US Ram Nihlawh Kong Tlawmpal

Kan theih lengmang bantukin, US ram khua cheukhat ah nihlawh tlawm tuk ruang i duhlonak a langhtermi hna an um. US ram hi, ram tha kan ti nain an nihlawh pekmi a tlawm tuk rumro. Ahlei in, Fast Food, le store riantuanmi hi a tlawm khun. Nazi pakhat ah dollars $7.25 ti te khi an hmuh. A tlawm taktak. Cu he pehtlaiin kan hnu kum khan duhlonak an rak langhter. A tlawm bik nazi pakhat ah $15.00 hmu dingin sandah an rak piah. Cheukhat khua nih a si kho lo an ti nain a cheukkhat nih cun an cohlan ko. 

Kan hnu kum June, 2014 ah Seattle, Washington nih a ralaimi 2017 kum thok in nazi pakhat ah a tlawm bik $15.00 pek dingin hnatlaknak an rak tuah. Kan hnu kum November thla zongah California state i San Francisco khua nih 2018 thok in nazi pakhat ah a tlawm bik $15.00 pek dingin hnatlaknak an rak tuah ve. Cun, adang US ram i khua lianlian Chicago le New York te pawl nih nazi pakhat i a tlawm bik $15.00 hmu dingin an tuaktaan cuahmah ve. US ram chung i nazi pakhat ah a tlawm bik $15.00 hmu dingin a thok hmasa bik khua hi Seattle, Washington asi. 

Tuni ah US ram chung i khua lian bik pahnihnak a simi Los Angeles zong nih nazi pakhat ah a tlawm bik $15.00 pek dingin hnatlaknak an tuah ve hoi cang.  Los Angeles khua chung riantuanmi 40% nih nazi pakhat ah $15.00 nak tlawm an hmuh. Cun, Los Angeles khua chung riantuanmi vialte cu a tlawm bik nazi pakhat ah $10.50 pek dingin July, 2016 in an thok lai. Cun July, 2020 hnu in nazi pakhat ah a tlawm bik $15.00 pek dingin an tuahpiak than hna la. 

US ram riantuanmi minung 60,000 hrawng nih US ram khua (city) 200 nak tam ah an nihlawh tlawm tuk nak kong he an duhlonak an langhter. Nihlawh tlawm tuk lawng a pemi company pawl cu Walmart le McDonald's tibantuk hi an si. Nazi pakhat ah $15.00 hmu ding cun an i zuam len ve nain an pe kho rih hna lo. An nihlawh balte cu $1, $2 hrawng an chap ve hna. Nain, hi bantuk company i riantuanmi caah cun a zaa rih thiamthiam lo, tiah duhlonak a langhter tu pawl nih an chim. 

2009 i US cozah nih US ram chung riantuanmi ca'h i a tlawm bik hmuh dingin an rak khiahmi cu $7.15 hi asi. President Obama a lung rak tling lo tuk. Congress sinah a tlawm bik $10.10 tal an hmuh awk asi, tiah a rak chimh hna. Nain, atu tiang cun a tlamtling rih lo. Amahbalte, naite ah Congress i riantuanmi Bobby Scott nih US ram chung chung riantuanmi vialte nih a tlawm bik nazi pakhat ah $12.00 tal cu 2020 thok in an hmuh te ko lai, tiah biachimnak a ngeih ve cang. 

Zeisihmanh ah, kum le caan kal tu hngah kan hau ko rih tinak asi. Atu i nazi pakhat ah $15.00 pek dingin hnatlaknak a tuah cangmi khua bantuk zong nih Laimi kan umnak khua zong ah hnatlaknak an tuah ve te khawh ko. Cun, kum le caan a kal bantukin riantuanmi kan nihlawh cu US cozah nih an kaiter deuh chinchin te ko lai. A fawinak in, hi hnu kum 5 ah ai letthal te lai. Holh thiam zong thiamlo zongah a tlawm bik an khiah ning zatin kan hmuh ve te lai.