Cristiano Ronaldo Nih Zahan Thawhthan (Easter Sunday) Zing Game ah Kawl 5 Bak Thuat!

Ronaldo ruangah Real Madrid fan ka rak si ve. Ronaldo cu ka rak uar bak ve ko. Uar zong cu a rak phu rengreng ve cuh. Zeicatiah, a chan lio ahcun amah tluk in bawlung chuih thiam minthatnak laksawng a hmu mi zong an rak um lo. A ke tuah le a bawlung chuih dan style nih mino thinlung a lak khun. 2003 Man Utd a rak i thial kaa hrawng ahcun Premiere League ah a ke rang cem a si pinah a laar cem a rak si. 

2009 kum ah Spain ram Real Madrid F.C ah ai thial. Nain, ka uar thiamthiam rih ko. Amah ruah ko hin naite tiang Real Madrid hi ka rak uar. An game tlolh ka rak i tim bal loh. Messi he cuai kan rak thlai lengmang hna caah Messi a uar tuk mi pawl he zong biaalnak hi awi tam lak ka rak tong ve.

Real Madrid uar kai phiat. Aruang phun hnih in then khawh a si. Pakhatnak cu, kan hnu kum dongh lai November thla chung hrawng ahkhan, 1931 in rak chiah cang mi Real Madrid an logo i vailamtah (cross) ai phun mi te an hloh. Aruang cu, Real Madrid club an president Florentina Perez Rogriguez nih Muslim Arab ram UAE Bank timi he $3.5 billion pek in pehtlaihnak a tuah caah a si. Hi pehtlaihnak an tuahmi nih aitinh bik mi cu Arab ram ah Real Madrid fan an karh tuk caah, karh chinchin hna seh ti a duh caah a si. Vailamtah (cross) tal bu khan cun biaknak lei he tlawmpal te ai pehtlai caah a van harsa deuh theu lai cu. Hi ruangah hin Real Madrid fan in ka chuahnak a si. Cun, Real Madrid ka uar ti lonak aruang pahnihnak cu mi an tei ah kai lungsi kho ti loh. Vawlei cung bawlung chuih minthang a thiam mi paoh an lak viar hna. Millions an duh zat in an offer hna i an cawk hna. Vawlei cung bawlung chuih thiam mi lawng te van umnak club i mi an van tei tik hna ah, "an tei khe hna la hme teh; vawlei cung bawlung chuih thiam mi lawng te an si hi," ti khin ka lungah a um le ka zoh tik hna ah tha pek zong ka lung chuak kho ti lo.

Zeisihmanh ah ka bia sau. Zahan i Ronaldo nih bawlung puai, puai khat i kawl 5 sut cu a va mak ve -- "double hatrick" a ngah dengmang. Europe ram chung "top club" timi pawl team 53 an thim hna i, team 53 chung team pakhat cio nih an sut mi kawl vialte nakin Ronaldo amah lawng nih a sutmi kawl a tam deuh. Zahan ah, Real Madrid le Granada cu zinglei 6:00 am bak ah an chuih. Kawl 9-1 in an rak awng i Ronaldo lawng nih kawl 5 a rak thuat. Ka hawi le nih na tho kho ve te la maw an ka ti cu, "nemmam" ka ti hna. An rak chuih dih hrawng khi ka thawh van si kaw a result ka hmuh cu ka lau dih ve. 

Ronaldo nih Messi a tei than cang. Ronaldo cu a luancia caan zeimawzat chung  ah "ing le ai" he a rak i ciah. Awi dang bantukin a ke a chuak lo. Kawl hrimhrim a sut khawh ti lo caah ingpuang in a thutdirnak a tawi hrim lo. Ronaldo nih Messi La Liga an thokkaa in kawl tamtuk a rak thlau. Sinain, Messi nih van dawi chin lengmang i Ronaldo cu kawl 32-31 in kan hnu zarh ah a van tei. Hiti kum khat chung kawl sut tam cem paoh hi "golden boot" pek tawn an si caah an thazaang dihlak in an i zuam tawn ve. Ronaldo nih zahan kawl 5 sutmi thawngin Messi cu 36-32 in a van tei than ve hoi. La Liga League ah game zeimawzat te ai duh rih caah zeidah kum dongh tiang an lawh lai cu chim khawh a si lo. Messi le Ronaldo an thiam ning khuaruahhar a si hi cu chim hau lai ka zum loh. 

A luancia zarh 2 i Barcelona nih Real Madrid fak tuk in an rak teinak hna nih Real Madrid fan tampi a ngaichiat ter. Sinain, atu Real Madrid coach pa, Carlos Ancelotti nih, "Barcelona nih a kan tei mi hi, kan thawn chinchin deuhnak tu a si lai" tiah, a chim ve. Champion league ah hnabeiseinak an ngei tihi a fiang. Champion league lo cun an i ruahchan mi dang um ve ti loh ti khawh si ve cu awh. La Liga ti le Barcelona an sungh dah ti lo cun lak khawh dawh an si ti lo. Copa Del Rey ti le Atletico Madrid nih tha dam tuk le zohchia in an rak thlak hoi fawn hna. Ancelotti biachim zoh tik le zahan an mitei ning zoh tikah thawng ngai dawh ruam cu an si. Nain, ka zum lem hna loh. An "next game" kan zoh rih lai i, cun ai fiang deuhdeuh te ko la. 

Kum 30 fai a si cang mi Ronaldo hi ka ttihzah ngai. Bawlung chuih huam tuk ve mi pakhat ka si ruangah a si. Ronaldo tluk hin professional bawlung chuih mi ah bawlung a "sutsak" mi an um lai lo. An chim tawn. Training tuah lai paoh hawi hlan in a rak chuak i, hawi hnu cem pengah a lawimi si an ti. A kong kan rel tikah ngakchia te hrim in bawlung hi a rak i hruhpi ve. Atu nii tiang kan zoh tikah bawlung kong i a hei buai khawh rih ning. Khi tluk Europe ram bawlung chuih thiammi vialte lak i a cawlcangh khawh rih ning. Bawlung chuihnak keden tiang le a sam "hair style" tiangin a buai khawh rih mi hi zeidang a si lo; bawlung a duh tuk ve ruangah hin a si cem ko. 

Hi hnu kum 3 ah US ram Major League Soccer (MLS) ah a rak i thial la ti thawng theih a si. Cun, Swedish pa bawlung chuih thiam Zlatan Ibrahimmovic zong rat ai tim ve. Kai ngaih lawlaw. A luacia caan ah David Beckham le Henry zong an chuih len nain kan zoh kho ve rih hna lo. Atu cu 2007 i vawlei cung bawlung chuih thiam Ricardo Kaka' zong a um ve cang. Tlawmpal ah Steven Gerard zong a ra chom te lai. Lampard zong New York Red Bulls ah ra ding sinain, Man City nih an thlauh ruangah a si. An tar lei hnu ah US ram an rak fuh hna, nain hi US ram chung a chuih mi hna sin lak cun khuaruahar in an thiam rih. 

Hika hi click law zahan a kawl 5 sutnak highlight zoh khawh a si lai.