti. Cun, Jesuh nih an lu cungah a kut a chuan i thluachuah a pek hna (Mark 10:13-16).

Nulepa hna, Jesuh nih kan fale hi thluachuah pek a duh hna. Kan fale Jesuh hmaiah ratpi hi kan rian asi. Thluachuah pek cu Jesuh rian asi. Kan fale Pathian he kan hlatter deuh hna paoh ah Pathian thluachuah kan rak phihpiak hna asi!

Jesuh Hi A Zultu Maw Kan Si, A Uartu?

Jesuh hi uar tuk a herh lem lo. Tuni ah Jesuh hi kan sinah rak tlong seh law hman kan thlakpi viar men la. Kan kuh kan reh khawh men. Selfie zong kan thlakpi lai i kan snapchat le Facebook ah kan taar khawh men. Aruang cu Jesuh hi idol pakhat bantuk in micheu nih cun kan rak uar sual tawn caah asi. Bia dangin kan chim ahcun Jesuh "fan" kan si. Sihmanhsehlaw, Jesuh nih "fan" a herh lo. Uartu le duhtu zong a herh lo. Hmanthlakpitu zong a herh lo. Jesuh nih a herh taktakmi cu amah "zultu" (follower) hi a herhmi asi. Jesuh hi idol pakhat bantuk in uar loin amah hnu zulh tuhi i thim deuh ko hna usih..

"Ahohmanh nih zulh nan ka duh ahcun mah zawnruahnak kha nan ngol lai i nifa tein nan vailam kha nan i put lai i nan ka zulh lai." Luke 9:23

Fimnak Kan Timi Hi..

Sianginn kai i degree lak hi fimnak asi lo. Micheu nih degree a ngeimi paoh hi mifim ah kan ruah hna. Arak si thlu loh. Kan ram ah BA a hmu nain mihrut le hman awk tlak lo minung kan tam tuk. Cawnnak sangpipi a cawngmi mihrut zong kan tam tuk thiam. Nain, sianginn kainak in thiamnak pakhat khat cu ngeih khawh asi ve. Cu nih cun kan paw cawmnak tiang a kan thathnempi men la nain fimnak ngaingai cu arak si thlu lo. Hitin fimnak kong ka tial tikah mifim hna ah maw ka ruat lai uh cih. Ka fim lo. :) Kei cu a simple ngaimi tlangval note sawhsawh ka si. Fimnak hi a biapi tuk. Solomon nih Israelmi a hruai khawhnak dingah Pathiam sinah fimnak a rak halmi hi ka uar kho tuk. Cun Phungthlukbia tialtu Solomon mifim pa thiamthiam nih fimnak kongah hitin a kan cawnpiak: 

Phungthlukbia 9:10

"Bawipa ṭih cu fimnak hramthawknak a si, A Thiangmi Mi hngalh cu a thukmi thil hmuh khawhnak a si."

Bawipa ttih hi fimnak hramthoknak cu asi.

Bawipa Bochan Kan Timi Hi..

Soccer coach nih a team chung i a ummi player cu a thiamnak, a thawnnak, le a thilti khawhnak kha fiangfai tein a hngalh lawng ah a team caah a bochan ngam. Cu bantuk cu Bawipa bochan kan timi hi asi ve. Bawipa hi, a thawnnak, khuaruahhar Pathian a sinak le zeizong vialte tuah khotu Pathian a sinak kan i fian taktak lo ahcun Bawipa bochan kan timi hi a fawi ngaimi a lo ngai nain a har taktakmi asi. Jesuh le zultu pawl khual an tlawn lio ah thlichia a hrang i a zultu hna thih an i tim. An lawng chung i aa hngilh ziarmi Pathian Fapa Jesuh kha zei bantuk minung asi an rak i fian lo caah asi. Cucaah, Jesuh nih nan hei ka bochan lo hringhran dah, tiah a ti hna (Matt 8:23-27). Bawipa kan i bochan khawhnak ding ahcun kan bochan dingmi Bawipa hi ahodah asi tihi kan i fian hrimhrim a herh. Na fian deuh si le, na bochanning a fek deuh lai. Bawipa hngalh duh ah nikhat ah Bible voi zeizah kan rel cio hnga? Bawipa, nangmah hi ahodah na si, theih kan duh tihi kan thlacamnak si tawn seh..