Europe Pumpululh Thawngpang le Theihtlei

Ronaldo thazing game a chuih kho than cang la. Spain le Germany ram ahhin "yellow card" voi 5 an ngah sual paoh ah game 1 bar lengmang tawn a si. Italy ram ahcun voi 4 "yellow card" ngah ah a si. Ronaldo cu nai April 08 an chuihnak ah avoi 5nak "yellow card" a ngah sual. Messi he goal sut tam biatak tein an i zuam lio i game khat van bar lai a ruah ah a lungrawk ngai. Amah chinchap a thintawi he ing-ai in ai ciah lai ti ka zumh. Zeisihmanh ah, Ronaldo cu an coah pa Carlos Ancelotti le Real Madrid president pa nih an va nawlpiak le a chuih kho than la. Hitin an nawlpiak mi hna hi "yellow card" an ngahnak aruang cu ti ngaiin an palh tuk lo ahcun an rak cohlan tawn ko. A luancia caan ah adang bawlung chuih minthang zong an rak nawlpiak tawn. Ronaldo ready ngaiin a ra dingmi thaizing April 11 ah a chuih ko la khah. US ram Eastern Time in cun zinglei 10:00 am Beinsport ah zoh khawh a si lai. 

Derby

Zlatan Imbrahimovic game 4 chung chuih kho loin dantatnak ai huah. Hi pa hi palek lak le pumrua tha ngai a si. Hmaikal goal sut thiam ngai mi le a thawng bak mi a si. Mi cheu khat nih an uar ngai nain kei cu ka uar kho loh. Aruang cu, amah le mah ai cawisang tuk; ai porhlawt tuk caah ka uar kho lo.

Interview an tuahnak tibantuk le hi pa thawngpang hi na zoh le na rel lemlo ahcun ai uahnak le ai seihchiahnak hi na thei tuk lem lai loh. Game 4 chuih kho loin dan an tatnak zong hi zeidang ruangah a si lo. Mi zeirel lonak ruang ah a si thiam ko. Nai tan bawlung an chuihnak i referee pa he bia an i alnak ah " France is awful country" a ti caah a si ko. Amah cu Swenden ram mi asi nain tu a chuihnak hi Paris Saint-German (PSG), France ram ah a si. Cucaah, France ram le mipung zeirel lo nakin a chim caah game 4 chuih kho loin dantat ai huah ve. Hi dantatnak a ton mi zong hi a zei hmanh ti rih loh. "Tu kum season dongh tiang dan rak ka tat hna seh law ka nuam deuh ving hnga. Holiday nuamhnak ah ka rak kal chung la lo maw zei", tiah a chim rih. 

Angki ai phoih lio

Hi pa uar umnak pakhat te a um ve. February, 2015 hrawng ah Zlatan nih goal a sut dih ah a angki ai phoih. A pum khat in tattoos lawng te ai suai caah mipi an khuaruahhar. Biahalnak an tuah tikah ngakchia rawltaam tihal in ummi a bawmhchanhnak hna kha muhsak a rak duh caah asi. A pum dihlak in tattoos ahcun million 800 ngakchia hna an min cu kai tial a ti. Nain, million 800 cu tial dih awk a that lo caah million 800 aiawh in a pum khat in ai tial tu a rak si. Hi ngakchia rawltaam tihal in million 800 hrawng a ummi bawmhchanhnak i ai pumpek ve mi lam cu ka upat i ka ttihzah. Sinain, amah le mah ai porhlawt tuk i sang tuk ah ai chiah lengmang mi balte hi cu ka uar bak lo.

Europe ram bawlung chuih tik i "Derby" an ti tawnmi a sullam fianh ka duh. Bawlung chuih na zoh tikah "Derby" le "El Clasico" tibantuk na theih tawn theu lai. Keizong ka rak theih lengmang ve ko nain a sullam cu ka rak i fiang tuk ve loh. Zeisihmanh ah, tawi fiannak te in zoh khawh kan van i zuam lai. 

Derby ti a sullam cu, khua (town, city, or region) pakhat ai lo mi chungin bawlung team pahnih an chuah i an chuih mi paoh khi "Derby" ti a sullam cu a si. Cun, team pakhat le pakhat ai ral tukmi pawl zong khi "Derby" ti khawh thiam a si ve. Sinain, khua pakhat chungin bawlung team, team hnih an chuah i an chuihmi paoh khi "Derby" tiah zapi nih kan auh deuh. 

Europe ram i a laar mi "Derby" pawl in tahchunhnak ka van lak lai. Zapi nih kan thei dih mi Manchester United le Manchester City cu England ram Manchester khua in team hnih dirmi an si. Cucaah, hi team hnih an chuih paoh ahcun "Derby" tiah auh zungzal a si. A ral zong ai ral taktak mi an si fawn. Cun, hi derby cu April 12 zinglei 11:00 am US Estern Time ah an chuih lai. Hi derby i teinak hmumi cu kum vui Premiere League title tiang cuh awktlak an si lai ti tiangin an chim. Man Utd hi tu hrawng an cawlcangh ning a that ngai caah teinak an hmuh ko lai ti ka zumh. Hehehe.. 

England ram thiamthiam i club minthang Liverpool le Everton an chuih tik paoh cu "Derby" tiah auh ve khawh a si. Aruang cu, Liverpool cu England ram ah

khua pakhat a si i, cu khua chung ahcun Everton F.C cu dirh mi a si. Cucaah, an i ton tik paoh ah "Derby" kan ti ve hna. Spain ram club minthang Real Madrid le Atletico Madrid zong "Derby" tiah au an si ve i, ai ral taktak mi an si ve. Chihsawh le uico bantuk an si. Real Madrid nih thiamnak lei in a tei peng ko nain a ttih zungzal mi hna an si. Kan hnu kum Champion League Final ahcun Real nih a rak tei ko nain atu ahcun tei ai harh cem mi an si. A luancia caan ah game 5 hrawng an chuih i voi 4 Atletico nih an tei hna i voi 1 an i tluk. Atletico nih Copa Del Rey tiang ah an rak thlak hna. 

El Clasico ti a sullam cu, Spain ram chung i bawlung chuih pakhat le pakhat ai zuammi pawl auhnak min a rak si. Sinain, a tu ahcun Spain ram khuapi bik pahnih le vawlei cung club lian bik asi veve mi Real Madrid le Barcelona an i ton caan lawng hi "El Clasico" tiah auh a si cang.Cun, hi "El Clasico" goal tam bik a suttu cu Lionel Messi a si i goal 21 khat a sut. Hi team pahnih an i ton caan paoh cu Champion League final dah ti lo ahcun vawlei cungah a hlunghlai cem mi game a si. Nai tan March 22 i an i ton zongah inn khat in zoh a si. Khua dang ummi zong nih kan rak zoh cio lai. Facebook statuses le bang cun anmah kong lawng te i pakhat le pakhat i alnak lawngte a si ko. 

Zohchunhmi ca:The Guardian/Goals/ESPNFC/Eurosport