Ahodah Kal Lai?

(Ka lungchungah kaa uam khawh ti lomi tlamtling lo ngaiin ka tial)

Lai miphun ram thumnak ah Pathian nih mupi arfa cawi bang a kan cawi i a kan phakternak a ruang hi nan ruat cio ve ko lai. Ruah lo awk a tha lomi a si. Minung cu kan ruahning aa dang khomi lawngte kan si caah ram thumnak kan phaknak a ruang hi aa dang cio hrim lai. Kei zong ka ruat ve i a ruang pahnih lawng ka hmuh khawh:

1. Ram thumnak in Lairam sersiam ding
Ram thumnak in kan chuahtaakmi Lairam cu kan sersiam taktak ko. Lai ram lam sul vialte a cotu hi ramdang ummi deuh kan si. Biakinn thatha, inn le lo thatha a satu zong ramthumnak um Laimi lawngte kan si fawn. CBC-USA hrim nih hin tam tuk a bawmh hna. Hihi cu al awk a tha hrim lo. Hi pinlei a dang tam tuk kan sersiammi a um rih hrim lai. Cucu, nangmah tein ruat ve law na theih ko lai.

2. Khrih thawngtha karhter ding
Pathian nih zum lotu hna lak sinah Laimi hmang in a thawngtha karhter a duh. U.S ram hi Bible he rak tlakmi ram a si, tiah an chim theu. Nain, mipem ram a si caah "multi-religious" in a um. Zeicahtiah kan duhmi biaknak paoh zalong tein kan biak khawh caah a si. Sihmanhsehlaw, hitin zalong tein biak khawhnak kan ngeihmi 'right' nih sualnak a karhter taktak. Micheu cu an zumhmi hmanh an i fian ti lo caah zeihmanh an zum lo lawlaw. Hlan lio ah Pathian a rak zummi zong Pathian a zum lomi ah an i cang cang. U.S ram mipi nih zeitluk in dah Pathian an kaltaak timi hi research ka tuah tawn i tial cawk ding a si lo. Cozah zungah US ram an tlaihtleng an tangka cuang "In God We Trust" timi cu nan kan hlohpiak lai, tiah ca an tial cang. Hmai thla (April) ah New York City ah Baal milem Muslim pawl nih an ser cang lai. Thawngtha chim thiam Miraangpa nih "US ah biakinn a um ti loh. Thlarau nih a chuahtaak cangmi biakinn lawngte an si caah building pakhat sawh men an si", tiah a chim.

Lai mino hna, ram thumnak in kan Lairam cu kan sersiam taktak nain Khrih thawngtha hi teh kan phuang maw? Na hawinu, na hawipa Khrih nih an dawtnak kong na ruah bal maw? Khrih caah teh a kan fial bantuk in a tehte tha cu kan si taktak maw? Kan sayapa nih "statistic ka zohmi ah zum lotu nakin Khrihfa aa timi cu porn a zohmi an tam deuh, lihchim mi zong an tam deuh, a hrokhrok mi zong an tam deuh," a ti. Tu kan chan ahcun zumtu le zum lotu hi thleidan a har ngaingai le ngaihchia taktak a si ko. Hihi thawngtha chimtu kan tlawm tuk caah a si.

March 15, 1899 ah Carson te nupa cu hi tluk ram tha chuahtaak in Lairam ah an ra le thawntha an kan chimh. Nang le kei Pathian dawtnak in an ram ah kan rak phan ve. Kan ram ah thawngtha an rak chim bantuk in tunii ah nang le kei nih chim dingin Pathian nih rian a kan pek. Hi vawlei kalning in kal ve lengmang ti hlah usih. Kannih cu Pathian dawtmi fa kan si. Amah ta si dingah vawlei ser hlan piin thim cangmi kan si. Zum lotu hna le Pathian a thei lomi nun in kan nun ve awk a si lo. An caah Khrih thawngtha biatak a phuangtu ding lehlam kan si. Efesa chungah "lungfim tein um uh. Mihrut si hlah uh. Mifim bantuk in um ulaw Bawipa a duhnak kha kawl i zuam uh" a kan ti. Lungfim taktak tein hi kan chan aa rawkral mi le sualnak in a khatmi ahhin kan um khawh nakhnga Bawipa nih kan bawm cio ko seh!

"Lo khi tha tein hei zoh hmanh u; rawl cu an hmin dih cang i tuan an cu diam cang." Johan 4:35

"Rawl tuan awk cu tampi a um ko. Sihmanhselaw, a tuantu ding cu tlawm te lawnglawng an si." Matthai 9:37