Exercise Tuah Cu Ngandamnak Lawng Si Lo; Nun Khuasaunak Zong Asi Chih!

Nun khuasau a duh lomi kan um la lo. Ngandam zong a duh lomi kan um la lo. Sihmanhsehlaw, nun khuasaunak ding le ngandamnak dingah a herhmi tuah cu kan huam hoi tawn lo. Miraang holh zong thiam cu kan duh ngang nain a cawn ka huam bak lo. Pastor nu pakhat nih a chim phun in, "a chunh in chunh kan hau tawn." 

Zeisihmanh ah, tuni ah BBC nih Norway ram Oslo University Hospital in hlathlainak (research) an tuahmi ah exercise tuahnak nih nun khuasaunak a kan pek, an ti. A fawinak in, exercise tuah na fel deuhdeh paoh le na nun khuasau deuhdeuh ve ko la. Zarh khat chungah a tlawmbik nazi pathum chung ahcun a zaadiam ti asi. Zarh khat chung i exercise nazi pathum chung na lak ahcun na nukhua kum nga ai chap ti asi. Hi exercise tuah hi, kuakzumi nih kuak an iphiat i, an nun khuasau deuh bantuk te khin nun khuasaunak a chuahpi ve. Pakhat umve mi cu, exercise kan tuah tikah phumen sawhsawh in tuah ve lo ding.

Exercise kan tuah tikah felfai tein kan tuah ve a hau. Nikhat ah nazi zeizah dah ka tuah? Tuni ah hi zat exercise ka tuahmi hi zarh khat ah zeizah dah si la? tiah i cinken a herh. Zarh khat chung i exercise kan tuahmi dihlak nazi pakhat chung lawng hna si ahcun pakpalawng lawng a rak si ve la. I cinken, "Zarh khat ah a tlawm bik nazi pathum chung tal kan tuah a herh la khah."

Miraang pawl gym an kal tikah taklawng in an kal bal lo. Mi tam deuh cu catlap le bawlpen an i ken viar. Aruang cu, cu tik cu thla i an tuahmi le an nazi ttem kha an tial dih. Record tha tein an ituah. Cun, ram dang pawl hi exercise tuah zong an huam ve rengreng. Zeiruang ahdah Laimi kan nulepa pawl hi nan huam bak tawn hnga lo tiah khua ka ruat tawn. Miraang pawl cu, zeitluk zaantlai zongah dahmei an i ken, uico an ihruai le exercise an tuah ko. Hi nih hin mitampi an nun khua a sauhter deuh hrimhrim ko la tiah ka zumh fawn. 

Laimi kan nulepa hna, zeitluk kan riantuan cei zongah exercise lak hi rian pakhat ah chia ve cang uh. Ram tha kan um tikah hawi nih an tuahmi thil tha paohpaoh cu kan icawn awk asi. Nan fale zong nih saupi rak kan nunpi kho uh tihi kan saduhthah asi zungzal ve. Nan riantuan thabaat hnu i exercise tuah fial dah cu nan ka ti ko la. Nain, phone chawnh pah zong ah lamkam (platform) cungah a kal tal kal sawhsawh ko. Na vapa, na nupi he bia hna iruah ulaw, i chawk salam ko uh. Inn ngeimi na sicun na inn zongah zaanlei sang exercise tuahnak ding pakhakhat cawk khawh izuam. Europe ram i exercise tuah a fel bak an timi ram cu Netherlands ram hi asi.  

Atang lei ram pawl hi exercise tuah ah a thathu timi pawl ram pawl an si. BBC nih an van taar chih caah ka van taar chih ve. 

69 % Portugal

55% Poland

46% France

44% UK

34% Croatia 

26% Germany

Zohchunhmi ca: http://www.bbc.com/news/health-32735723