Bawlung Chuih Thiam Gregory Mertens a Thi Cang

Belgian mi Gregory Mertens cu nikhatni (april 27) ahkhan bawlung an chuih lio ah ruah lo piin a tlu. Sau zong a chuih rih lo. Kawl thlen hlan minutes 30 hrawng a chuih ah si. Rianrang in siizungah an tlikpi ko nain an khamh kho lo. Cucaah tu zaanlei khan siaherh ngaiin a kan thi taak. A damlonak hi "Cardiac Arrest" timi lung zawtnak he aa pehtlaimi a si. Doctor te zong nih a dam khawhnak dingah an thiamnak dihlak an chuah ve ko nain an damh kho hlei loh. Mertens hi mino te kum 24 lawng a si rih. Hiti a damlonak hi ahohmanh nih an rak theih lo. Naite a chuihnak club thar Lokeren F.C zongah ngandamnak test an tuahmi vialte a awng dih ko ti a si fawn. Ruahlo piin hitin a tluk caah hitin thihnak tiang a tonnak hi a si. 

Gregory Mertens ref. google.com

Gregory Mertens hi zaapi nih cun kan theih rih lem lai lo. Nain, Belgium ram nih cun bawlung chuih lei ah an i bochan tuk mi pakhat a si ve. Belgium ram caah tiin kum 21 tang national team zongah a rak chuih. Cun, a ngakchiat te hin kum 16 le 19 tang national team zong ah a rak chuih cang. Atu hi Lokeren, Belgium khua i Lokeren F.C ah a chuih lio a si. 

Mertens thih hi vawlei cung bawlung chuih thiam minthang tampi le club lianlian zong nih an ngaihchiat pi ve. Everton hmaikal Romelu Lukaku le Belgium mi Chelsea kawlbawh Thibaut Courtois zong nih an ngaihchiatpinak an hei langhter i ca zeimawzat te an hei tial ve. 

Bawlung chuih hi ka duh tuk mi pakhat si ve caah hiti an thih hin ka lung tha lo ngai tawn ve. Ka sia hi a rem loh. Cucaah anmah ngaihchiat hrawmhpinak pakhat bantukin hi ca hi ka ka tial. Pathian tu nih a taantakmi a chungkhar van hnem hram ko hna seh.