Pathian Chiatserhnak In Tlanh Dingah
Sihmanhsehlaw Nawlbia nih a chuahpimi chiatserhnak chung khan Khrih nih a kan tlanh cang, cu a kan tlanhnak cu kan ca i chiatserhmi i a cannak thawng khan a si i chiatserhmi a hung i can cu, Cathiang nih, “Thingkung cung i thlaimi paoh cu Pathian chiatserhmi an si,” a ti caah khan a si.
Galati 3:13
Jesuh Khrih cu Pathian nih a thi in ngaihthiamnak sertu ah a tinhmi a si i cu ngaihthiamnak cu Jesuh Khrih zumhnak thawngin hmuh ding a si. Pathian nih cu bantukin minung he remhnak a tuah cu a dinnak kha langhter a duh caah a si. Cu a langhterning cu hitihin asi: hlan lioah cun a lung a sau caah mi nih an tuahmi sualnak kha i hmuhter duh loin a um. Rom 3:25
Dawtnak cu, Pathian kan rak dawt hi a si lo, amah nih a kan dawt i kan sual ngaithiamnak caah a Fapa kan sinah a run thlah hi a si. 1 John 4:10
Kan Pathian cu a dingmi le dawtnak Pathian a si. Kan Pathian hi ding hlah seh law, a Fapa hi fahnak in in a thihter hnga lo. Kan Pathian hi dawtnak Pathian si hlah seh law, a Fapa fahnak tuar in thih ding hi a siang hnga lo. Cucaah a dawtnak le a dinnak nih hin a dingmi Pathian a sinak cu an langhter.
Pathian nih nawlbia a kan pekmi cu, “Bawipa na Pathian cu na lungthin dihlak le naruahnak dihlak le na thawnnak dihlak in na dawt lai” (Deuteronomy 6:5) tihi a si. Sihmanhsehlaw, amah dawt cu a kan fial ko nain thil dang tampi kan dawt deuhmi an rak tam tuk. Cucu sual kan timi cu a si ko – Pathian nakin thil dang tampi kan nunnak i biapi bikah kan chiahmi nih hin Pathian kan dawt lo ning le kan upat lo ning cu an langhter ko. Cucaah Bible nih, “mi vialte cu kan sual dih cio ko i Pathian sunparnak kha kan bau dih ko” (Rom 3:23) a ti. A nungmi kan Pathian tu daw loin kannamh pumpak nuamhnak thil a simi lehlam kan rak dawt deuh. Hi ruangah hin sualnak kan timi hi thil te hmete a lo tawn nain arak a si hrim lo. Zeizong vialte sertu a nungmi Pathian zei ah rel lo le serhsat a si. Kan Pathian cu sunparnak le lianngannak vialte pek awktlak Pathian a si. Kan ngeihmi nunnak dihlak zong in dawt a phumi bakmi Pathian a si.
Sihmanhsehlaw, cucu minung kan sualnak ruangah kan tuah khawh lomi a si. Cun, kan Pathian cu a dingmi Pathian a si caah cu kan sualnak cu a thup lo. Tantat tlak kan si caah hitin fiang tein a kan chimh ve, “Sualnak man cu thihnak a si” (Rom 6:23) a ti. Ezekiel 18:4 ah, “A sualmi paoh cu an thi ko lai” tiah kan hmuh rih. Cun, “Hi phungbia a dirpi lo i a zul lomi cu chiat seh” (Deteronomy 27:26) a ti fawn. Hi nih fiang tein a langhtermi cu, kan sual ruangah Pathian chiatserhnak kan cung i a tlungmi hin ahohmanh kan luat kho lo tinak a si. Pathian nih nawlbia zulh ding a kan pekmi kan zulh khawh lo caah kan sual i sual man cu thihnak a si, tiah Bible nih fiang tein a kan chimh. A thiangmi a nawlbia kan buar caah chiatserhnak in dingah aa tlakmi kan si. Cucaah, kannih caah a taangmi cu Pathian chiatserhnak le dantatnak in ding lawng hi a si ko. Pathian nih chiat kan serh hlah seh law, kan Pathian cu a dingmi Pathian a si hnga lo.
Sihmanhsehlaw, Pathian dawtnak cu kan sual ruang ah Pathian thinhunnak in a rami chiatserhnak he khan ai lo lo. Zei tluk in kan sual zongah cu kan sualnak cungah cun Pathian nih ai lunghmuihnak langhter a tim bal lo. Cucaah, a thinhunnak in a rami chiatserhnak in tlanh dingah a Fapa ngeihchun Jesuh Khrih cu vawlei ah a van thlah (Galati 3:13). Kan sual ruangah kan i tlakmi chiatserhnak cu a lak siter loin a Fapa ngeihchun Jesuh cungtu ah a van khin. Cuticun Pathian nih a dinnak le a dawtnak kha a langhter (Rom 3:25). Kanmah ai-awh ah a rami Jesuh nih hin, Pathian chiatserhnak a hrawk lo – amah cung tu khan a tlunter. Cucu, kan Pathian a dinnak a si.
Cucaah, Pathian sin in kan hmuh awk ah ai tlakmi chiatserhnak cu, Khrih cungah khinh dih a sinak nih Khrih a zummi kan dihlak caah Pathian chiatserhnak le dantatnak cu a um ti lo. Cu ruangah, Khrih dawtnak ruat buin hitin rak chim ve, “Dawtnak cu, Pathian kan rak dawt hi a si lo, amah nih a kan dawt i kan sual ngaithiamnak caah a Fapa kan sinah a run thlah hi a si.” 1 John 4:10
No comments:
Post a Comment