Cristiano Ronaldo Cu a Mualpho Taktak Cang Ko Hih!

Vawlei cung i bawlung a uar bik ram hi England asi. Clubs 42,490 an ngeih. Vawleicung ram ah England tluk in bawlung team (club) a ngeimi an um lo. Laimi zong hi sport cu kan uar bak. Ahlei in bawlung hi kan uar khun ve. A buaktlakin zapi nih kan thiam cemmi zong asi fawn. Sport thawngpang kan tial tik ah kan rel ngai tawn. Cucaah hi thawngpang tehi tial zong ka tim lemlo nain ka van tial than. 

Vawleicung model minthang Irina Shayk

Tu kum thokka hrawng khan, tulio vawleicung bawlung chuih thiam bik Cristiano Ronaldo le vawleicung model minthang Irina Shayk cu kum nga chung an i duhnak in an i tthan. An rak i tthanka hrawngah an tuanbia le an sining zong tawi tein ka ral tial cang. Caan zeimawzat hnu ah C.Ronaldo cu Mexico ram sport reporter Vanessa Huppenkothen he an i duh tiah an rak ceihphai colh hna. 

Kan hnu zarh ah ruahlo piin Irina nih C.Ronaldo cu media ah a thangchiat. A relmi le ai share mi kan tam. Facebook zongah a laar ngai. Aruang cu, zeiruang dah kum nga chung ai duh cangmi le, a rauh hlan ah tthitumhnak zong an tuah deng ttheu la tiah mipi nih ruahmi Irina Shayk le C.Ronaldo cu an i tthannak aruang theih asi lo. Irina zong nih a chim lo i, C.Ronaldo zong nih a chim ve lo. Sihmanhsehlaw, kan hnu zarh media ah Irina nih C.Ronaldo cu zohchia ngaiin a phuan dih cikcek. Vawleicung bawlung chuih thiam ah a tur in turmi le mipi kan uar tukmi nungak pakhat nih a mual van phoh cu zeitikhin dek a va um hnga mu. 

An rak iduh lio

Irina Shayk hi Russian asi. A tulio vawleicung model minthang pakhat asi ve. Hmun kip ah kal in cawngngia le hmanthlaknak in tangka tampi hmu vemi asi. C.Ronaldo le Spain ram ah um i bawlung chuih peng vemi si fawn. Tikah, an umtti kho tuk ve lo nain kum nga chung cu an i duh ko. Hitin an i hmuhlo kar ah C.Ronaldo hi zumh awktlaklo le zohchia ngaiin khua rak sak dawh asi. 

Vawleicung model minthang Irina Shayk nih C.Ronaldo a thangchiat ning cu hitihin asi. C.Ronaldo hi a duh paoh in nu kip he arak um (arak cheated). Irina zong a duh paoh in a rak hlen lengmang. FIFA Ballon d'Or voi thum tiang a hmumi C.Ronaldo cu a girlfriend Irina hrimhrim nih a rak phiat hmasa. A phiat ning cu, hmun khat an umtti lio ah Irina nih a phone a check piak i, nungak kip he phone message an rak i kuatmi a hmuh hnu in a phiat. 

"Ka zumh tuk ko. Awi tampi zong amah he i tthan lo dingin kaa zuam peng ve ko nain a tutan cu i tthan lo awk tha ti lo" tiah, Irina nih a chim. Cun, C.Ronaldo nih a chawnhbiakmi nungak pawl zong nih Irina hi an rak tuaitaam. "Na boyfriend C.Ronaldo he kan i kom, kan umtti," tiah message hna an rak kuat. 

Bradley Cooper

Irina nih a va halthan tikah C.Ronaldo nih a rak i phalh ve. Nain, a phone chung message a hmuh hnu cun zeihmanh lihchim awk that ti lo caah C.Ronaldo nih a phuan dih lawlaw. Tikah, Irina cu an umttinak inn chungin a chuak colh i tihin an i than thainak asi. Tlawmpal ah Irina nih Facebook le Instagram i an hmanthlak vialte zong a hloh (delete) dih. 

Atu ahcun Irina cu US minta Bradley Cooper he an i duh cang. Naite New York ah mipi lak an i hnamhnak zong a um. An pahnih te hin an i duh ngai. An umtti caan ah nihkheh le i muaitaam lawng an rian. Bradley zong nih Irina a duhnak kong hi a chim len. US minta Bradley Cooper hi kum 40 asi. Irina Shayk zong kum 29 asi ve cang. Sau an i duh kho te hnga maw?! 

Bradley le Irina

Zohchunhmi ca: http://www.mirror.co.uk/3am/celebrity-news/bradley-cooper-irina-shayks-relationship-5727216

http://www.90min.com/posts/2170942-cristiano-ronaldo-dumped-by-irina-shayk-after-he-cheated-with-dozens-of-women?a_aid=35681

http://www.sportseconomics.org/sports-economics/what-country-loves-football-the-most